1 Matyu 15:32-39Gii dosa mendasa endakali kambu andake mende kateami dokaitanya nee napenge mende nasia. Dopa piamosa, Jisasame baanya disaipolo dupa epena latala lamaiyoo, 2 “Endakali kambu dake yuu gii tepoma namba-pipa katamanopa, nee napenge nasilyamo dokonya, nambame dakaita kondo kaelyo. 3 Yangi dupa yuu londati katao ipumina, nee nanao andaka pena lato doko, kaitinisa laowambe lapae setamina” lea. 4 Dopa leamopa baanya disaipolo dupame pii yanu pyakamaiyoo, “Endakali napalenge yuu dakenya naimame breta anja-tae nyepala, endakali dakaita nao tiaka kaena maimape?” leami. 5 Dokopa baame disaipolo dupa tipa pyoo, “Nyakamanya breta akipate silyape?” lea. Dopa leamopa dokaitame lao pituu, “Kalange silyamona” leami. 6 Dopa leaminopa, baame endakali kambu doko isa petena lea. Dopa latala, breta kalange dutupa nyepala, Gote yaka pilyino latala konjia. Konjepala baanya disaipolo dupame endakali dupa mokosoo maina lao maiya. Dokopa baanya disaipolo dupame endakali kambu doko mokosoo maiyami. 7 Dokaitanya pisa yakane kuki mendatupa apata siaka. Jisasame Gote yaka pilyino latala dutupa apata mokosoo maina lea. 8 Maiyaminopa, endakali dokaitame nao tiaka kaeteaminopa, konjepae kakana sina kaeyami dupa disaipolo dupame nyoo baseketa kalange tumbasiami. 9 Akali nee neami dupa tausene kitomendepi mendeme neami. Napeaminopa Jisasame dokaita pena lea. 10 Endakali dokaita pena lalu petala, baanya disaipolo dupa-pipa sipi mendenya pyakalyetala, yuu Dalamanuta dokonya peami.

11 Matyu 12:38-39; 16:1-4; Luku 11:29Luku 11:16Dokopa Parasi dupa ipupala, Jisasa-pipa tee pyao pii yanda piami. Dupame baa makande pyoo, kaiti-kisa-tae mirakolo mende kandamana pina leami. 12 Dopa leaminopa Jisasa mona kenda kaeyapala lao pituu, “Aipuma endakali indupa palelyamino dupame mirakolo mende kandamana nambame pii lelyami? Nambame nyakama kiningi langilyo: Mirakolo mende nakanjaminona” lea. 13 Dopa latala baame dokaita yakinatala, disaipolo dupa-pipa sipinya pyakalyetala, endaki pete dokonya omotena peami.

14 Matyu 16:5-12Disaipolo dupame breta nyoo napenya, kame sepala ipateaminopa, sipi dokonya breta mendai iki sia. 15 Luku 12:1Dokopa Jisasame dokaita kyeto joo lamaiyoo, “Parasipi, Erotepi dupanya yisa*Yisa doko palaonya taelyamopa, breta doko andenge. Dopaka pyoo, Parasipi, Erotepinya koo pingi mana dupa taelya dokome, endakali longo-kisa andinyilyamopa, koengemana lao yisa-pipa Jisasame dupa makande pia-pyaa. dupame nyakama koeyasetamina, kandao kalyepape” lea. 16 Dopa leamopa nyakama-lapo laloo pyoo, “Naimanya breta nasilyamo dokonya lelyamona” leami. 17 Dopa leamino doko Jisasame kandatala dokaita lamaiyoo, “Nyakamame aipuma breta nasilyamo lao nyakama-lapo lelyami? Nyakama-kisa indupapi tatake pipae simupa masala naelyamipi? Nyakamanya mona kana jetaeyaka kalyape? 18 Jer 5:21; Esek 12:2; Make 4:12Nyakamanya lenge telyamo dokome angi kanja naelyamipi? Nyakamanya kale kalyamo dokome angi nasilyamipi? Nyakamame kame silyamipi? 19 Nambame breta yungi dutupa akali tausene yungi dupanya konjakamaiyopa, nao kakana sina kaeyamino dupa nyakamame nyoo baseketa akipatenya tumbasiamipi?” lea. Dopa leamopa dokaitame baa lamaiyoo, “12 baseketanyana” leami. 20 Dokopa Jisasame lao pituu, “Nambame breta kalange dutupa akali tausene kitomende dupanya konjakamaiyopa, nao kakana sina kaeyamino dupa nyakamame nyoo baseketa akipatenya tumbasiamipi?” lea. Dopa leamopa dokaitame lao pituu, “Baseketa kalangenyana” leami. 21 Dopa leaminopa baame dokaita lamaiyoo, “Nyakamame aipa petala masala naelyamipi?” lea.

