1  Luku 5:29-30Takisa nyingipi, koo pingipi dupa Jisasa katea dokonya pii salanya tengesa epeami. 2 Dopa piaminopa Parasipi, Mosesanya loo mana nyepaepi, dupame mumu lao, “Akali dakeme endakali koo pingi dupa yaka ipaminona lao lanyetapu, dupa-pipa nee nao pilyamona” leami.

3 Dopa leaminopa Jisasame kongalimi dokaita lamaiyoo, 4  Matyu 18:12-14“Akali mendenya sipisipi 100 katata dokonya mendai alu pitamopa, baame sipisipi 99 dutupa endakali napalenge yuu mendasa katasetala, mendai alu pita doko kutao pupala, kandao nyepalaka kaeyala naeyatape? 5  Kutao nyepala, eteke pyao nyoo lataiyanya soo 6  andaka ipupala, baanya kaita miningipi, patali makepi, dupa epena latala lamaiyoo, ‘Nambanya sipisipi mende alu pipumu doko kutapala kandao nyepelyona, nyakama namba-pipa eteke pyao katamana’ lata. 7  Dopaka pyoo, endakali tolatae, dee mona kapilyala naeyapenge 99 dutupa kalyaminopa, kaiti-kisa auu kaeyapae singiaka doko, endakali koo pingi mendai mona kapilyilyamopa, kaiti-kisa auu kaeyapae andake mende singina lao nambame nyakama langilyona” lea.

8  “Enda mendenya silipa muni akalita setenge dokonya mendai alu pitamopa, baame lama kaiyepala, andaka potoma polao, kutakondape pyoo kutao muni doko nyepalaka kaeyala naeyatape? 9  Kutao nyepala, baanya kaita miningipi, patali makepi, dupa epena latala lamaiyoo, ‘Nambanya silipa muni mende alu pipumu doko kutapala kandao nyepelyona, nyakama namba-pipa eteke pyao katamana’ lata. 10  Dopaka pyoo, endakali koo pingi mendai mona kapilyilyamopa, Gotenya enjele dupame auu kaeyapae andake nyingimana lao nambame nyakama langilyona” lea.

11 Dokopa Jisasame lao pituu, “Akali mendenya wane ane lapoma mandenge. 12  Wane kole dokome baanya takange doko lamaiyoo, ‘Apane, embanya muni oapipi namba nyepenge dupa mokosoo dii’ lea. Dokopa takangeme baanya oapi dupa wane dolapo mokosoloo pyakamaiya. 13  Yuu gii kuki pateamopa, wane kole dokome baanya muni oapipi dupa pitaka nyoo, yuu londati mendenya pao katea. Dokonya katao baanya muni oapipi dupa luiyao pyoo nepea. 14  Baanya muni oapipi dupa pitaka pyoo nepao etapeamopa, baa katea yuu dokonya lopo andake mende sia. Dopa piamopa baa tee pyao daa jia. 15  Daa jiamosa, yuu dokonya tange akali mendenya kendemane katatoo lao pea. Pateamopa akali yuu dokonya tange dokome baanya mena dupa nee maiyoo kalya pena lea. 16  Nee maiyoo kateamopa, mename tupaita imbu neami dupa baa nao tiaka kaeyapu laka lao masiamopa, mendeme baa nee namaiyami. 17  Dokopa baame masepae nyepala lao pituu, ‘Nambanya takangenya kalai akali longo dupa nee kakana sina nao kataminopa, namba lopome kumilyo. 18  Dokonya namba sakatatala, nambanya takange kalyamo dokonya pupala baa lamaiyoo, “Apane, embanya enombanyapi, kaiti-kisa katenge dokonya enombanyapi, nambame koeyatapu. 19  Dokonya namba epe daana, indupa pituu namba embanya ikiningina laa naeyatale, namba embanya kalai akali dupanya mende joo kata lape” latoana’ lao masia. 20  Dopa lao masetala, baa sakatatala baanya takange doko katea dokonya pea. Baa kuki omosale epeamopa, baanya takangeme kandatala kondo kaeya. Kondo kaeyapala, baa alo pyao pao wane doko mangenya kopinyetala nunu pia. 21  Dokopa wane dokome baa lamaiyoo, ‘Apane, embanya enombanyapi, kaiti-kisa katenge dokonya enombanyapi, nambame koeyatapu. Dokonya namba epe daana, indupa pituu namba embanya ikiningina laa naeyape’ lea. 22  Dopa leaka doko, takangeme baanya kalai akali dupa lamaiyoo, ‘Nyakamame yonge pee londe etete epe doko nyoo ipupala baanya pyakamaiyepa. Baanya kingi dokonya riŋi mende pisakamaiyepa. Baanya mokonya moko pee mende pyakamaiyepa. 23-24  Nambanya wane dake kumiamoaka doko, indupa saka katalame-lamo. Baa alu piamoaka doko, indupa kandao nyepelyona, naima nee nao mona yaepao katamana, kao ŋaŋa kendatae doko nyoo ipupala pyao yangakamaiyepa’ lea. Dokopa dokaita tee pyao mona yaepao kateami.

25  “Dopa pyoo kateaminopa, akali dokonya ikiningi mupa doko eenya katao andaka tengesa epeamopa, musiki pyao, danisa lao kalyuiyamino sema epea. 26  Ipupala baame kalai akali mende epena latala, aipuma dopa pyoo kalyamipi lao tipa pia. 27  Dopa leamopa kalai akali dokome baa lamaiyoo, ‘Embanya kaiminingi doko ipamo. Baa kenda mende kandao nyala naeyao auu pyoo pilyimupa, embanya takange dokome baa lanyepala, kao ŋaŋa kendatae doko pyao yangakamaiyomona’ lea. 28  Dokopa wane mupa doko imbu kaeyapala andakote napatoo lao masia. Dopa lao masiamosa, baanya takange doko kamaka pyakalyetala, baa andakote epena lao pii andiki pyoo lamaiya. 29  Dopaka doko, wane dokome baanya takange dokonya pii yanu pyakamaiyoo, ‘Embanya piipi mende nambame nepala naeyao, ee kana longo embanya kalai pyakao katenge. Dopa pyekelyopa, embame meme ŋaŋa mende nambanya kaita miningi dupa-pipa mona yaepao yangao nalapa lao yuu mendaipi mende nandingi. 30  Dopaka doko, embanya ikiningi dakeme embanya oapi dupa pitaka enda muni nyoo akali nyala paenge dupa-kisa etasetakala ipumupa, embame kao ŋaŋa kendatae doko pyao yangakamaiyene-lamona!’ lea. 31  Dokopa takangeme baa lamaiyoo, ‘Apea, emba nambapa koteaka lao tole katenge. Nambanya oapi dupa pitaka embanyaka silyamo. 32  Embanya kaiminingi kumiamoaka doko indupa saka kalyamo. Baa alu piamoaka doko indupa kandao nyepelyo. Tenge dokonya mona yaepao auu kaeyapae nyepenge jipyanya nyilyamanona’ leana” lea.