1-2 Abrame baanya bulumakao, sipisipi, meme, dongi, silipa, golopi, dupa longo sia. Paraonya kalai akali dupame pena lateaminopa, Abrame baanya etanengepi, Lotepi, pinjupi, dupa pitaka lanyoo Injipi yakinao Negepe yuu dokonya peami. 3 Negepe katao, yuu mendenya pata, mendenya pata pyoo, taono Betelepi, taono Aiipi kaina wamba kateamo dokonya pyakameami. 4 Wamba kana toko piamo dokonya Kamongo lao mambo pia.

5 Lotenya bulumakao, sipisipi, meme, dongi, kalai enda akalipi, baanya enda wanepi, dupa longoaka kateami. 6 Kateaminopa, yuu dokonya tata longo doko pitaka tole katapenge nanjia. 7 Dopa piamosa, Abrame, Lotepanya kalai akali yangolapo imbu kaeyapae sakatea. Gii dokopa, Kenane tangepi, Peresa tangepi, dupa yuu dokonya paleamiaka.

8 Dokonyana, Abrameme Lote lamaiyoo, “Nalimba tange etetena, nalimbanya kainanya imbu kaeyapae nasina, dee embanya kalai akalipi, nambanya kalai akalipi, dupanya kainanya imbu kaeyapae nasinaka. 9 Yuu andake waka nasilyape? Nalimba tale pimbana. Emba kingi koeyatena pateno kandao doko, namba kingi tolaetena patoo. Emba kingi tolaetena pateno kandao doko, namba kingi koeyatena patoana” lea. 10 Dopa lateamopa, Lote baa kandao aowali latala, Jodane duu taono Soa singi dokaita yuu lama-lama auu petae siamo doko kandea. Kamongome Sodomo Gomora koeyala naeyamopa, yuu doko Kamongonya ee jepae, dee yuu Injipi yale sia. 11 Loteme yuu doko nyepala, baa niki pyakaenge dokaita pea. Dopa petala, akali dolapo tale piambi.

12 Abrame baa Kenane kateamopa, Lote baa Jodane duu lama-lama taono singi dupanya Sodomo makisa, sele anda petala katea. 13 Dokopa, Sodomo tange endakali dupame Kamongonya enombanya mana etete koeyapae dupa minao, baa maka pisiami.

14 Lote pateamopa, Kamongome Abrame lamaiyoo, “Emba kalyeno dosa katao, kingi koeyatenapi, tolaetenapi, niki pyakaengesapi, niki pambengesapi, kandao aowali laa. 15 Yuu kandeleno dokaita pitaka nambame embapi, embanya mandipaenya mandipae dupa etete ditu. 16 Nambame embanya mandipaenya mandipae dupa pitaka yuu dakenya yuu kunuma-pipa kapa pena lasoto. Endakali mendeme yuu dakenya yuu kunuma itaki pingima-tamo doko, embanya mandipaenya mandipae dupa itaki pyatamiaka. 17 Nambame yuu dokaita pitaka emba dilyona, kandao aowali laa” lea. 18 Dopa lateamopa, taono Ibrone dokonya, akali Mamarenya lepa ita balo makisa dokonya, sele anda petala, Kamongonya kenge lao, kana toko mende pia.