2 कुरेंति
कुरेंति विस्वासुल्कुंक पौलुसना रोंडो सिट्टि
इद सिट्टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 57
कुरेंति कलिसियातोर्क पौलुस रासतद इद रोंडो सिट्टि आंदु. आबद्दम करहानोरा इच्चुर गुरुल्कुनाहेंदाल पौलुस आनि कुरेंति कलिसियातोरा नड्डुम समस्या तयार आता. इच्चुर विस्वासुल्कगुडा पौलुसुना पोल्लें केंजाकोंटा आतुर इंचि पौलुसुंक तेळियता.
अदुनहाटीं पौलुस इद सिट्टि मेसिडोनिया सहरताल रासतोर. कलिसियाते बच्चोर तकलिप वायिना विस्वासुल्क किरिस्तुनलोप्पो गट्टिगा निल्सि मननाहाटीं दैरनेम हियालय रासतोर. निजम पेनदा सेवा कियानोर बल्हा मनागोम इंचि तेडियागोटसि वेहालय रासतोर. अल्हेने इच्चुर विस्वासुल्क आबद्दम करहानोरा पोल्लें केंजसि पौलुसुन विरोद कियुंदुर, अदुनहाटीं पौलुस ओना सतता अदिकारमतुन पीसि ओर्क इस सिट्टि रासतोर.
बगा बतल मंता
जोहार आनि परिचयम 1:1-11
कुरेंतिते पौलुस आनि कलिसिया 1:12–7:16
यहुदियाता विस्वासुल्कुनाहाटीं चंदा जमा कियमळ 8:1–9:15
पौलुस प्रेरित आंदुर इंचि रुजुव कीसि हुप्संतोर 10:1–13:10
आकिरता बोदां 13:11-13
1
जोहर
1 पेनदा इच्चाताहेंदाल किरिस्तु येसुना प्रेरित आतोन नना पौलुसुन आनि मना तम्मुर तिमोति ओक्कला कुरेंति सहरते मंदना कलिसियातोर्क अल्हेने अकाया एरियाता अंटोर पवित्र लोकुल्कुंक सिट्टि रासेक मंतोम.*इद सिट्टितुन पौलुस वरोरे रासतोर, सिलवानुस आनि तिमोति ओनतोनि जोहर इंचि वेहतुर. 2 मना पेनबाबाल आनि सामि येसु किरिस्तुनाहेंदाल मीक कुर्पा, सांति दोर्कसेके मनि.
पौलुस पेनदुन दन्यवाद कींतोर
3 मना सामि येसु किरिस्तुना पेनबाबाल दयागल्लोड अल्हेने अन्नि तीरकुना सांति हियाना पेन आंदुर, अदुनहाटीं ओन्क दन्यवाद आयि. 4 मनम इंकावरोंक सांति हियागोम इंचि पेन मनाकु अन्नि तकलिपकुने सांति हीसेक मंता. बोर अय्ते तकलिपते मंतुर, पेन मनाकु हीता सांतितुने मनम ओर्क हिया परगोम इंचि दाना इच्चा मंता. 5 बारित्ते मनम किरिस्तुनाहाटीं बच्चोर एक्को तकलिप अर्रंतोम, अच्चोर एक्को किरिस्तुनहेंदाल मनाकु सांतिगुडा बेर्स्सेके दांता. 6 मीक सांति आनि मुक्ति दोर्कागोम इंचे मोमोट तकलिप बोगांचेके मंतोम. माक सांति दोर्कता इत्ते, अद मीवा सांतिताहाटींगे आंद. इदुनहेंदाल बद तकलिपतुन अय्ते मोमोट ओर्सकुत्तोम, मिमेटगुडा अदे तकलिपतुन ओप्केते ओर्सकुना परांतिर. 7 मावा तकलिपते मिमेट बल्हा कलियसि मंतिरो अल्हेने मावा सांतितेगुडा मिमेट कलियसि मंतिर. अदुनहाटीं मीवा बारेमते मावा आसे गट्टिगा मंता.
