1 पावरम इद मीवा लक्‍से मन्‍निकांटी. आत्माता वराल्कुन पह्काटु, बविस्यवानि वेहना वरम पहकसेकेन मंटु. 2 बारित्‍ते, तेळियवा बासाते वळ्कानोर, ओर मनकालोर्कुनतोनि आयो गानि पेनतोनि वळ्कंतोर. ओर मर्ममता पोल्‍लें पेनदा आत्माताल वळ्कंतोर, अव पोल्‍लें मनकालोर्कुंक तेळियों. 3 गानि बविस्यवानि वेहानोर, मनकालोर्कुना बक्‍तितुन बेर्सागोटालय, दैरनेम हियालय, सांतिते मनालय वेहंतोर. 4 वेरे-वेरे बासाते वळ्कानोर, ओनदे बक्‍तितुन बेर्सागोटंतोर. गानि बविस्यवानि वेहानोर, कलिसियातोरा बक्‍तितुन बेर्सागोटंतोर. 5 मिमेट अंटोर वेरे-वेरे बासाते वळ्‍कगोम इंचि नना इनकुंतन. गानि दीनकन्‍ना एक्‍को बविस्यवानि वेहमळे बेस इंचि इनकुंतन. बारित्‍ते वेरे-वेरे बासाते वेहानोर, कलिसियातोर्कुन बक्‍तिते बेर्सागोटालय ओरा बासाते वेहाकोंटे बतल पाय्दा हिल्‍ले. अदुनहाटीं वेरे-वेरे बासाने वेहानदाकन्‍ना बविस्यवानि वेहमळे एक्‍को पाय्दातद आंद. 6 विस्वासुल्‍कुनिटा! नना मिहगा वासि पेन नाक हीता पोल्‍लेन वेहकन, तेल्‍विता पोल्‍लेन वेहकन, बविस्यवानि वेहकन, कराहकन अस्‍के मीक पाय्दा आयार. अवुन होळसिसि वेरे-वेरे बासाते वेहते मीक बतल पाय्दा आयार? 7 अल्‍हेने तूरीला आनि तरास बुर्राते जीवा हिल्‍ले. अय्नागानि अवुन बरोबर नेकिचाकोंटे, बतल नेकसेक मंता इंचि बल्हा तेळियंता? 8 तूताकोमता आवाज बरोबर पेय्साकोंटे लडाइ कियालय बोर तयार आंतुर? 9 अल्‍हेने मिमेटगुडा वेरेतोर्क तेळियना पोल्‍लेते वेहाकोंटे, मीवा पोल्‍ले ओर्क बल्हा तेळियार? मिमेट वळिते वळ्कताप आंता. 10 दुनियाते बच्‍चुंगो तीरकुना बासां मंतां, गानि अर्तम हिल्‍वद बदे बासा हिल्‍ले. 11 अदुनहाटीं अद बासाता अर्तम नाक तेळियाकोंटे, नना वळ्कानोनतोनि वेरे देसेमतोन आंतन, ओर नावाहाटीं वेरे देसेमतोर आंतोर. 12 अल्‍हेने मिमेटगुडा पेनदा आत्माता वराल्‍कुने निंडिस मंतिट, अवुनाहेंदाल कलिसियातोर्कुना बक्‍ति बेर्सना कोसिस कीम्‍टु. 13 अदुनहाटीं वेरे-वेरे बासाते वळ्कानोर, दाना अर्तम वेहाना ताकत हीम इंचि पारतना कियाना. 14 बारित्‍ते, ननागिंटा वेरे-वेरे बासाते पारतना कीते, नावा आत्मा पारतना कींता गानि नावा बुद्‍दि कबळ किय्‍यो. 15 अय्ते नाक बतल कियमळ गावाले? नना नावा आत्माते पारतना कींतन, नना नावा बुद्‍दितेगुडा पारतना कींतन. नना नावा आत्माते पाटा पारंतन, नना नावा बुद्‍दितेगुडा पाटा पारंतन. 16 ओक्‍कला निमे सिराप आत्माते दन्यवाद कियानय्ते, नीवा पोल्‍ले तेळियवोर अगा उद्‍दुता मनकल आमीन इंचि बल्हा इनानुर? निमे बतल वळ्‍कतिन ओनकु तेळिया हिल्‍ले. 17 निमे अय्ते पेनदुक बेस दन्यवाद कींतिन, गानि इंकावरोना बक्‍ति बेर्सालय अद कबळ किय्‍यो. 18 मी अंटोर्कन्‍ना एक्‍को वेरे-वेरे बासाने वळ्‍कना वरम नाक मंता, अदुनहाटीं नना पेनदुक दन्यवाद कींतन. 19 गानि कलिसियातोर्कुनतोनि वेरे-वेरे बासाते पदि वेय्‍कुना पोल्‍लें वळ्कनदानकन्‍ना, ओर्क कराहलय तेळियना बासाते हेय्युं पोल्‍लें ना बुद्‍दिते वेहामळे नाक बेस. 20 विस्वासुल्‍कुनिटा! मिमेट तेल्‍विते सिन्‍ना-पिलाल्कुनालेसीं मनमट, गानि पेद्‍दा मनकालोर्कुनालेसीं मंटु. कराब पोल्‍लेने सिन्‍ना-पिलाल्‍कुनलेसीं तेळियवाप मंटु. विचारम कियमळते पेद्‍दोरालेसीं मंटु. 