1 अव पोल्‍लेने बारेमते मिमेट नाक रासि मत्‍तिर. नना मीक वेहासेके, मांडसा बदन्‍ना मुरतटुन इट्‍टाकोंटेन ओनाहाटीं बेस मनंता. 2 गानि व्यबिचारम जर्गामन्‍नि इंचि हरेक मांडसक मुत्‍तो गावाले, हरेक मुरतळ्‍क मुय्दो गावाले. 3 मुय्दो ओना मुत्‍तोना हक्‍कु पूरा कियमळ गावाले, मुत्‍तो दाना मुय्दोना हक्‍कु पूरा कियमळ गावाले. 4 मुत्‍तोंक दाना मेंदुलपोर्रो अदिकार हिल्‍ले गानि दाना मुय्दोंक अदिकार मंता, अल्‍हेने मुय्दोंक ओना मेंदुलपोर्रो अदिकार हिल्‍ले गानि मुत्‍तोंक मंता. 5 अदुनहाटीं मिमेट वरोंक-वरोर अलग मनमट. गानि कोन्‍नि रोजकु पारतना कियालय अलग मनकोम इंचि मिमेट इव्वुर इनकुत्‍ते, अलग मंटु. दाना पजा मर्रा कलियसि मंटु. बारित्‍ते, कुदता मनसुन आपकुना परवस्के देय्यम मीकुन पट्‍टुने अरहालय हूळंता. 6 नना वेहानद आदेस आयो, गानि अल्हा कीते मीके बेस मनंता. 7 अंटोर लोकुल्‍क नावालेसीं मनागोम इंचि नाक अनपिच्‍चंता. गानि हरेक मनकंक पेनदाहेंदाल अलग-अलग वरम दोर्किस मंता, बोनको बदो तीरनद, इंका बोनको इंकुंदि तीरनद वरम दोर्किस मंता.

8 मरमिं आयवोर्कुंक आनि मुंडा मोस्तवुंक नना वेहसेक मंतन, ओर नावालेसीं मरमिं आयाकुंटा मत्‍तेने ओराहाटीं बेस. 9 गानि ओरगिंटा कुदता मनसुन आपा पराकोंटे मरमिं आयिर. बारित्‍ते मेंदुल्ता इच्‍चा आसि तनलाळसेक मनना दानकन्‍ना मरमिं आयमळ बेस.

10 गानि बोरां अय्ते मरमिं आतां, ओर्क नावद आयो, सामिना आदेस मंता, मुत्‍तो दाना मुय्दोन होळ्‍सा मनि. 11 अदगिंटा होळसानय्‍ते, अद इंकावरोनतोनि मरमिं आयाकोंटेन मंदना, हिलाकोंटे दाना मुय्दोनतोनि मर्रा सांतिते कलियसि मंदना. मुय्दो ओना मुत्‍तोन होळसिया मनि.

12 इंदके कळमतोराहाटीं नना वेहसेक मंतन, पेन आयो. बोनदन्‍ना विस्वासि दादाना मुत्‍तो पेनदुन विस्वासम किय्‍यो, गानि दानकु ओनातोनि मनालय पसंद मत्‍ते, ओर दान होळ्‍सा मनि. 13 अल्‍हेने ओक्‍कला बदन्‍ना विस्वासि अक्‍कना मुय्दो विस्वासम किय्योर, गानि ओर दानतोनि कूस मंतोर, अय्ते अद ओन होळ्‍सा मनि. 14 बारित्‍ते अविस्वासि मुय्दो, विस्वासम कीता ओना मुत्‍तोनतोनि मंचि पवित्र आतोर. अल्‍हेने विस्वासम कियवा मुत्‍तो, विस्वासम कीता दाना मुय्दोनतोनि मंचि पवित्र आसि दांता. अल्हा आयाकुंटा मंचि मते मीवा पिलाल्क पवित्र आयाकोन्‍नेर, गानि ओर इंदके पवित्र मंतुर.

15 अय्नागानि अविस्वासि मुत्‍तो आयि मुय्दो आयि ओक्‍कला ओर होळसंतन इनानय्ते होळसिरकांटी. इद पोल्‍लेतुन विस्वासम कियाना दादल आयि अक्‍कल आयि आपामन्‍नि. बारित्‍ते, पेन मनाकुन सांतिते पिसालय केयता. 16 ए मुरतटुना,*ए मुरतटुना इग्‍गे दीना अर्तम, विस्वासम कीता मुत्‍तो. नीवा विस्वासम कियवा मुय्दोन पिसागोटंतिन इंचि नीकु बतल एरपाट? ए मांड्‍सातुना,†ए मांड्‍सातुना इग्‍गे दीना विस्वासम कीता मुय्दो. नीवा विस्वासम कियवा मुत्‍तोन पिसागोटंतिन इंचि नीकु बतल एरपाट?

