1 विस्वासुल्‍कुनिटा! नना मीक वेहता बेसता कबुरतुन मर्रा उंदि मल्का मति कीसि हीसेक मंतन. अद बेसता कबुरतुन ओप्कुत्‍तिर, अवने गट्‍टिगा निल्सिगुडा मंतिर. 2 नना वेहता बेसता कबुरतुन मिमेट होळसाकोंटा पीसि मत्‍ते पेन मीकुन पिसागोटंता. हिलाकोंटे मीवा विस्वासम कियमळ एर्तम आंता. 3 अदुनहाटीं अन्‍निंकन्‍ना मुन्‍ने नहगा एवता पोल्‍लेतुने मिहगा एविस्तन. अद बतल इत्‍ते, दर्मसास्‍त्रमता पोल्‍ले मत्‍ताप, किरिस्‍तु मना पापाल्कुनाहाटीं हातोर, 4 बोंदा दोस्तुर, दर्मसास्‍त्रमते रासताप मूडो रोजुने जीवातेगुडा तेदतोर.✡होसे 6:2 5 जीवाते तेदतस्‍के केपांक*केपांक इत्‍ते पतरस आंदुर. दिसतोर, पजा पन्‍नेंडु प्रेरितुल्कुंक दिसतोर. 6 अद आता पजा, हेय्युं नुह्कुंकन्‍ना एक्‍को विस्वासुल्कुंक उंदे मल्का दिसतोर. ओरागटाल वेल्‍लेटुर इदवेरदाकागुडा जीवाते मंतुर, गानि इच्‍चुर हातुर. 7 मर्रा याकोबुंक दिसतोर, दाना पजा अंटोर प्रेरितुल्कुंक दिसतोर. 8 नना नेलां निंडका मुन्‍नेन पुट्तोनलेसीं अंटोर्कन्‍ना आकिरते नाकुगुडा दिसतोर. 9 बारित्‍ते, नना अंटोर प्रेरितुल्‍कुन लोप्‍पो सिन्‍नोन आंदुन, नना पेनदा कलिसियातोर्कुन तिप्‍पल्‍क कीतोन आंदुन. अदुनहाटीं प्रेरित इनना लायकगुडा हिल्‍लेन. 10 गानि इंदके बतलय्ते मंतानो, पेनदा कुर्पाहेंदाले मंतन. अद कुर्पा नाक एर्तम आयाहिल्‍ले. नना कळमता प्रेरितुल्‍कुंकन्‍ना एक्‍को कस्‍टम कीतन. अय्नागानि निजम इत्‍ते नना किया हिल्‍लेन, पेनदा कुर्पा नावातोनि मत्‍ता, अदे कीता. 11 अदुनहाटीं नना पेनदा पोल्‍ले वेहना, ओर वेहना मोमोट अंटोरम उंदे पोल्‍ले वेहंतोम. अदुन मिमेट विस्वासम कीतिर.

12 किरिस्‍तु हातोरा लोप्पोटाल जीवाते तेदतोर इंचि मोमोट गिंटा कबुर वेहानय्ते, हातोर मर्रा जीवाते तेदुर इंचि मीवा लोप्पोटोर इच्‍चुर इंतुर. अल्हा बारि इंतुर? 13 हातोर मर्रा जीवाते तेदाकोंटे, किरिस्‍तुगुडा हासि जीवाते तेदा हिल्‍लोर. 14 किरिस्‍तु गिंटा जीवाते तेदाकोंटे, मोमोट वेहाना बेसता कबुर एर्तमे, मीवा विस्वासमगुडा एर्तमे आंद. 15 अचोने आयाका, किरिस्‍तु हातोरा लोप्पोटाल जीवाते तेदतोर इंचि मोमोट मीक वेहतोम. हातोर गिंटा जीवाते तेदाकोंटे, पेन किरिस्‍तुनगुडा जीवाते तेहा हिल्‍ले इंचि तेळियंता. अदुना हेंदाल मोमोट पेनदा बारेमते आबद्‍दम गवाइ वेहताप आंता. 