1 पत्रु
पत्रु रासता मोदाटा सिट्टि
इद सिट्टिता बारेमते गिचचो परिचयम
रासतोना पोरोल: पत्रु
रासता कालम: इसवि सन 65-67
रोम राज्येमते वेरे-वेरे एरियाने पैलांचि, पराय देसेमतोरालेसीं मत्ता विस्वासुल्कुनाहाटीं पत्रु इद सिट्टि रासतोर. ओर सामिना लोप्पो विस्वासमते गट्टिगा मत्ताहाटीं लोकुल्कुनहेंदाल ओर्क वेल्ले तकलिपकु मत्तां, ओर दुक्कमते मत्तुर.
अदुनहाटीं पत्रु ओर्क दैरनेम हीसेक मंतोर. बोर अय्ते तकलिपकुन, दुक्कमतुन ओप्के पीसि ओर्सकुंचेके विस्वासमते गट्टिगा मनंतुर, ओरापोर्रो पेनदा दया बस्केळ्क मनंता. आनि सामि येसु किरिस्तु मल्सि वातस्के दाना पलम ओर्क दोर्कंता, इंचि इद सिट्टिते रासतोर.
बगा बतल मंता
जोहार आनि परिचयम 1:1-2
पेनदा मुक्तिता बारेमते मति कीसि हियमळ 1:3-12
पवित्र पिस्वर पिस्सनाहाटीं बोदा 1:13–2:10
तिप्पल्क वातास्के विस्वासुल्कुना जिम्मेदारिना बारेमते पोल्लें 2:11–4:19
गर्रा हिलाकोंटा मनमळ आनि पेनदा सेवा कियमळ 5:1-11
आकिरता बोदां 5:12-14
1
पत्रु विस्वासुल्कुंक जोहार कींतोर
1 नना पत्रुन, येसु किरिस्तुना प्रेरितुन आंदुन. रोम देसेमता पुंतुस, गलातिया, कप्पुदुकिया, आसिया आनि बितुनिया राज्येल्कुने पैलांचि होंचि, पराय देसेमतोर आसि मत्ता लोकुल्कुंक नना इद सिट्टि रासेके मंतन. 2 पेनबाबाल मीकुन मुन्नेन पेरसि निलाहतोर. अदुनहाटींगे, मिमेट येसु किरिस्तु वेहताप ताकगोम, ओना पोंगता नेत्तुरते मीवा पापाल्क पायसि होनगोम इंचि पवित्र आत्माताहेंदाल मीकुन पवित्र कीतोर. पेनदा कुर्पा, सांति मीक इरगा दोर्किकांटी.
बस्केळ्क पिस्साना आसे
3 मना सामि येसु किरिस्तुना पेनबाबाना दन्यवाद आयि! ओना वेल्ले दयाताहेंदाल मनाकुन पूना रीतुने पुटिचमळ जर्गता. अद बल्हा इत्ते, पेनबाबाल येसु सामिन हातोरा लोप्पोटाल मर्रा तेहाचि, मनाकु उंदि पिस्वरता आसे हीतोर. 4 इंका अद बस्केने नासडेम आयवद, तप्पु हिलवद आनि कर्गुवसोंटा वारसान हक्क स्वर्गमते मीवाहाटीं इर्सि मंता. 5 आकिरि रोजकुने पेन अंटोर्कुंक हुप्सालय तयार कीसि इरता मुक्ति, मीकु दोर्कनाहाटीं मीवा विस्वासम परकारम पेन मीकुन दाना बलमते कापाळसि स्वर्गमते इरसंता. 6 अदुनहाटीं मिमेट इरगा कूस आम्टु. इंदके मीक गडसेमताहाटीं बच्चुंगो तीरकुना परिक्सां सहन किया पींता. 7 नासडेम आयाना बंगारमतुन तळमिते करगागोटसि परिक्सा कींतुर. गानि आ बंगारमकन्ना बच्चोरो विलुवाता मीवा विस्वासमतुनगुडा परिक्सा एतमळ जर्गंता. येसु किरिस्तु मर्रा वातस्के, मीकुन मेच्कुंचि पेद्दातनम आनि कदर दोर्काना कारनम आयगोम. 8 मिमेट येसुन हूळाकोन्ना गानि पावरम कींतिट; इंदके ओर दिसाकोन्ना ओन विस्वासम कीसि, पोल्लेने वेहा परवच्चोन आनंदमते आनि महिमाते निंडिस मंतिर. 9 इल्हा मीवा विस्वासमता पलम इंचि मिमेट मीवा आत्मांकु मुक्ति दोर्किचेके मंतिट.
