1 Make 7:1-23Dokopa Mosesanya loo mana nyepaepi, Parasipi dupa Jerusalema katao, Jisasa katea dokonya ipupala lao pituu, 2 “Embanya disaipolo dupa nee nalanya, kingi wasa napinya mee nelyamino doko, aipuma yumbangenya mana setapae dupa yalelyamipi?” leami. 3 Dopa leaminopa Jisasame dupanya pii yanu pyakamaiyoo, “Nyakamanya mana wambatae dupa wata-minamana latala, aipuma nyakamame Gotenya mana setapae dupa yalelyami? 4 Eks 20:12; 21:17; Lep 20:9; Diut 5:16Goteme lao pituu, ‘Embanya endangipa takangepa dolapo anda-anda semaiyoo katape’ lea. Goteme pii mende apata lao pituu, ‘Endakali mendeme baanya endangi takangepi mende pii koo latamo doko, baa pyao kumasepengena’ lea. 5 Dopa leaka doko nyakamame lao pituu: ‘Endakali mendeme baanya endangi takangepi mende lamaiyoo, “Nambame emba oapi dipenge dupa pitaka Gote maipengena latae silyamona” latamo doko yakana’ lengema. Dopa lelyamino dokome, baanya endangi takangepa dolapo anda-anda semaiya naena lao nyakamame daa lengema. 6 Nyakamanya mana wambatae dupa wata-minamana latala, Gotenya mana setapae doko mee joo nepengema. 7 Nyakama mana tolatae miningi manemane pingima dupa-pipa makande pyokondape pyoo Aisaiyame dapa lea: 8 Ais 29:13‘Akali tata dakeme pii lelyamino dupame namba kalyo dokonya tengesa ipao anda-anda singingima. Dopaka doko, dokaitanya mona dupa etete waka palengema. 9 Endakalinya mana setapae dupa mana lelyamino dokome, dokaitame namba kiningi mambo pyala naengemana’ lapae silyamona” lea.

10 Dopa latala Jisasame endakali kambu doko baa katea dosa epena latala lamaiyoo, “Nyakamame pii dake sepala masokondape pyepape: 11 Endakali mendenya nenge-kaita dopale mende penge dokome baa kaimala pisala naenge. Endakali mendenya nenge-kaita dopale mende pyakalyilya dokome baa kaimala pisingina” lea. 12 Dokopa baanya disaipolo dupa ipupala baa lamaiyoo, “Parasi dupame embanya pii doko sepala imbu kaelyamino doko embame kandelyepe?” leami. 13 Dopa leaminopa Jisasame yanu pyao, “Nambanya Takange kaiti-kisa katenge dokome ee waingi pokala naeyamo dupa pitaka pingitaka yukuta. 14 Luku 6:39Dopa pitana, nyakamame Parasi dupa katena kaeyalapape. Dokaita lenge monda dupame lenge monda yango kii miningima dopale. Lenge monda mendeme lenge monda yango mende kii minatamo doko, lapota yuli mendenya pyakatambina” lea.

15 Dopa leamopa Pitame baa lamaiyoo, “Embame kongali laleno dokonya tenge doko naima langi” lea. 16 Dopa leamopa Jisasame lao pituu, “Nyakamame apata masala naelyamipi? 17 Dopale mende nenge-kaita pelya doko inginya soo kamaka epenge doko nyakamame masala naelyamipi? 18 Matyu 12:34Endakali mendenya monanya palenge doko nenge-kaita pyakalyingi dokome baa kaimala pisingi. 19 Monanya paliu pyakalyingi dupa, masingi koopi, endakali pyao kumasingipi, kepo kolengepi, endapi akalipi nyelenyele paengepi, pake nengepi, endakali mende sambo lao kotimi lengepi, lao nepengepi, dupa. 20 Mana dopale dupame endakali dupa kaimala pisingi. Dopaka doko, endakali mendeme kingi wasa napinya mee nee nelyamo dokome baa kaimala pisala naengena” lea.

