NWER NYI POL NYONO TV
ANEB ERO BA LI GO
FILIPAI
1
Me Pol, a Timoti, wahr ji li alokeltum ba Kraist Jisos, e kpꞌnyono nwer nyia tv aneb Esowo, a atubesi ero, a alokeltum ero ba li go Filipai, ba ma taame tv Kraist Jisos.
Nong, Esowo Nso ejahre, a Ntul a Jisos Kraist ka-n nnoobo, a elkoono.
Ana Pol jo kak ero ka aneb ero
N kpo kak Esowo ebame saam ngare anyehng anyehng nyi n lꞌbuum-n.*1:3 Rom 1:8 Ero abehng abehng bi n kpo kak ka wahn ane kpee, n kpo kak go eyebatahng, a saam akake tib go ebo bi ń jo kak-m go nnoobo etib atiingi bomo ngbokambang efung tete ba rehng lela.1:5 Fil 4:15-16 N kpꞌsahb kꞌkahn re, Esowo bi bomo nnoobo eltum alimi go egahne atahng, á bahke gohro lim, gohro song mal efung bio bi Jisos Kraist.1:6 Fil 2:13; 1 Kor 1:4-9
Fꞌfuumu re me n jo tiir-n ana, wahn ane kpee, tibre ń wob-m go eltim. Tibre wahn ebtob bel nnoobo nyi Esowo ana nyi me m ma bel, ń kp-m kake ebo, eji n wob ngbekobo,§1:7 Fil 1:13 ń tob kak-m ebo ngare nyi n yiimi nnoobo etib njahm, fere jo nok, eji lꞌyiimi. Esowo bi li ntianse enyame. Ye wo kpꞌkahne elkoro ni ń kp-m koro re me n nyehn-n, elkoro nio ni lohng go eltim ni Kraist Jisos.
N kpꞌkake ero re, elkoro enahne jo gbal na asongo asongo, wahn fere bel elkahne budu, a ngbere, 10 nyi ḿ bahke ma jo liingi nsol nyi ga nob,*1:10 Rom 12:2; Hib 5:13-14 eji ń lꞌjol saang, kꞌbel ebi ajehng ajehng efung bio bi Kraist, 11 fere bel akab gbalee, nya lohng go egahne etingitingi elkpin, nya Jisos Kraist kpo wahng kehm kabe, eji Esowo lꞌbel ellub, bo fere jo tehk-e.
Kraist wo li elkpin ename
12 Abonanee, n kpꞌsebe re wahn kahn re, jia ji ma-m lim a, ebkak ebo, alum Esowo ebkpe nyange rehng esꞌsong. 13 Abꞌbaabe ba etahk ntubesi, a egom ane bako kpee ebkahn re, n wob ngbekobo tib go esi ji Kraist.1:13 2 Tim 2:9 14 Abonanee bandiki gbalee ebbel esahb go eltoono ni bo kpꞌtoono Jisos, tib eji n wob go ngbekobo. Bobkpe bel esahb gbalee budu go alum Esowo abungu, kꞌfahl.1:14 Elt 4:17,29
15 Etingitingi, ane bandiki kpo bung alum nya Kraist tib eteelala, a ntaange ataange. Wo, ane bandiki kpo bung a ntir atahng nyi nno. 16 Bo ba kpo bung go elkoro. Bo kpꞌkahne re, n wob ana, eji n lꞌyiimi nnoobo etib njahm. 17 Ane bako kpehme bung alum nya Kraist a ntir atahng nyi nno. Bo kpo ra na etul,§1:17 Mak 9:35 eji bo lꞌbud-m erem go ngbekobo nyi n wob no.
18 Jol m-e nehme lub. Atahng kp-m yebe, eji ane kpꞌwuku bada Kraist go mbang anyehng anyehng, afi ane bandiki bungu alum Esowo go mbang awak, afi bo fere bungu go etingitingi. 19 M bahke soro na asi, jo bel eyebatahng. Tibre n kpꞌkahne re, nsol nyia bahke kpiidi, fere jol eltahre ename,*1:19 2 Kor 4:17 tib go egahne ero bi ń kpꞌkake, a ekakebo ji etohko ji Jisos Kraist.
20 Jo jol-m go eltim gbalee, n fere jo kunu ekpu re, ejum ajehng ajehng kꞌjol ji bahke wahnge bo rik-m ndon, eji n lꞌjol esahb esahb ngare anyehng anyehng, Kraist fere kpe bel na ellub go egama ngubjing, afi n li go elkpin, afi n kpo na.1:20 1 Pit 4:16 21 Anv, ejum aji li li elkpin? Egame, elkpin ni n li a ni a, Kraist wo. Afi n kpo na, nsehng nyia.1:21 1 Kor 15:55 22 N lꞌjol go elkpin ni ngubjing, n kpꞌkpi eyake ji m bahke ma lim eltum ka Esowo ni kpi nsehng. Owo wahnge n kil kahne ji m bahke yꞌyehke.
23 Me n sa ayaame mbang. Ji kp-m sahb kꞌkor li re, me n tahm song jol a Kraist. Tibre ano wo ga nob. 24 Tib go egahne esi, ga li re me n jol ana go elkpin.§1:24 Rom 1:11 25 Eji m ma sahb kꞌkahn ano, n kpꞌtob kahn re, m bahke jolo ana go elkpin, fere soro asi a nahne, eji ń lꞌgbal, fere bel eyebatahng go mbang nyi ń kpꞌtoono Esowo. 26 Elgeere ni ḿ bahke geere kak-m go esamahr bi Kraist bahke gbale sehng ngare nyi n lꞌkpe feere ba go egahne.
Ana e bahke noko ka Kraist
27 Nong, eljini enahne fuumu a nnoobo etib bi Kraist,*1:27 1 Tes 2:12 eji afi m ba na, ba nyehn-n, afi m maam ba, n lꞌwuk re, wahn baa, yim tꞌtahne go etohko na ajehng, fere kpꞌnoko a eltim anehng ka eltibi ni nnoobo etib bi e kpꞌtaame tv. 28 Kana jo fahl anebekv ebahne go mbang anyehng anyehng.1:28 Elt 18:9 Tibre jia ji bahke tibi ana bo bahke rannge, wahn fere bel eltahre ni lohng goji Esowo.1:28 2 Tes 1:4-10 29 Tibre Esowo ebyake eltum ni ḿ bahke jo loko Kraist ka-n, ni li re wahn taame tv-e, fere tob jo nyehn erem tib go ege esi, 30 fere jo nok ebta bꞌnehm bi ń nyehne go egame, a bi ḿ ma wuk anv bada name.§1:30 Elt 28:16-20

*1:3 1:3 Rom 1:8

1:5 1:5 Fil 4:15-16

1:6 1:6 Fil 2:13; 1 Kor 1:4-9

§1:7 1:7 Fil 1:13

*1:10 1:10 Rom 12:2; Hib 5:13-14

1:13 1:13 2 Tim 2:9

1:14 1:14 Elt 4:17,29

§1:17 1:17 Mak 9:35

*1:19 1:19 2 Kor 4:17

1:20 1:20 1 Pit 4:16

1:21 1:21 1 Kor 15:55

§1:24 1:24 Rom 1:11

*1:27 1:27 1 Tes 2:12

1:28 1:28 Elt 18:9

1:28 1:28 2 Tes 1:4-10

§1:30 1:30 Elt 28:16-20