10 मीक दोर्कना मत्ता कुर्पाता बारेमते बोर पेनदा कबुरतोर अय्ते बविस्यवानि कीसि मत्तोरो, ओर इदे मुक्तिता बारेमते पूसकीसेके, पहकसेक मत्तुर. 11 किरिस्तु बल्हा तकलिप वासि हायनुर, दाना पजा बल्हा ओनकु स्वर्गमते कदर दोर्कार इंचि ओरा लोप्पो मनना किरिस्तुना आत्मा मुन्नेन वेहचि मत्ता. गानि इव पोल्लें बोना बारेमते, बस्के आयनुं इंचि पेनदा कबुरतोर पहकुंदुर. 12 इव पोल्लें ओरा पायदाताहाटीं आयों गानि मीवाहाटीं इंचि पेने ओर्क तेळियागोट्सि वेहचि हुपिस्ता. इदवेरादाका बदाय्ते बेसता कबुर वेहतुर, अद स्वर्गमताल लोहचीता पवित्र आत्माहेंदाले मीक वेहतुर. इव पोल्लेना बारेमते पेनदा दूतांगुडा बल्हा आंतानो इंचि हूळना इच्चाते मंतां.
पवित्र आम्टु
13 अदुनहाटीं मिमेट बेसता बुद्दितोनि, हुसारते मंटु. येसु किरिस्तु मर्रा मल्सि वातस्के मीक दोर्कना कुर्पाताहाटीं पूरा आसेते मंटु. 14 येसु किरिस्तुना बारेमते मीक तेळियवस्के मीलोप्पो मत्ता कराब अलवटकुना जोलिक होनाकोंटा, पोल्ले वेहते केंजाना पिलाल्कुनालेसीं मंटु. 15 गानि बद पेन अय्ते मीकुन केयता, अद पवित्र मंता. अल्हेने मिमेटगुडा मीवा ताकमळते अन्नि तीरकुने पवित्र मंटु. 16 बारित्ते दर्मसास्त्रमते, “नना पवित्र मंतन इंचि मिमेटगुडा पवित्र आम्टु,” इल्हा पेन इंता.
17 हरेक मनकन सिन्ना-पेद्दा इनाकोंटा ओरा कबाह्कुन हूळसि न्यायम कियाना पेनदुन मिमेटगिंटा “बाबा” इंचि पारतना कीते, दुनियाते मतच्चोरजेम परायतोरम इंचि वेर्रेते ताकाटु. 18-19 मीवा तादो-बाबुरागटाल ताकसेके वाता एर्तम पिस्वरतुन, नासडेम आयाना एंडि-बंगारम इळबळिचा हिल्ले, गानि दोसेम हिल्वद, मर्का हिल्वद गोर्रे पोरिनसोंटा किरिस्तुना विलुवाता नेत्तुरताहेंदाल मिमेट इळबळतिर, इदु मीकु एरपाटे मंता. 20 दुनिया पुट्टका मुन्नेन किरिस्तुन पेन पेरता, गानि मीवाहाटीं इव आकिर रोजकुने ई दुनियाते वातोर.
21 ओनहेंदाल मिमेट पेनदापोर्रो बरोसा कीतिर. पेन ओन हातोरा लोप्पोटाल मर्रा जीवाते तेहाचि, ओन्क पेद्दातनम हीता. अदुनहाटीं मीवा आसे आनि विस्वासम पेनदापोर्रो मंता. 22 मिमेट सत्तेमता हर्रि ताकसि मीवा आत्मातुन पवित्र कीकुत्तिर. अदुनहाटीं मिमेट वरोंक-वरोर पावरम कीसेके मंतिट. अल्हेने इंदके मीलेसीं विस्वासुल्क आतोर्कुन मिमेट पूरा मनसुनाल पावरम कीम्टु.
23 इंदके मिमेट पूना पिस्वरते पुटतिर, नासडेम आयाना पेडेहेंदाल आयो, गानि बस्केन नासडेम आयवद, बस्केळ्क जीवाते मनना पेनदा पोल्लेताहेंदाल, पूना पिस्वरते पुटतिर. 24-25 दर्मसास्त्रम इल्हा वेहंता गदा,
“अंटोर मनकालोर जाडितालेसीं मंतुर,
ओरा अन्नि पेद्दातनाल्क पुंगाह्कुनालेसीं मंतां.
जाडि वतंता, पुंगाह्कु रालंतां.
गानि सामिना पोल्ले मात्रम पीळि-पीळिनदाका मनंता.” ✡यसायाह 40:6-8
इदुने मीक बेसता कबुर इंचि वेहमळ जर्गता.