1 मावद मोमोटे मर्रा पेद्‍दातनम वेहकुंचेके मंतोम इनकुंचंतिरा? हिलाकोंटे वेरेतोर्कुंक अव्‍सरम मत्‍ताप माकगुडा मीवाहाटीं सिपारिस सिट्‍टिं मिहगा तरमळ, मिहागटाल एतमळ अव्‍सरमा? 2 मावा सिट्‍टिं अय्ते मिमेटे आंदिर, अद मावा मनसुने रासि मंता, अदुन अंटोर एरपाट कींतुर, हदवंतुर. 3 निजमे, मिमेट माहेंदाल हीता किरिस्‍तुना सिट्‍टि आंदिर इंचि अंटोर्क दिस्सेक मंतिट. अद साइते आयो गानि जीवाते मंदना पेनदा आत्माते रासि मंता, अद पर्पु बंडनपोर्रो आयो गानि मनकना मनसुनपोर्रो रासि मंता. 4 किरिस्‍तुनाहेंदाल माकु पेनदापोर्रो इसोंटा बरोसे मंता.

5 मावद मोमोटे बदाना पोल्‍लेता विचारम कियानालायक हिल्‍लोम, गानि इवुन कियाना बलम पेने माकु हीसेक मंता. 6 पेन माकुन पूना करारता सेवक आयाना लायकगुडा कीता. अद करार मूसाना नियमते रासि मत्‍ताप आयो गानि, पेनदा आत्माताहेंदाल मंता. मूसाना नियम हामुरतेके ओंता गानि पवित्र आत्मा पिस्वरताहेके ओंता.

7-8 पर्पु बंडनपोर्रो पेन दाना नियमकुन रासि मूसांक हीता, अस्‍के अवुन ओर इस्राएल लोकुल्‍कुंक हियनेंके ओना मोकम पेनदा महिमाता वेल्‍गुने निंडिसि मत्‍ता. गानि अद वेल्‍गु तक्‍को आयानेंकेगुडा ओर ओना मोकमतुन हूळा पर्राहिल्‍लुर. इल्‍हा हामुरताहेके ओयाना मूसाना नियमता महिमाता वेल्‍गु इच्‍चोर मत्‍ता अय्ते, पेनदा आत्माता महिमाता वेल्‍गु इंका बच्‍चोर पेद्‍दा मनंता. 9 बारित्‍ते सिक्‍साहेके ओयाना मूसाना नियमे अच्‍चोर महिमाता वेल्‍गुने मत्‍ता, अय्ते मनकालोर्कुन नीतिमंतुल्क कियाना नियमते दानकन्‍ना इंका बच्‍चोर महिमाता वेल्‍गु मंदार. 10 इंदकेटा महिमाता वेल्‍गु, मुन्‍नेटा महिमाता वेल्‍गुंकन्‍ना बच्‍चोरो एक्‍को मंचि अद हिल्‍ले इत्‍ताप आता. 11 तक्‍को आसेके होनानदुना महिमाता वेल्‍गु इच्‍चोन मत्‍ते, इंका बस्‍केळ्‍क मनानदुना महिमाता वेल्‍गु बच्‍चोन वेल्‍ले मंदार! 12 अदुनहाटीं इदे आसेता हेंदाल मनम बच्‍चोरो दैरनेमते वळ्‍कंतोम. 13 इस्राएल लोकुल्‍क तक्‍को आयाना महिमाता वेल्‍गुन हूळा मनि इंचि मूसाल ओना मोकमपोर्रो मुस्‍कु वाटकुनुंदुर, गानि मनम ओरालेसीं मुस्‍कु वाटकुन्‍नोम. 14 इस्राएल लोकुल्‍कुना मनसुक गट्‍टिगा आसि होत्‍तां. इव रोजकुनेगुडा बस्के अय्ते ओर पळाना नियम हदवंतुर, अस्‍के अदे मुस्‍कु ओरा मनसुन मुच्‍चंता. सिराप किरिस्‍तुनपोर्रो विस्वासम इरते, किरिस्‍तुए ओरा मुस्‍कुन तेंडा परांतोर. 15 निजमे, इंदकेगुडा मूसाना पुस्तकम हदवंतुर अय्ते मुस्‍कु वाटताप अव पोल्‍लेना अर्तम तेळियो. 16 गानि बस्के अय्ते ओरा मनसु सामिनहेके तिरियार, अस्‍के सामि ओरा मुस्‍कु तेंडसि ओर्क तेळियाना बुद्‍दि हिय्यानुर.

17 सामि अय्ते आत्मा आंदुर. बगा अय्ते सामिना आत्मा मंता, अगा बोना कय्‍दा हिळु हिल्‍लोम. 18 मनम अंटोरम अद मुस्‍कुन तेंडसि पोहतोम, इंदके अद्‍दमते हूळताप सामिना महिमाता वेल्‍गुन हूळसेक मंतोम. ओना आत्मा मनालोप्‍पो मत्‍ताहाटीं ओनालेसींगे मनम मारियसेके मंतोम.