16 अल्‍हेने हातोर गिंटा जीवाते तेदाकोंटे, किरिस्‍तुगुडा जीवाते तेदा हिल्‍लोर. 17 किरिस्‍तु गिंटा जीवाते तेदाकोंटे, मीवा विस्वासम एर्तम आंद आनि मिमेट इदवेरादाका पापमतेन पसांचि मंतिर. 18 अल्हा अय्ते, किरिस्‍तुन विस्वासम कीसि हातोरगुडा नासडेमताल पिसा पर्राहिल्‍लुर. 19 सिराप इद बूमिपोर्रोटा पिस्वरहाटींगे किरिस्‍तुनपोर्रो मना आसे इरते, मना गति अंटोर मनकालोर्कुंकन्‍ना एक्‍को गोसातद आयार. 20 गानि निजम बतल इत्‍ते, किरिस्‍तु हामुरताल जीवाते तेदतोर. बोर अय्ते विस्वासुल्‍क हासि होत्‍तुर, ओरव्टेटाल जीवाते तेदतोर ओरे मुन्‍नेटोर आंदुर. 21 बल्हा अय्ते वरोर मनकनहेंदाल हामुर वाता, अल्‍हेने वरोर मनकनाहेंदाल हातोर मर्रा जीवाते तेदमळगुडा वाता. 22 बारित्‍ते, आदामुन लोप्पो अंटोर हासि दांतुर, किरिस्‍तुनलोप्‍पो अंटोर जीवाते तेहमळ जर्गार. 23 हरेक मनकल वरोन पजा वरोर, मोदाला किरिस्‍तु जीवाते तेदतोर, किरिस्‍तु मर्रा वाता पजा ओना लोकुल्‍क जीवाते तेदांतुर. 24 अदुन पजा, पूरा सरकार, पूरा अदिकार आनि ताकत इव अन्‍निन किरिस्‍तु नासडेम कीसि पेनबाबाना कय्‍दे राज्येम अप्‍पजेप्‍पंतोर. अस्‍के बूमिता आकिर आयार.✡दानिय्येल 2:44 25 बारित्‍ते, किरिस्‍तु ओना पगातोर्कुन काल्कुना हिळु तायनादाका, ओर राज्येम कियमळ गावाले. 26 हामुर अन्‍निंकन्‍ना आकिर पगातद आंद, अदुनगुडा नासडेम कींतोर. 27 बारित्‍ते, पेन अन्‍निन किरिस्‍तुना काल्कुना हिळु इरता. अन्‍निन इंचि इत्‍ते, पेनदुन होळसिसि अन्‍निन इंचि बरोबर एर्का आंता. 28 अन्‍निन ओना अदिकारमते इरता पजा, पेन अन्‍निन ताकिचगोम इंचि मर्रि कुद दाना अदिकारमते आंतोर. बारित्‍ते पेने अन्‍निन ताकिचंता. 29 मर्रा जीवाते तेदाकोंटे, हातोराहाटीं येसुना पोरोलते बापतिस्मा एततुर, ओर बतल कियानुर? हातोर गिंटा जीवाते तेदाकोंटे ओराहाटीं बापतिस्मा बारि एताना? 30 बस्‍केळ्‍क मना जीवातुन बारि डेंजरते इर्राना? 31 विस्वासुल्‍कुनिटा! मिमेट मना सामि येसु किरिस्‍तुना लोप्पो विस्वासमते गट्‍टिगा मत्‍ताहाटीं, नना मीवा बारेमते पेद्‍दिरकेम वेहकुंचेके मंतन. अदुनहाटींगे नावा हामुरतुन रोज हूळसेक मंतन. 32 इपीसि सहरतगा, नना केडा जिवरासिनसोंटा मनकालोर्कुना रीतिते लडांचतन, अय्ते बतल पाय्दा आता? हातोर गिंटा तेदाकोंटे, दर्मसास्‍त्रमते रासि मत्‍ताप, “नाळि अय्ते हायानदे मंता, अदुनहाटीं तिनकोम-उनकोम,” इंचि मन्‍नेम.✡यसायाह 22:13 33 गानि हातोर मर्रा जीवाते अर्रुर इंचि इनानोरा हेंदाल दोकाते अरमट. “कराब लोकुल्‍कुना दंटा, बेस ताकानोर्कुन हेडहंता.” 34 अदुनहाटीं नीतिते ताकसि उसारते मंटु, पापम कियमट. मीलोप्‍पो बच्‍चुटुरो पेनदुन एरपाट कियवोरगुडा मंतुर, मीक सिग्गु वायागोम इंचि इद पोल्‍ले वेहसेक मंतन.