22 Dokopa Jisasa taono Betsaida dokonya pea. Pupala kateamopa, endakali dupame akali lenge monda mende laminao Jisasa katea dokonya ipupala, Jisasame watandena lao kyeto joo tee leami. 23 Dopa leaminopa, Jisasame lenge monda doko kinginya minatae katao, yuu yakane doko yakinatala peambi. Pupala Jisasame sopokali talyinya akali dokonya lenge dolaponya pisetala, akali doko-kisa baanya kingi setea. Dopa petala, akali dokome mende kandelyepe lao Jisasame baa tipa pia. 24 Dokopa baame kandalyetala lao pituu, “Nambame endakali dupa kandapupa, ita jepae mendapu kaita paele pilyaminona” lea. 25 Dopa lateamopa, Jisasame akali dokonya lenge dolaponya baanya kingi setapala kandalyina lea. Dokopa, baanya lenge dolapo auu peteamopa, baame dupa pitaka auu pyoo kandea. 26 Dopa piamopa Jisasame akali doko andaka pena latala lao pituu, “Emba taono yakane dokonya paa naeyape. Pyomo doko taono yakane dokonya tange endakali mende lamaiya naeyapeaka” lea.

27 Matyu 16:13-20; Luku 9:18-21Jisasa baanya disaipolo dupa-pipa Sisaria Pilipae dokonya yuu yakane makisa singi dupanya peami. Pao pituu, kaitinisa Jisasame baanya disaipolo dupa tipa pyoo, “Endakali dupame namba apina lelyamipi?” lea. 28 Make 6:14-15; Luku 9:7-8Dokopa dokaitame pii yanu pyao, “Yangimi emba Jone kaimbu pingi dokona lelyamino. Yangimi emba Ilaijana lelyamino. Yangimi emba propeta wamba kateami dupanya mendena lelyaminona” leami. 29 Jone 6:68-69Dopa leaminopa baame dokaita lamaiyoo, “Endakali dupame dopa lalumino doko, nyakamame namba apina lelyamipi?” lea. Dopa leamopa Pitame baanya pii yanu pyakamaiyoo, “Emba Kraisa dokona” lea. 30 Dopa lateamopa, baa akali dokona lao endakali mende lamaiya naena lao kyeto joo daa lea.

31 Matyu 16:21-28; Luku 9:22-27Dokopa Jisasame dokaita tee pyao mana lamaiyoo, “Akalinya Ikiningi doko tanda longo napenge. Juumanya isingi akalipi, prisa mupapi, Mosesanya loo mana nyepaepi dupame baa maita maitaminopa baa pyao kumasepenge. Kumasetataminopa yuu gii tepo dokonya baa sakatatana” lea. 32 Jisasame pii dutupa lao paneamopa, Pitame baa laminao umbisale pupala, tee pyao pyalanya lea. 33 Dopa leamopa Jisasa kapilyetala, baanya disaipolo dupa kandatala, Pita pyalanya lao, “Satane, embame Gotenya masingili pyoo nalenya, endakalinya masingili pyoo lelyenona, embame namba yakinatala puu” lea.

34 Matyu 10:38; Luku 14:27Dopa latala baame endakali kambu dokopi, baanya disaipolopi, dupa epena latala lamaiyoo, “Endakali mendeme namba watao ipatoo lao maseta dokome baa tange kame sepala, baanya poko ita doko tange nyoo soo namba watao ipupenge. 35 Matyu 10:39; Luku 17:33; Jone 12:25Endakali mendeme baa lete katatoana lao masetala, baa tange pyoo nyalanya pitamo dokome baanya lete katenge doko yakinata. Dopaka doko, endakali mendeme nambapa, wai pii epe dokopa, dolapo masetala, baanya lete katenge doko yakinata dokome baanya lete katenge doko pyoo nyeta. 36 Endakali mendeme yuunya oapi dupa pitaka nyoo setao katapala, baanya lete katenge doko yakinatamo doko, oapi dupame baa aipa petala niseta? 37 Baanya lete katenge doko aki mendeme tange sambao nyeta? 38 Endakali mendeme Gote yakinatala koo pyoo kalyamino dupanya kainanya katapala, nambapa, nambanya pii dokopa, dolapo lao panalanya elya kaeyatamo doko, Akalinya Ikiningi doko enjele Gotenya latae dupa-pipa, Takange dokonya tii pipae andake dokonya pituu ipatamo gii dokopa, Akalinya Ikiningi dokome endakali doko kandatala baa elya kaeyatakana” lea.