1 Jisasame baanya disaipolo dupa lamaiyoo, “Yuunya kamongo mendenya oapi dupa isakamaingi akali mende katea. Isakamaingi akali dokome muni akipi dupa pyoo nepa-nepa pyoo kalyamona lao, baa-kisa tenge setao pii mende minao yuunya kamongo doko katea dokonya epeami. 2 Ipupala lamaitiaminopa, yuunya kamongo dokome baanya oapi dupa isakamaingi akali doko epena latala lamaiyoo, ‘Emba-kisa tenge setaminopa silyo datupanya embame pii mende latepe? Indupa pituu embame nambanya oapi dupa isakala naeyalapenona, embanya isingi kalai doko dopa pyoo pipuna lao pepanya pyapala peape’ lea. 3 Dopa leamopa isingi akali dokome dapa lao masia: ‘Nambanya akali andake dokome nambanya isingi kalai doko napyale lao namba watalumu. Ee amenge kalai doko pyaanya namba-kisa kyeto nasingi. Nambame mende-kisa tee laanya elya kaengena, nambame aipa pitoo? 4 Nambanya isingi kalai doko tange nyetamopa, endakali mendapuame nyakamanya andaka dupanya namba lanyoo pataminopana, nambame kalai mende pitoana’ lao masia. 5 Dopa lao masetala, baame yuunya kamongo dokonya yanu singi akali dupa mendai-mendai lao epena lea. Akali wambao epea doko lamaiyoo, ‘Nambanya akali andake dokonya emba-kisa yanu akipate silyape?’ lea. 6 Dopa leamopa akali dokome lao pituu, ‘Namba-kisa wele jatamu 100 yanu silyamona’ lea. Dopa leamopa isingi akali dokome baa lamaiyoo, ‘Embanya yanu singi pepa dake nyepala, yapa isa pitipala, 50 silyamona lao pepa pyaa’ lea. 7 Maitakao akali mende epea doko lamaiyoo, ‘Emba-kisa yanu akipate silyape?’ lea. Dopa leamopa akali dokome lao pituu, ‘Namba-kisa wita beke 100 yanu silyamona’ lea. Dokopa isingi akali dokome baa lamaiyoo, ‘Embanya yanu singi pepa dake nyepala, 80 silyamona lao pepa pyaa’ lea. 8 Isingi akali koo doko waa katea dokonya, baanya akali andake dokome baa kenge minalyia. Yuu dakenya ikiningi dupame etete waa katao dokaitanya tata dupa-kisa mana miningima. Tii pipae dokonya ikiningi dupame dopaka pyoo waa nakatengema. 9 Nambame nyakama langilyo: Nyakama kumataminopa, endakali kaita minao nyetami dupame sele anda kataowaka katenge dupanya nyakama lanyetamina, muni koo dupame endakali kaita minao nyalapape.

10 “Kuki mendalapo isina lelyamoli pyoo isingi endakali dokome, longo mendapu isina lelyamoli pyoo isingiaka. Kuki mendalapo isoo katao minakasingi endakali dokome, longo mendapu isoo katao minakasingiaka. 11 Nyakamame yuunya muni dupa isalapape leali pyoo isala naeyatamino doko, muni angi dupa apimi isalapale lao dita? 12 Nyakamame endakali waka mendenya oapi dupa isakalapape latali pyoo isakamaiya naeyatamino doko, oapi nyakamanya latae dupa apimi nyakama dita? 13 Matyu 6:24Kalai akali mendeme kamongo lapomanya kalai pyakamaiya naeyapenge. Lapomanya kalai pyakamaitamo doko, baame mende doko maka kaeyapala, mende doko auu kaeyata. Daa-tamo doko, mende doko mona setapala, mende doko maka kaeyata. Dopana, nyakamame Gotepa, munipa dolapo lapotanya kalai pyakamaiya naeyapengena” lea.

14 Parasi dupa muni putiti kaengema dokonyana, Jisasame pii lea dutupa pitaka sepala, baa lamba lao gii kaeyami. 15 Dokopa baame dokaita lamaiyoo, “Nyakama tolatae kalyamanona lao endakali dupanya enombanya lengema. Dopaka doko, Goteme nyakamanya mona dupa kandenge. Endakalinya enombanya auu petae-lamo lao lalyingima dupa Goteme kandatala myuku kaenge.

