5 बोरन्‍नागिंटा दुक्‍कम हियानय्ते, ओर सिराप नाकुने दुक्‍कम हीतोर इत्‍ताप आयो, तक्‍को-एक्‍को मीक अंटोर्कगुडा हीतोर. इदुना बारेमते नना दीनकन्‍ना एक्‍को बतल वेहोन. 6 असंटोनाहाटीं मिमेट वेल्‍लेटुर हीता सिक्‍सा साल आंता. 7 अदुनहाटीं ओन्क इंका सिक्‍सा हियाका, मापि कीसि, समजांचटु. अल्हा कियाकोंटे ओर इंका एक्‍को रंदि कीसेक मनंतोर. 8 अदुनहाटीं मिमेट ओनपोर्रो एक्‍को पावरमतुन हुप्‍सट इंचि मीक विनंति कीसेक मंतन. 9 मिमेट नना वेहता अन्‍नि पोल्‍लेने ताकंतिरा, ताकिरा इंचि मीकुन परिक्‍सा कीसि हूळालयगुडा अद सिट्‍टि रासतन. 10 मिमेट बोनन्‍ना मापि कीते ओन ननागुडा मापि कींतन, नना बतलय्ते मापि कीतानो किरिस्‍तुना मुन्‍ने मीवाहाटीं मापि कीतन. 11 मापि कियाकोंटे देय्यम बस्‍केनना तकलिप हिय्या परांता. बारित्‍ते दाना गुनम बसोंटदो मनक एरपाटे मंता.

12 नना बस्के अय्ते किरिस्‍तुना बारेमता बेसता कबुर वेहालय त्रोआस सहरते होत्‍तनो, अस्‍के सामिनाहेंदाल नाकु हर्रि पुटता. 13 ना तम्मुर तीतु अगा कलिया हिल्‍लोर, अय्ते ना मनसुंक सांति दोर्काहिल्‍ले. अदुनहाटीं दांतन इंचि ओर्कु वेहचि, मेसिडोनिया एरियाते पेय्सि होत्‍तन.

14 पेनदुक दन्यवाद आयि! अद किरिस्‍तुनलोप्‍पो मनाकुन बस्‍केळ्‍क गेल्‍सागोटसेक ओंता आनि गमा-गमा गब्‍बुनसोंटा दाना तेल्‍वितुन मनाहेंदाल अन्‍नि जेगाने पैलांचंता. 15 बारित्‍ते मुक्‍ति दोर्कानोरा लोप्पो आनि नासडेम आयानोरा लोप्पो मनम पेनदाहाटीं किरिस्‍तुना बेसता गब्‍बु आंदुम. 16 नासडेम आयानोराहाटीं हामुर गब्‍बुलेसीं मंतोम आनि मुक्‍ति दोर्कानोराहाटीं पिस्वरता बेसता गब्‍बुलेसीं मंतोम. इसोंटा कबळ कियानालायक बोर मंतुर? 17 बोर अय्ते पेनदा पोल्‍लें वेहचि सतता पायदा कीकुंतुर, असंटा वेल्‍लेटोरव्टेटाल मोमोट हिल्‍लोम. गानि मोमोट सत्‍तेम मनसुने, किरिस्‍तुना अदिकारमते पेनदा पोल्‍लें वेहासेक मंतोम. माकुन लोहता पेन माकुन हूळसेक मंता इंचि माक एरपाट मंता.