1 दनवंतुल्कुनिटा, केंजाट! मीपोर्रो वायाना गंडाल्कुनाहाटीं वरगेयाटु, अळट. 2 मीवा दनम नासडेम आंता, मीवा कपडिन सेदेल पींता. 3 मीवा बंगारम, एंडि सिलुम पींता. अद सिलुम मीक अड्‍डम गवाइ वेहचि, तळमितालेसीं मीवा मेंदुल्तुन नासडेम कींता. मिमेट ई आकिर युगमतेगुडा दनम जमा कीसेक मंतिर. 4 हुळाट! मीवा नेदे कबळ कीता बूतिनोर्कुंक मिमेट बूति हिया हिल्‍लिर, अद बूति मीक अड्‍डम वरगेयसेक मंता, बूतिनोर्कुना अळमळ स्वर्गमते मंदना बलमगल्‍ला सामिना केव्कुंक केंजावाता. 5 मिमेट ई दुनियाते अन्‍नि तीरकुना आरामते, सुकमते पिस्तिर आनि मिमेट हायना रोजुनाहाटीं मीवा मनसुन बल्सागोटतिर. 6 नीतिमंतुनपोर्रो मिमेट दोसेम दोस्‍सि हव्कतिरगुडा. गानि ओर मीपोर्रो मर्लाबळा हिल्‍लोर.

7 अदुनहाटीं विस्वासुल्‍कुनिटा! सामि मर्रा वायानादाका ओप्के पीसि मंटु. बल्हा इत्‍ते, वरोर कास्‍तकरि मनकल ओना नेदा पिस्वरता पंटाहाटीं मोदाटा पिर्रु आनि आकिरता पिर्रु वायानादाका ओप्‍केते एदुर हूळांतोर, 8 अल्‍हेने सामि मल्सि वायना वेला दग्‍गेरा वासि मंता. अदुनहाटीं मिमेटगुडा मीवा मनसुन गट्‍टिगा कीसि, ओप्‍केते मंटु. 9 विस्वासुल्‍कुनिटा! वरोनपोर्रो वरोर चुगलीं वेहमट, अल्हा वेहतिर इत्‍ते मी पोर्रोने दोसेम दोसमळ जर्गंता. हुळाट, न्‍यायम कियानोर गलमातगा नित्‍तिसि मंतोर. 10 विस्वासुल्‍कुनिटा! सामिना पोरोलता बारेमते वेहता पेनदा कबुरतोर तकलिप बोंगाचिगुडा ओप्‍केते मत्‍तुर, मिमेटगुडा ओरालेसीं मंटु. 11 हुळाट! बोर अय्ते ओप्के पीसि मत्‍तुर, ओर्कुन आसिर्वाद दोर्कतोर इंतोम. अय्यूब*अय्यूब अय्यूब पोरोलता वरोर मनकना बारेमते पडाना नियमते रासि मंता. ओर पेनदा बेसता बक्‍तुड मत्‍तोर. ओप्के पीसि मत्‍ताहेंका ओन्क पेनदाहेंदाल आसिर्वादगुडा दोर्कता इंचि मिमेट केंजतिरे. इदुनहेंदाल पेन एक्‍को जीवा कियानद, दया कियानद आंदु, इंचि तेळियंता. 12 गानि नावा विस्वासुल्‍कुनिटा! अन्‍निंकन्‍ना पेद्‍दा पोल्‍ले बतल इत्‍ते, मिमेट स्वर्गमतद आयि, बूमितद आयि आनि बदे पोल्‍लेतद आयि ओट्‍टु तिनमट. मत्‍ते मंता इंटु, हिलाकोंटे हिल्‍ले इंटु. इल्‍हा इत्‍ते पेन मीकु सिक्‍साता आदेस हिय्यो.

13 मीवा लोप्‍पोगिंटा बोरन्‍ना दुक्‍कमते मत्‍ते ओर पारतना कियाना, आनंदमते मत्‍ते पेनदा स्‍तुति कीसेक पाटां पाराना. 14 मीवा लोप्‍पोगिंटा बोरन्‍ना बिमारते मनानय्ते, कलिसियाता पेद्‍दाल्कुन केयाना. ओर वासि सामिना पोरोलते ओनकु निय होकसि, पारतना किय्‍यिर. 15 ओर विस्वासमते कीता पारतनाते बिमारतोर बेस आयानुर. सामि ओन बिमारताल तेहाचि निप्‍संतोर, ओर पापम किय्यिनागानि ओना पापमतुन मापि कींतोर. 16 अदुनहाटीं मिमेट वरोना मुन्‍ने वरोर मीवा पापाल्कुन ओप्‍कुंटु, वरोनाहाटीं वरोर पारतना कीम्‍टु, अस्‍के मिमेट बेस आकिट. नीति मनकना पारतनाते वेल्‍लेने ताकत मनंता. 17 एलियालगुडा†एलियाल पडाना नियम मत्‍तस्के ईर पेनदा पेद्‍दा कबुरतोर मत्‍तोर. मनासोंटा गुनमता मनकल मत्‍तोर, ओर पिर्रु वायामन्‍नि इंचि ऊके-ऊके पारतना कीतोर, अय्ते मूडुननरा वर्सनदाका बूमिपोर्रो पिर्रु वाया हिल्‍ले. 18 दाना पजा, पिर्रु वायागोम इंचि मर्रा पारतना कीतोर, अस्‍के मब्बुनाल पिर्रु वाता आनि बूमिपोर्रो पंटा पेय्सता.

19 नावा विस्वासुल्‍कुनिटा! मीवा लोप्पोटाल बोरन्‍ना सत्‍तेमता हरदाल तप्‍सि होनानय्ते, ओन इंकावरोर बोरन्‍ना सत्‍तेमता हर्दे वापस तायाना. 20 ओनकु इद तेळियना गदा, बोरन्‍ना सत्‍तेमता हरदाल तप्‍सि होत्‍ता पापि मनकन, सत्‍तेमता हर्दे वापस तायते ओर ओना जीवातुन हामुरताल पिसागोटतोर आनि ओना अन्‍नि पापाल्कुन मुच्‍चि हीतोर.