17 गानि बल्हा अय्ते मीकुन सामि निलाहतोर, बल्हा अय्ते मीकुन पेन केयता, अल्‍हेने मिमेट मंटु. इद अन्‍नि कलिसियाने नावा नियम आंद. 18 अद बल्हा इत्‍ते, पेनदुन विस्वासम कियाका मुन्‍ने कतना कीसि मनानय्ते, अदुन मकिच्‍चा मनि. पेनदुन विस्वासम कियाका मुन्‍ने कतना कियाकोंटा मत्‍ते, ओर कतना कीकुन्‍ना मनि. 19 कतना कियाना, कियाकुन्‍ना बतल आयो, गानि पेनदा आदेसते ताकमळे पेद्‍दा पोल्‍ले आंद. 20 हरेक मनकन ओर बल्हा मननेंके पेन ओन केयतनो, अल्‍हेने ओर मनागोम. 21 निमे गिंटा दास आसि मत्‍तस्के पेन केयते, निमे अदुना पिकिर कियमा. गानि अव्टेटाल इळबळाना मोका वाते, दाना पायदा एता. 22 बारित्‍ते, दास आसि मत्‍तस्के निमे सामिन विस्वासम कीतिन, अव्टेटाल इळबळतिन. इळबळतस्के सामिन विस्वासम कीतिन अय्ते किरिस्‍तुना दास आतिन. 23 पेन मीकुन दरा दोस्‍सि अस्‍कुत्‍ता, दानहाटीं मनकालोरा दास आयमटु. 24 विस्वासुल्‍कुनिटा! पेन मीकुन केयतस्‍के बल्हा मत्‍तिरो, अल्‍हेने दानतोनि कलियसि मंटु.

25 मरमिं आयववुना बारेमते सामि नाकु बतले आदेस हिया हिल्‍लोर, गानि नावा मनसुना पोल्‍ले मीक वेहसेक मंतन. सामिना दयाहेंदाल, नना दान बरोसा कींतन. 26 इंदकेटा तकलिपकुनाहाटीं मनकल बल्हा मंतोर अल्‍हेने मत्‍ते बेस इंचि नना इनकुंचेके मंतन. 27 नीकु मुत्‍तो मत्‍ते अदुन होळ्‍सना कोसिस कियमा, मुत्‍तो हिलाकोंटे मरमिं आयना विचारम कियमा. 28 निमे मरमिं कीकुत्‍ते बतल पापम आयो, लेय्या पेगिळ मरमिं कीकुत्‍ते अदगुडा बतल पापम आयो. अय्नागानि बोर अय्ते मरमिं आंतुर, ओरा पिस्वरते तकलिपकु वांतां. असोंटा तकलिपकुने अर्रानायो इंचि नना कोरसंतन.

29 विस्वासुल्‍कुनिटा! नना वेहानद बतल इत्‍ते, वेला तक्‍को मंता. अदुनहाटीं इंदकेटाल मुन्‍ने बोन्क मुत्‍तो मंता, ओर मुत्‍तो हिल्‍वाप मंदना. 30 अळानोर मत्‍ते, अळवोर लेहका मंदना, आनंदमते मत्‍तोर आनंदमते हिल्‍वाप मंदना, सामानकु अस्सानोर बतले हिल्‍वाप मंदना. 31 इद दुनियाते मनम बतलय्ते कींतोम दाना लोप्पेन मंदनायो. बारित्‍ते दुनियातव अन्‍नि नासडेम आयानव आंदुं. 32 मिमेट बदे पोल्‍लेते पिकिर किया मनि इंचि नना इनकुंचेके मंतन. मरमिं आयवोर पेनदुन बल्हा कूस इर्राना इंचि पेनदा पोल्‍लेना पिकरते मनंतोर. 33 गानि मरमिं आता मनकल ओना मुत्‍तोन बल्हा कूस इर्राना इंचि दुनियाता पोल्‍लेने पिकरते मनंतोर. 34 अदुनहाटीं ओरा मनसु रोंडु तीरुकुने कबळ कींता. अल्‍हेने मरमिं आयवा मुरतळ पेनदुन बल्हा कूस कियाना इंचि मेंदुल्ते आनि आत्माते पवित्र मंचि पेनदा पोल्‍लेना पिकरते मनंता. गानि मरमिं आता मुरतळ मुय्दोन बल्हा कूस इर्राना इंचि दुनियाता पिकरते मनंता. 35 नना मीवा पायदाताहाटींगे इद पोल्‍ले वेहासेक मंतन, मीकुन पसांचालय आयो. गानि मिमेट सत्‍तेमते ताकसि, उंदि मनसुने पेनदा सेवाते मंटु.

36 बोरन्‍नागिंटा, “मना मिय्यटा‡मिय्यटा एर्रा बोट्‍टु आता मिय्यड. लेय्यातनम होंचेके मंता, दाना अपमानम आयाका मुन्‍ने मरमिं कियमळ गावाले,” इंचि इनकुनानय्ते मरमिं कीसि हिय्यिरकांटी, अद पापम आयो. 37 गानि ओर ओक्‍कला मरमिं कीसि हियमळ अव्‍सरम हिल्‍ले इंचि मनसुनाल निरनायम कियानय्ते, अद दाना इच्‍चान आपापर्ते दान्क मरमिं कियवा बेसे कीतोर. 38 बोर अय्ते ओना मिय्यटा मरमिं कीतोर, ओर बेसे कीतोर. अल्‍हेने बोर अय्ते ओना मिय्यटा मरमिं किया हिल्‍लोर ओर इंका बेसे कीतोर.

39 मुय्दो पिस्सि मत्‍तच्‍चोरजेम मुत्‍तो मुय्दोनतोनि होळसाकोंटा मनंता, गानि ओरगिंटा हायानय्ते अद बोनतोनना सामिन विस्वासम कीतोनतोनि मरमिं आया परांता. 40 गानि अद इंकावरोनतोनि मरमिं आयाकोंटा मत्‍तेने बेस इंचि नना इनकुंचेके मंतन, अल्‍हेने नावा लोप्पो मनना पेनदा आत्माता हेंदाले नना मीक वेहासेक इंचि इनकुंचेके मंतन.