21 Make 7:24-30Jisasa baa yuu doko yakinatala, Taeyapa, Saidonepa dolaponya yuu sia dupanya pea. 22 Peamopa, Kenane tange enda mende yuu dokonya pituu ipupala, puu lao baa lamaiyoo, “Akali Andake, emba Dapita Ikiningi. Imambu koo mendeme nambanya wanenge doko etete koeyasilyamona, embame namba kondo kaeyapoko” lea. 23 Dopa leamopa Jisasame yanu pyao pii mende baa lamaiya naeya. Dokopa baanya disaipolo dupa ipupala kongo lao baa lamaiyoo, “Enda dakeme wii latae katao naima watao epelyamona, embame baa pena laa” leami. 24 Dopa leaminopa Jisasame pii yanu pyao, “Israele dupa sipisipi alu petae joo kalyamino dupanya iki Goteme namba puu leana” lea. 25 Dopa leamopa, enda doko ipao baa katea dosa luma lakapala, “Akali Andake, embame namba nisepoko” lea. 26 Dokopa Jisasame baa lamaiyoo, “Wanenya nee dupa nyepala, pyale lao yana dupa maitamopa auu napitana” lea. 27 Dopa leamopa enda dokome lao pituu, “Akali Andake, doko kiningiaka lelyeno doko, yana tange dokonya nee kuku kakanapi tokonya isa kopo lelya dupa yana dupame nyoo nengemana” lea. 28 Dopa leamopa Jisasame baa lamaiyoo, “Enda, embame namba tungi pyakondape petala, nambame pyakalapenona lao masilyinoli pyekelyona” lea. Dopa lea gii dokopaka, baanya wanenge doko auu pia.

29 Jisasa baa yuu doko yakinatala, Galali pete lemba dokonya-kaita lalyoo manda mendenya pupala petea. 30 Peteamopa endakali kambu andake mendapuame endakali moko takyepaepi, lenge mondapi, muumaapi, kingi mokopi wuanga petaepi, waka yainame pyapaepi dupa nyoo ipao, Jisasanya moko setea dosa setapa piaminopa, baame yaina dupa pitaka mee jakamaiya. 31 Dokopa muumaa dupame pii lao, kingi mokopi wuanga petae dupa tolao, moko takyepae dupa kaita paeyao, lenge monda dupa lenge auu pyoo tao piaminopa, endakali kambu dupame walu lao kandatala, Israelemanya Gote doko kenge minalyoo mambo piami.

32 Make 8:1-10Dokopa Jisasame baanya disaipolo dupa epena latala lamaiyoo, “Endakali kambu dake yuu gii tepoma namba-pipa katamanopa, nee napenge nasilyamo dokonya, nambame dakaita kondo kaelyo. Nee nanao andaka pena lato doko, kaitinisa laowambe lapae setamina, mee napena lao masilyona” lea. 33 Dopa leamopa baanya disaipolo dupame baa lamaiyoo, “Endakali napalenge yuu dakenya naimame breta anja-tae nyepala, endakali kambu andake dake nao tiaka kaena maimape?” leami. 34 Dokopa Jisasame lao pituu, “Nyakamanya breta akipate silyape?” lea. Dopa leamopa dokaitame lao pituu, “Breta kalange-pipa, pisa yakane kuki mendatupa-pipa silyamona” leami. 35 Dopa leaminopa, baame endakali kambu dupa isa petena lea. 36 Dopa latala, breta kalange dutupapi, pisapi dutupa nyepala, Gote yaka pilyino latala konjia. Konjepala baanya disaipolo dupa maiyamopa, disaipolo dupame endakali kambu doko mokosoo maiyami. 37 Maiyaminopa, endakali dupa pitakame nao tiaka kaeteaminopa, konjepae kakana sina kaeyami dupa disaipolo dupame nyoo baseketa kalange tumbasiami. 38 Enda wanepi dupa itaki napyao, akali tausene kitomendeme neami. 39 Napeaminopa Jisasame endakali kambu dupa pena latala, baa sipi mendenya pyakalyetala, yuu Magadala dokonya pea.