1 येरुसलेमता पेनदा लोकुल्‍कुनाहाटीं चंदा जमा कियाना बारेमते, बल्हा अय्ते गलातिया एरियाता कलिसियातोर्क वेहतानो, अल्‍हेने मिमेटगुडा कियाना. 2 नना वाता पजाने चंदा जमा कियमट, गानि मीवव्टेटाल हरेक मनकल ओना कमाइता इसाबते वारमता मोदाटा रोज*वारमता मोदाटा रोज इग्‍गे वारमता मोदाटा रोज इत्‍ते, अय्तारम. इच्‍चुक कोत्‍तां जमा कीसि इर्रट. 3 नना वाता पजा, मिमेट बोर्कुनय्ते इद कबळताहाटीं पेर्रांतिरो, ओर्क नना सिट्‍टिं हीसि, ओरा कय्देने मिमेट जमा कीता चंदा येरुसलेम लोहचींतन. 4 ओक्‍कला नना होनमळ कुदुरते, ओर नावातोनि वांतुर.

5 नाक मेसिडोनिया एरियाते होनना मंता, मेसिडोनियाताल पजा मिहगा वांतन. 6 मिहगा वासि, आया परते कोन्‍नि रोजकु हिलाकोंटे पूरा पीनि कालम मीवातोनि मनंतन. दाना पजा नाक बेके होनना मंता, हेके सार्ला कीम्‍टु. 7 बारित्‍ते, मेसिडोनियाते होनानेंके नड्‍डुम आगसि मीक कलियमळ नाक इस्‍टम हिल्‍ले. सामिना इच्‍चा मते, मीवातोनि कोन्‍नि रोजकु मंदना इंचि नावा आसे मंता. 8 गानि इंदके, पेंतेकोस्‍त पंडुगुनदाका इपीसि सहरतेन मनंतन. 9 बारित्‍ते, इगे बेसता कबळ कियालय, नाक उंदि पेद्‍दा मोका दोर्कता, इंका विरोद कियानोरगुडा वेल्‍लेटुरे मंतुर. 10 तिमोति मिहगा वातस्के ओर मीवा नड्‍डुम दैरनेमते मननाल हुळट. ओरगुडा नावालेसीं सामिना सेवा कीसेक मंतोर. 11 अदुनहाटीं ओन बोरे सिन्‍नगा हूळा मन्‍नि, ओन सांतिते नहगा लोहट. मिहगटा विस्वासुल्‍कुनतोनि ओर वायानुर इंचि नना एदुर हूळसेक मंतन. 12 अप्‍पुलोस दादान, विस्वासि दादालोर्कुनतोनि होन इंचि नना बच्‍चुंगो मल्कां बतिमलाडसि वेहतन, गानि इंदके मिहगा वायाना विचारम ओनद हिल्‍ले, पजा मोका दोर्कतस्के वायानुर. 13 इंदके मिमेट उसारते मंटु, विस्वासमते गट्‍टिगा मंटु, दैरनेमते मंटु, बलमगल्‍लोर्क आसि मंटु. 14 मिमेट कियाना कबाह्‍क अन्‍नि पावरमतेन कीम्‍टु. 15 विस्वासुल्‍कुनिटा! स्‍टिपनसना लोतोर्कुना बारेमते मीक एरपाटे मंता, ओर अकाया एरियाते मोदाला विस्वासम कीतुर. ओर पेनदा लोकुल्‍कुना सेवा कियालय ओरद-ओर अप्पजेपकुत्‍तुर. 16 मिमेटगुडा असंटोरा आनि ओरालेसीं सेवा कियानोरा पोल्‍ले केंजसि ताकट इंचि बतिमलाडसंतन. 17 मिहागटाल मिमेट वायाकोन्‍ना गानि स्‍टिपनस, पुरतुनातुस, अकयकुस नहगा वातुर. ओर वाताहाटीं मिमेट वाताप आता. इंचि नना वेल्‍ले कूस आतन. 18 ओर वातुर इंचि नावा जीवक आनि मीवा जीवक सांति दोर्कता. अदुनहाटीं इसंटोर्कुन कदर हीम्टु.

19 आसिया राज्येमते मनना कलिसियातोर मीक जोहर वेहतुर. अकविला, ओना मुत्‍तो पिरिसकिला आनि ओरा लोतागा जमा आयाना कलिसियातोरगुडा सामिना पोरोलते मीक जोहर वेहतुर. 20 इग्‍गेटा अंटोर विस्वासुल्‍क मीकुन जोहर कीसेक मंतुर. मिमेट वरोंक-वरोर पवित्र पावरमते कलियसि जोहार वेहकुंट. 21 नना पौलुसुन, नावा कय्‍दे जोहर इंचि मीक रासेक मंतन. 22 बोरन्‍नागिंटा सामिन पावरम कियाकोंटा मत्‍ते, ओन्क सापनेम दल्‍गि. “मारानाता” इत्‍ते, मा सामि वा. 23 सामि येसुना कुर्पा मी तोळ मन्‍निकांटी. 24 येसु किरिस्‍तुना लोप्पोटा नावा पावरम मीवा अंटोरतोनि मंदना. आमेन.