21 दर्मसास्‍त्रमते, “नना तेळियवा बासाने वळ्‍कानोर्कुना हेंदाल, पराया लोकुल्‍कुना तोळ्‍दाल, ईरतोनि वळ्‍कंतन, अय्नागानि ईर नावां केंजुर,” इंचि पेन वेहंता. 22 अदुनहाटीं तेळियवा बासाते वळ्‍कमळ, विस्‍वासुल्‍कुनाहाटीं आयो, गानि विस्वासम कियवोराहाटीं चिन्‍ह आंद. बविस्यवानि वेहमळ विस्वासम कियवोराहाटीं आयो, गानि विस्वासम कीतोराहाटीं चिन्‍ह आंद. 23 ओक्‍कला कलिसियातोर उंदगा जमा आतस्के, अंटोर तेळियवा बासाते वळ्कालय दल्‍गते, मीलोप्‍पो बासा तेळियवोर, अविस्वासि वायानय्ते, ओर मीकुन पागल आतुर इंचि इंतुर. 24 गानि मिमेटगिंटा तेळियना बासाते बविस्यवानि वेहते, बोरन्‍ना विस्वासम कियवोर हिलाकोंटे तेळियवोर मनकल मिहगा वासि केंजते, ओना तप्पुक ओन्क तेळियसि, ओर पापमतुन एरपाट कीकुंतोर. 25 ओना मनसुने मक्‍किस मत्‍तव पूरा दिसंतां. अदुनहाटीं ओर बोकबोर्लें अर्सि पेनदुन मोळ्‍कंतोर आनि “निजमे पेन मीलोप्‍पो मंता,” इंचि ओप्‍कुंतोर.

26 विस्वासुल्‍कुनिटा! इंदके बतल कियाना? बस्के अय्ते मिमेट जमा आंतिर, अस्‍के वरोर पाटा पारालय, वरोर कराहलय, वरोर पेनदा पोल्‍ले बैय्यरा कीसि वेहालय, वरोर वेरे बासाते वळ्कालय, वरोर वेरे बासाता अर्तम वेहालय तयार मनंतुर. इवन्‍नि कलिसियातोर्कुना बक्‍ति बेर्सनाहाटीं आयमळ गावाले. 27 वेरे-वेरे बासाते वळ्कना मते, इव्वुर हिलाकोंटे एक्‍कोते-एक्‍को मुव्वुर वरोन पजा वरोर वळ्‍किर आनि वरोर दाना अर्तम तेळियागोट्‍सि वेहिर. 28 गानि अर्तम तेळियागोट्‍सि वेहानोर गिंटा हिलाकोंटे, वेरे बासाते वळ्कना मनकल कलिसियाते चुपचाप मंचि ओना मनसुने पेनतोनि वळ्कना. 29 पेनदा कबुरतोर इव्वुर हिलाकोंटे मुव्वुरे वेहिर, कळमतोर वेहता पोल्‍लेन परिक्‍सा कीसि हूळिर. 30 गानि उद्‍दिस मत्‍तोरव्टेताल बोर्कन्‍ना अदे वेलाते पेनदा पोल्‍ले दोर्कसि अदुन वेहंतन इनकुनानय्ते, मुन्‍नेटाल वेहासेक मत्‍तोर चुपचाप उद्‍दना. 31 मिमेट अंटोर करियना, अंटोर सांतिते मंदना इंचि वरोर-वरोर बविस्यवानि वेहा परांतिट. 32 पेनदा कबुरतोर ओरा आत्मातुन ओर इनकुत्‍ताप तिरहा परांतुर. 33 बारित्‍ते पेन गळबळ कियानद आयो, सांति हियना पेन आंद. अन्‍नि कलिसियाना पेनदा लोकुल्‍क इल्हे मनंतुर. 34 कलिसियातोर जमा आतस्के मुर्ताह्क चुपचाप मंदना, बारित्‍ते अवुंक वळ्कना अदिकार हिल्‍ले. गानि कय हिळु मंदना आदेस मंता. इल्‍हा दर्मसास्‍त्रमतेगुडा रासि मंता. 35 अवुंक बतलन्‍ना करियना इच्‍चा मत्‍ते, लोन होत्‍ता पजा अव अवुना मुय्दुर्कुन पूसकियाना. बारित्‍ते कलिसियाते मुरतळ पूसकियमळ इत्‍ते सिग्गु होनना पोल्‍ले आंद. 36 बतल! पेनदा पोल्‍ले मिहगाटाले पेय्सतना? सिराप मिहागळ्के वाताना? 37 बोरन्‍नागिंटा, “नना पेनदा कबुरतोन” हिलाकोंटे, “नना पेनदा आत्मा मत्‍तोन” इंचि इनकुनानय्ते, नना मीक रासता पोल्‍लें सामिना आदेसाल्‍क आंदुं इंचि ओन्क तेळियाना. 38 गानि बोरन्‍नागिंटा इदुन ओप्कुनाकोंटे, ओनगुडा ओप्कुनमट. 39 अदुनहाटीं विस्वासुल्‍कुनिटा! बविस्यवानि वेहालय तयार मंटु, वेरे बासाते वेहते ओन आपमटु. 40 गानि अन्‍नि पोल्‍लें बेस उंदान पज्जो उंदि जर्गिंकांटी.