16 Matyu 11:12-13“Mosesanya loo dupapi, propeta dupanya pii dupapi, dupa lamaiyoo pao, Jone kateamo gii dokonya tuu leami. Jone kateamo gii dokonya pituu, Gotenya kingdom dokonya wai pii epe doko lamaiminopa, endakali dupa pitakame kyeto joo Gotenya kingdom dokonya kolandelyamino. 17 Matyu 5:18Yuupa kaitipa dolapo mee petala etapengeaka doko, Mosesanya loo dupanya mendaipi mende isa napata.

18 Matyu 5:31-32; 19:9; Make 10:11-12; 1 Kor 7:10-11“Akali mendeme baanya enda doko yakinatala, waka mende nyilya dokome baa kepo kolenge. Akali mendenya enda yakinatae mende akali mendeme nyilya dokome baa kepoaka kolengena” lea.

19 “Akali yuunya kamongo mendeme yonge pee kala pepolopi, lapalapa kyeo lapae epepi, dupa pyoo katao, koteaka lao nee etete epe dupa nao katea. 20 Akali tipya Lasarusa lenge, amungimi tete-tete pipae mende koteaka lao, yuunya kamongo dokonya lome kambu dokonya pituu sepa pilyamopa, 21 yuunya kamongo dokonya nee nelya dupanya lombo, toko dokonya soo isa pelya dupa Lasarusame nao tiaka kaeyapu laka lao masingi. Dokopa yana dupame ipao amungi tete-tete dupanya pendo peta pingima. 22 Akali tipya doko kumateamopa, enjele dupame nyoo pupala, Abraame katea dosa katena leami. Dokopa yuunya kamongo doko apata kumateamopa malu piami. 23 Malu peteaminopa, baa endakali kumapae dupa katengema panda dokonya tanda andake nao katea. Dokonya katao kandalyiamopa, Lasarusa baa Abraame katea dosa, londati kateamo kandea. 24 Kandatala baame wii lao, ‘Apane Abraame, namba ita yuli dakenya tao tanda andake nelyona, embame namba kondo kaeyapala, Lasarusame baanya kingi kondeme endaki mendalapo poeyanyetala, nambanya keke dake kii nasakala epena lamaiyakapoko’ lea. 25 Dopa leamopa Abraameme lao pituu, ‘Wane, embame masepe: Emba yuunya kateeno dokopa, oapi epe dupa pitaka embame nyiinopa, Lasarusame koo dupa nyia. Dopaka doko, indupa panda dakenya baa mona yaepasimupa, emba tanda andake nyilyino. 26 Dupa pitakanya mende doko dake: Naima kalyamano panda dakepa, nyakama kalyamino panda dokopa, dolaponya kainanya kundu andake mendeme lita pyakao petae kalyamo dokonya, endakali mendapuame aetena katao nyakama kalyamino dokonya pyakaeyamana lao masetami dupame kapa pyakaeyala naeyapenge. Omotena katao naima kalyamano dakenya pyakaeyala naeyapengeakana’ lea. 27-28 Dopa leamopa yuunya kamongo dokome lao pituu, ‘Apane, dopa-tamo doko, nambanya kaiminingi yungi dutupa namba tanda andake nao kalyo dakenya ipatamina kandao katena lao, Lasarusame nambanya takangenya andaka lamaiyakala pena laa’ lao kyeto joo tee lea. 29 Dopa leamopa Abraameme baa lamaiyoo, ‘Mosesapi, propetapi dupanya pii pepa pyapae singi dupa silyamona, embanya kaiminingi dutupame pii dupa sepengena’ lea. 30 Dopa leamopa yuunya kamongo dokome lao pituu, ‘Apane Abraame, doko kapa napapomo. Dopaka doko, akali mende malunya sakatatala, dutupa katatami dokonya pao lamaitamopa, mona kapilyalaminona’ lea. 31 Dokopa Abraameme baa lamaiyoo, ‘Mosesapi, propetapi dupanya pii dupa nasetamino doko, akali mende malunya sakatatamopapi, dokaitanya masingi doko aloo napitamiakana’ leana” lea.