35 गानि बोरन्‍ना, “हातोर जीवाते बल्हा तेदंतोर? जीवा अरता पजा मेंदुल बल्हा मनंता?” इंचि पूसकिया परांतुर. 36 ए बुद्‍दि हिल्वोना! निमे बूमिते एदता पेळे, मुन्‍ने हासि, पजाटाल मोलियंता. 37 निमे एदतद, मोल्का आयो, पेळे आंद. अद गोह्कुना पेळे आयावच्‍चु, इंका बदाना पेळे आयावच्‍चु. 38 गानि पेन दाना इच्‍चातीर दान्क रूपम हींता. वेरे-वेरे पेडेक, वेरे-वेरे रूपम हींता. 39 गानि अन्‍नि मेंदुल्क उंदेतीर मन्‍नों, मनकना मेंदुल वेरे, जिवरासिना मेंदुल वेरे, पिट्‍टेना मेंदुल वेरे, जिम्माना मेंदुल वेरे मंता. 40 स्वर्गमते मनानोर्क मेंदुल मनंता अल्‍हेने बूमिपोर्रो मनानोर्कगुडा मेंदुल मनंता. गानि स्वर्गमतोरा मेंदुल्ता वेल्‍गु वेरे, बूमि पोर्रोटोरा मेंदुल्ता वेल्‍गु वेरे मनंता. 41 पोळ्‍दुना वेल्‍गु वेरे, वेळ्‍सिता वेल्‍गु वेरे, सुक्‍काना वेल्‍गु वेरे. सुक्‍काना वेल्‍गु उंदानद-उंदांक परक मनंता. 42 हातोर मर्रा जीवाते तेदमळगुडा इल्हे मंता. कळियसि होनना मेंदुल्तुन बूमिते दोसंतोम, गानि बस्‍केने कळियसि होनवा मेंदुल मर्रा जीवाते तेदंता. 43 मेंदुल बूमिते दोस्सनेंके दाना कदर मन्‍नो, गानि अद मर्रा जीवाते तेदानेंके दानकु वेरेने कदर दोर्कंता. मेंदुल बूमिते दोस्सनेंके दानकु ताकत मन्‍नो, गानि अद मर्रा जीवाते तेदानेंके वेल्‍लेने ताकतते तेदंता. 44 बूमिते दोसतद मना दिस्‍सना मेंदुल आंदु, मर्रा जीवाते तेदानद आत्माता मेंदुल आंदु. अल्‍हेने दिस्‍सना मेंदुल मंता, आत्माता मेंदुलगुडा मंता. 45 दर्मसास्‍त्रमते इदुना बारेमते, “मोट्‍टा मोदाटा जीवाता मनकल आदाम आतोर” इंचि रासि मंता. आकिर आदाम, इत्‍ते किरिस्‍तु, पिस्वर हियना आत्मा आतोर. 46 गानि आत्माता मेंदुल मोदाटद आयो, दिस्‍सना मेंदुले मोदाटद आंद. दाना पजाने आत्माता मेंदुल वांता. 47 मोदाटा मनकल बूमिता तोळिते तयार आतोर, गानि पजाटाल वायाना मनकल स्वर्गमताल वातोर.✡योहान 3:31 48 तोळिताल तयार आतुर अंटोर मनकालोर्क, तोळिता मनकनलेसींगे आतुर. स्वर्गमता मनकालोर्क, स्वर्गमतालेसींगे मंतुर. 49 मनम बल्हा अय्ते तोळिते तयार आतोना रूपम एततोम, अल्‍हेने स्वर्गमताल वायानोना रूपमगुडा एतंतोम.

50 विस्वासुल्‍कुनिटा! नना वेहानद बतल इत्‍ते, हव्वि, नेत्‍तुरता मेंदुल्क पेनदा राज्येम दोर्का पर्रो, आनि कळियना मेंदुल्क, कळियवा मेंदुल्तगा अदिकार दोर्का पर्रो. 51 केंजाट, नना मीक मर्ममता पोल्‍ले वेहसेक मंतन. अद बतल इत्‍ते, मनम अंटोरम हायोम, गानि मना रूपम मारियंता. 52 इदंता, उंदि सेकंदतेन, कळु रेप्‍पा तंतच्‍चोरजेमनेन जर्गंता. आकिरता तूताकोम उह्‍कुता उह्‍कुळे, हातोर अंटोर बस्‍केने नासडेम आयाकोंटा मननाहाटीं मर्रा जीवाते तेदानुर आनि मना रूपम बारे मारियंता. 53 बारित्‍ते, कळियसि होनना मेंदुल बस्‍केने कळियसि होनवा मेंदुललेसीं, आनि हायना मेंदुल बस्‍केने हायाकोंटा मनना मेंदुललेसीं मारिया पींता. 54 बस्के अय्ते कळियसि होनना मेंदुल, कळियसि होनवा मेंदुल्ते मारियंता आनि हायाना मेंदुल हायवा मेंदुल्ते मारियंता, अस्‍के दर्मसास्‍त्रमते रासि मत्‍ताप, “पेन हामुरतुन मिंगसि वाटता” इंचि रासि मत्‍ता पोल्‍ले पूरा आंता. 55 “ए हामुरतुना! निमे माकुन बगा गेल्‍स्‍तिन? ए हामुरतुना, नीवा कस्कना कोंडि बगा मंता?” इंचि रासि मंता. 56 हामुरता कोंडि पापम आंद, पापमता ताकत मूसाना नियम आंद. 57 मना सामि येसु किरिस्‍तुनाहेंदाल पेन मनाकुन गेल्‍सागोटंता. अदुनहाटीं पेनदुक दन्यवाद. 58 नावा पावरमगल्‍ला विस्वासुल्‍कुनिटा! सामिना लोप्पो मीवा कस्‍टम एर्तम होन्‍नो इंचि मीक एरपाटे मंता. अदुनहाटीं मिमेट विस्वासमते हीके-हेके आयाकुंटा, गट्‍टिगा निल्‍सि मंटु, सामिना कबळते इंका एक्‍को बेर्स्‍सेके होंटु.