16
Osisimuwa wa Yinsa
Paata ya ovirisa Saapatu, Mariyamu Mataleena, Salome na Mariyamu mamaawe Tiyaaku, khuuzanya mafuttha oonukhela yoori eetthele mwiili wa Yinsa. Siikhu ya mwanzo ya sumana supuyeene, njuwa leettelaka opuwa, aakha apale khulawa okhapuri. Ntarikhi khusala oozelana yoori: “Paani anttelaaye onilazelavo liwe lifukaniweeyo nlako wa khapuri?” Maana liwe laya laari liwululene. Ila noofiya okhule, khoona liri loolaziwavo. Aviriyeevo nkhapuri mphule, khumoona shaapu awaliye kuwo zoolakala eekhaliye nkhono nlume, na khwiiya awoova. Khuwooza yoori: “Mwihoove, mweeyo mwinimweekesa Yinsa wa Nazareeti, aakhomeliweeyo. Ye asisimuwa! Khaamo mphu, moone puuro aattattikheliwevo. Mwilawe na mwawooze anakhiyoni awe na Pheeturu yoori: ‘Ye alokoza eettaka Kalileya.’ Ottuukho mweeyo mwinlawa mwamoone, nkhama etthiipo awuuziyeenini.” Eettaka othukumela na osuthuwa, aakha apale khulaawo na khutthiramu nkhapuri mphule. Na khuhimuuzi hatha ntthu, maana aari awoova.
Yinsa onimpuwelela Mariyamu Mataleena
Wakathi Yinsa asisimuwiyeevo lifwajiri la siikhu ya mwanzo ya sumana, khumpuwelela omwanzo ene Mariyamu Mataleena, otule eekariweeyo mmwiili mwawe masheethwani sapa. 10 Ye khulawa owooza ashirikha awe Yinsa, maana yo aari oohuzunikha na olila. 11 Wakathi asiiliyeevo yoori Yinsa ori haayi na ampuweleliye Mariyamu Mataleena yo khuhikhupali.
Yinsa oniwaapuwelela anakhiyoni awiri
12 Paata ya vitthu epile, Yinsa khujithoonyeza khwa wuuso nkina vakatthi wa anakhiyoni awe awiri alottaka tarikhi ya omashapa. 13 Yo khuruti khuta khuwooza mattakhuzi apale azaaya; ila theenya apale khuhikhupali. 14 Omwiisho waya Yinsa khuwaapuwelela apale khumi na mmote, wakathi aariiyo vameeza, na khuwaashowera mwaasa woohikhupali na wuuma rooho zaya, maana khawaasileziye apale aamoniyeeyo wakathi asisimuwiyeevo. 15 Khuwooza yoori: “Mwilawe olumwenku wooshi mwawalaleyele atthu ooshi hapari zooshapweya. 16 Otule ankhupalelaaye na khoosiwa ontta wuusurukha, ila otule ahinkhupalelaaye oniiyana paathuli. 17 Alama epi enttela owaalokoza apale anikikhupalaaye miiyo: khwa nzina laka aniikara masheethwani, anlawa attakhule luuka pheeya, 18 ankhola nyookha na onywa amali ya wuula, ila khuhiwaaretti hatha etthu na owaattheela atthu makhono khuvona.”
Yinsa oneetta pinkuuni
19 Paata ya owooza mattakhuzi apale, Mbwana Yinsa khuweziwa pinkuuni khwiikhala nkhono nlume wa Nluku. 20 Aphano anakhiyoni apale khulankha khulawa olaleya phantte zooshi, Mbwana aari owaawuni ahakikhaka mattakhuzi aya na alama zaari owaalottaaye.