5
Nne awo bahke ma ga njini nya?
1 Nne awohng awohng no lꞌtaame re, Jisos wo li Kraist, ye mmon Esowo wo. Nne awohng awohng no nde lꞌkor-e, mmon ewe bahk-e tob kor.
2 Esowo lꞌkor-r, e lꞌbum atahm enye, ana wo e bahke kahne re, abon Esowo kp-r koro. 3 E lꞌbum atahm enye, jia lohngo re, á kp-r koro.*5:3 Jon 14:15 Atahm enye riidem.†5:3 Mat 11:30 4 Nne awohng awohng no Esowo jel-e no, á kpꞌgake njini nyia. Eltaame enyahre ni e kpꞌtaame ni wahnge e kpꞌgake njini nyia. 5 Nne awo bahke ma ga njini nyia? Nnene limm, sehngem nne no kpꞌtaame re, Jisos wo li Mmon Esowo, ye wo bahke ma ga njini.
Ntianse nyi Jisos Kraist
6 Jisos Kraist wo li nne no ko alahb, a alung ba a ma. Á koom alahb ma ma ba a ma. Á ko alahb ba a ma, a alung.‡5:6 Jon 19:34 Etingi Etohko ji li ntianse, tibre Etingi Etohko, etingitingi ji. 7 Li ntianse era, 8 Etingi Etohko,§5:8 Mat 3:16 a alahb,*5:8 Mat 3:14-15 go alung.†5:8 Ef 1:7 Bo kpee ebtaame bum nnyo amehng.
9 E kpo taame tv alum ntianse nya nne kpo bung. Esowo lꞌyiimi ntianse, ntianse nyio nyi bahke ga tahne, nyi á yiimi ka Mmon ewe. 10 Nne no lꞌtaame tv Mmon ewe, á kpi ntianse nyio go ege eltim.‡5:10 Rom 8:16 Nne no tohko taame tv Esowo, yebrod Esowo bum ana nkimfahnga nne. Tibre á taamem tv ntianse nyi Esowo yiimi no ka Mmon ewe. 11 A wo li ntianse nyi li re, Esowo ma-r ka elkpin ni li go njinanjini. Elkpin nio ni li goji Mmon ewe.
12 Nne no lꞌko Mmon, á kpi elkpin. Nne no tohko ko Mmon no Esowo, elkpin á kpimm.
Elkpin ni li go njinanjini
13 N kpꞌnyono nwer nyia tv wahn ji ma taame tv mbing nyi Mmon no Esowo, eji ń lꞌkahn re, ń kpi elkpin ni li go njinanjini. 14 Ana wo e kpo sahb Esowo, tibre e lꞌbahb ajehng ajehng ji kor-e no, á kpo wuk-r wuk.§5:14 Jon 15:7 15 E lꞌkahn re, ajehng ajehng ji e lꞌbahb-e, á kpo wꞌwuk, e kpꞌtob kahn fvfo re, e bahke bele ajehng ajehng ji e lꞌbahb-e.
16 Nne awohng awohng no lꞌnyehn mmonannyehn ma lim abiafem nya ki li nya elkv, nobo re á kak ero ka Esowo. Esowo bahke fere ka-e elkpin. Jia li ka ane bao ba ki lim abiafem nya elkv. Abiafem nyandiki nya elkv nya. Me, wahn n tongem re, wahn kak ero ka Esowo bade elkohn abiafem nyao.
17 Ebꞌbi ajehng ajehng, abiafem nya. Elkohn abiafem nyandiki nyaa, nya ki li nya elkv.*5:17 Mat 12:32; Hib 6:4-6 18 E kpꞌkahne re, nne awohng awohng no Esowo jel-e no kpehme lim abiafem. Nne no Esowo jel-e no, Jisos wo kpo baab-e. Ebinne jio we nehm ma lim ejumjum.†5:18 Jon 10:28-29 19 Wahr kpꞌkahne re, wahr li ka Esowo. Njini nyia kpee wob go elwo ni Ebinne jio.‡5:19 Luk 4:6 20 Wahr kpꞌkahne re, Mmon Esowo ebba, ba ka-r elkahne, eji e lꞌkahn Esowo bio bi li go etingitingi. E wob nne nno no li go etingitingi go atahng, a Jisos Kraist Mmon ewe. Ye wo li etingitingi Esowo, a elkpin ni li go njinanjini.§5:20 Jon 20:28; Rom 9:5
21 Abon ebame, yaamen a eblom!