1 बस्के अय्ते मीलोप्‍पो जगडम आंता, आ जगडमता न्‍यायम कियालय मिमेट पेनदा लोकुल्‍कुनगा होनाका विस्वासम कियवोरगा होंचि न्‍यायम कियाना हिम्मत बारि कींतिर? 2 पेनदा लोकुल्‍क आकिर वेलाते दुनियाता न्‍यायम कींतुर, इद मीक एरपाट हिल्‍लेना? मिमेट पूरा दुनियाता न्‍यायम कींतिर अय्ते, इव सिन्‍ना-सिन्‍ना पोल्‍लेना न्‍यायम कियानालायक हिल्‍लिरा? 3 मिमेट पेनदा दूतनगुडा न्‍यायम कींतिट इंचि मीक एरपाटे मंता. अय्ते रोजता पिस्वरते जर्गानव सिन्‍ना-सिन्‍ना पोल्‍लेन न्‍यायम मिमेट किया परिरा? 4 मीवा लोप्‍पोगिंटा इल्‍हा जगडाल्‍क मनानय्ते, बोर अय्ते कलिसियाता पोल्‍लें बतले तेळियवोर मंतुर, असंटोरगा न्‍यायम किया वेहालय बारि दांतिर? 5 मी विस्वासुल्कुना नड्‍डुम न्‍यायम कियानालायक तेल्विगल्‍लोड वरोरगुडा हिल्‍लोरा? मीक सिग्गु वायगोम इंचि इल्‍हा इंचेके मंतन. 6 वरोर विस्वासि इंकावरोर विस्वासिंक अड्‍डम न्‍यायम कियालय पंचादितगा दांतोर, अदगुडा विस्वास कियवोरा मुन्‍ने. 7 निजम इत्‍ते मीलोप्‍पो लोल्‍लिं कियमळे तप्पु आंद. दानकन्‍ना अन्‍यायम ओर्सकुनमळ बेस आयोना? नुकसानतुन ओप्कुनमळ बेस आयोना? 8 अल्हा कियवा, मिमेट तप्पु कबळ कींतिर, अन्‍यायम कींतिर, अदगुडा मीवा दंटा विस्वासुल्‍कुंके कींतिर.

9-10 अन्‍यायम कियाना लोकुल्‍क पेनदा राज्येमते वारसदार आयुर इंचि मीक तेळियोना? मिमेट दोकाते अरमट. व्यबिचारम कियानोर, बोम्मांक मोळ्‍कानोर, बोगमतनम कियानोर, मांडसा मांड्‍सातोनि बोगमतनम कियानोर, मुरतळ मुरतळतोनि बोगमतनम कियानद, दोंगातनम कियानोर, आस्‍ति कियानोर, कल्‍लु उनानोर, तेराहनोर, इंकावरोन मुळाहनोर पेनदा राज्येमता वारसदार आयोर. 11 मुन्‍ने मीवा नड्‍डुम इच्‍चुर इल्हे मत्‍तिर. गानि मिमेट येसु किरिस्‍तुना पोरोलते आनि पेनदा आत्माते नोर्कुंचि, पवित्र आसि नीतिमंतुल्क आतिर.

12 नना बतलन्‍ना किया वच्‍चु, गानि अव अन्‍नि पायदातव आयों. नना बतलन्‍ना किया वच्‍चु, गानि नना अवुना कय्‍दा हिळु मन्‍नोन. 13 गाटो पीटाहाटीं, पीर गाटोताहाटीं मंता इंचि मिमेट इंतिर, गानि पेन इव रोंडुन इंका नासडेम कींता. मेंदुल बोगमतनम कियालय आयो सामिनाहाटीं मंता, सामि मना मेंदुलताहाटीं मंतोर. 14 पेन दाना ताकततोनि सामिन हामुरताल जीवाते तेहता, अल्‍हेने मनाकुनगुडा हामुरताल जीवाते तेहंता. 15 मीवा मेंदुल्क किरिस्‍तुना मेंदुल्ता उंदि बागाल्क आंदुं इंचि मीक एरपाट मंता गदा! एरपाट मत्‍तस्के नना अवुन ओसि बोगमदाना मेंदुललेसीं कीकाना? बस्‍केने किय्योन. 16 बोर अय्ते बोगमदानतोनि मींडंतोर, ओर दानतोनि उंदि मेंदुल आंतोर. “ओर इव्वुर उंदि मेंदुल आंतुर” इंचि दर्मसास्‍त्रमते रासि मंता.✡मरकुस 10:8; उत्‍पत्‍ति 1:27 17 गानि बोर अय्ते सामिनतोनि उंदि आंतोर, ओर ओनतोनि आत्माते उंदि आंतोर. 18 व्यबिचारमताल लक्‍कु मंटु. मेंदुल्ता पलाताल वायना पापाल्क अच्‍चोर बतल किय्यों, गानि बोर अय्ते व्यबिचारम कींतोर, ओर ओनादे मेंदुल्क अड्‍डम पापम कींतोर. 19 मीवा मेंदुल पवित्र आत्माता गुळि आंद, अद पेनदाहेंदाल मीलोप्‍पो वासि मनंता, ई मेंदुल मीवद आयो, इंचि मीक तेळियोना? 20 बारित्‍ते पेन मीकुन दरा दोस्‍सि अस्‍कुत्‍ता, अदुनहाटीं मिमेट मीवा मेंदुलताहेंदाल दाना महिमा कीम्‍टु.