8 विस्वासुल्कुनिटा! आसिया एरियाते†आसिया एरिया अस्केटा आसिया एरिया इत्ते, इंदकेटा तुर्कि देसेम आंद. माक वेल्लेने तकलिप वाता, अद तकलिप मोमोट आपकुना परवच्चो मत्ता, मोमोट पिसंतोम इंचिगुडा इनकुना हिल्लोम. अद पोल्ले मीक तेळियसि मनागोम इंचि वेहासेक मंतोम. 9 निजमे, माक हामुरता सिक्सा दोर्कता इंचि इनकुंचेके मत्तोम, गानि कुद मनापोर्रो मनम बरोसा इर्रामन्नि, हातोर्कुन तेहाना पेन पोर्रो बरोसा इरमळ गावाले इंचि इल्हा जर्गता. 10 पेने माकुन इच्चोर पेद्दा हामुरता गंडेमताल पिसागोटता, पिसागोटसेक मंता, मुन्नेगुडा माकुन पिसागोटसेक मनंता इंचि माक अदुन पोर्रो आसे मंता. 11 वेल्लेटोरा पारतनाहेंदाल पेन मापोर्रो दया हुपिच्चि माकुन पिसागोटता, अदुनहाटीं वेल्लेटुर लोकुल्क माहेंदाल पेनदुक दन्यवाद कीसेक मंतुर. अय्ते मिमेटगुडा अंटोर कूळसि माहाटीं पारतना कीसि माक सहायम कीम्टु.
पौलुसना पय्नेमता पिलान बदलांचमळ
12 मोमोट दुनियाते मननेंके कास कीसि मीवा नड्डुम मननेंके, पेनदुक इस्टामाताप पवित्र आनि सत्तेमते मत्तोम, अद मनकना तेल्विते आयो गानि पेनदा कुर्पातोनि मत्तोम इंचि मावा मनसु गवाइ वेहासेक मंता. इद मावाहाटीं पेद्दिरकेमता पोल्ले आंद. 13-14 मिमेट हदविते मीक, तेळियाना पोल्लेंगे मोमोट रासेक मंतोम, अव आयाका वेरे बवे पोल्लें मीक रासेक हिल्लोम. आनि आकिरदाका मिमेट अवुन कबुल कींतिर इंचि नाक आसे मंता. अचोने आयाका सामि येसु वायाना रोजुने मोमोट मीपोर्रो पेद्दिरकेम कीताप, मिमेटगुडा मापोर्रो पेद्दिरकेम कीकिट.
15-16 इद बरोसाता हेंदाले नना मोदाला मिहगा आगिसि, मिहागटाल मेसिडोनिया दांतन. मर्रा मेसिडोनियाताल मल्सि वायानेंकेगुडा मीकु रोंडु पाय्दां आयगोम इंचि मिहगा आगंतन. पजा अगटाल मिमेट नाकुन यहुदिया एरियाताहाटीं सार्ला किया परांतिर इंचि इनकुंचेके मंतन. 17 नना इव पिलानकु बतले विचारम कियाकेने कीतोर इंचेके मंतिरा? दुनियाता लोकुल्कुनालेसीं उंदि मल्का “हो” इंचि इंकुंदि मल्का “हिल्ले” इंचि इनानोन आयोन. 18 पेन विस्वासमगल्लद आंद. अल्हेन मोमोटगुडा “हो” आनि “हिल्ले” इल्हा रोंडु पोल्लें वळ्कोम. 19 बारित्ते, नना, सिल्वानुस आनि तिमोति मोमोट मीवा नड्डुम पेनदा मर्रि येसु किरिस्तु आंदुर इंचि वेहतोम. येसु किरिस्तु “हो, हिल्ले” इल्हा रोंडु पोल्लें वळ्कोर गानि ओर बस्केळ्क “हो” इंचे इंतोर. 20 पेनदा अन्नि पोल्लें येसुनगा पूरा आतां. अदुनहाटीं मनम आमीन इंचि पेनदा महिमा कींतोम. 21 मीवातोनि अबिसेकम कीसि, किरिस्तुनलोप्पो गट्टिगा निलाहनोर पेने आंदु. 22 पेन मनापोर्रो सिक्का वाटता अल्हेने गेरंटितालेसीं मनालोप्पो दाना पवित्र आत्मातुन इरता.
23 मीकुन इंका नोप्पिचमळ नाक इस्टम हिल्ले, अदुनहाटीं नना इदवेरादाका मिहगा कुरेंति सहर वाया हिल्लेन. इद पोल्ले निजम इंचि ना मनसुन हूळना पेने गवाइ मंता. 24 मीवा विस्वासम पोर्रो अदिकारम हुप्सना इंचि मोमोट वेहासेक हिल्लोम, मिमेट विस्वासमते गट्टिगा निल्सि मंतिट, मीवा आनंदमते मोमोटगुडा मीवा तोळ मनंतोम.