2 NWER NYI
JON
1
1 Me nnenkul,*1:1 1 Pit 5:1 me wo kpꞌnyono nwer nyia tv nnenkal no Esowo m-e yehke, a abon abon ebe, bo ji kp-m koro, tib eji e kpꞌtoono etingitingi. Me ntahngtahng sang a kp-m koro, a kpꞌtob kor ane kpee ba kpꞌkahne etingitingi.†1:1 3 Jon 1 2 Tibre etingitingi ji wob go egahre ntim bahke jolo a nahre ano ano go njinanjini.
3 Nnoobo, ndon, a elkoono ni lohng goji Esowo Nsoo, a Jisos Kraist Mmon a Nsoo bahke jolo a nahre, a etingitingi, go elkoro.‡1:3 Jon 14:6
Etingitingi, a elkoro
4 Atahng jo yeb-m sehng, eji n nyehne re, abon ebahne bandiki kpꞌtoono etingitingi,§1:4 Jon 4:24; 17:17 jang jang ana Nso ejahre tong-r no.
5 Nnenkal, n kp-a gboongo re, wahr bel elkoro atemtem. A ntahm nyi nfenfe sang n kpꞌnyono tv-a. Ntahm nyi e bele go mbomannahb nyi.*1:5 1 Jon 2:7 6 Elkoro lohngo re, wahr jo bum atahm enye.†1:6 1 Jon 5:3 Ntahm nyi ana, nyi ń wuku go mbomannahb re wahn jo jen go elkoro.
7 Tibre anehm ane gbalee eblohng yel go njini, ane ba kil eltaame re Jisos Kraist ba go ngubjing. Elkohn nne noo nnehmane wo, ye Nnekv a Kraist wo.‡1:7 1 Jon 4:1-3
8 Gberen elnahne, eji ń lꞌkꞌtane ejum ji e limi eltum kehm bele, eji ń lꞌbel eltuuru enahne kpee.§1:8 Gal 4:11; 5:4 9 Nne awohng awohng no tohko sa ano ano, jo toono eltibi ni Kraist, á lꞌta nnyab, Esowo limm a ne. Nne no lꞌsa ano, jo toono eltibi nꞌnehm, Nsoo, a Mmon, bo li a ne, bo ane abal abal.*1:9 1 Jon 2:23
10 Nne awohng awohng no lꞌba go egahne, á tohko ko eltibi nio ba a ni, kana ye ko, kak go egahne ntahk.†1:10 1 Tim 1:3; Tait 1:11; Ell 2:20 Kana ye nnyo kak! 11 Tibre nne no lꞌkak-e nnyo, á li ana nne no kpo lim ebꞌbi eltum nio a ne.‡1:11 1 Tim 5:22; Ell 18:4
Esꞌkohro alum
12 N kpi nsol gbalee nyi kehn n jol-n tongo. Me nehme kor re me n ko alahb nwer, nyon go ekpake nwer.§1:12 3 Jon 13 N kpꞌbumu re, m bahke bake ba nyehn-n, fere bung a nahne antahng antahng, eji eyebatahng ejahre lꞌbiingi go nseenga nseenge.
13 Abon ba mmonanne no nkal no Esowo m-e yehke, kp-n kake nnyo.