4
मनालोप्‍पो जगडाल्‍क आयाना कारनम
मीलोप्‍पो लडाईं, जगडाल्‍क, आयाना कारनम बतल? मीलोप्‍पो मंदना कराब आसेना लडाइताहेंदाले गदा. मिमेट इच्‍चा कींतिट गानि अद मीक दोर्को, अदुनहाटीं मिमेट इंकावरोन हव्कंतिर. गावाले इंचि इनकुंतिर गानि अद मीक दोर्को, मिमेट लडाईं, जगडाल्‍क कींतिर. अय्ते मीक दोर्कवा कारनम बतल इत्‍ते, मिमेट पेनदुन तल्कसेक हिल्‍लिर. मिमेट तल्कंतिर गानि मिमेट मीवा सुकमताहाटीं कराब आसेतेन तल्कंतिर, अदुनहाटीं मीक दोर्को. विस्वासम हिल्वोरिटा! दुनियातोनि दंटा कियमळ इत्‍ते पेनदुक पगा आयमळ इद मीक तेळियोना? अदुनहाटीं बोर अय्ते दुनियातोनि दंटा कींतोर, ओर पेनदुक पगातोर आंतोर. दर्मसास्‍त्रमते वेहता पोल्‍लें एर्तमे इंचि मिमेट इनकुंचंतिरा? बद पवित्र आत्मातुन अय्ते पेन मनालोप्‍पो इरता, अद मना नुकसान आयगोम इंचि कोरंतना? पेन अय्ते इंका एक्‍को कुर्पा कींता. अदुनहाटीं, “पेन पेद्‍दिरकेम कियानोर्कुंक विरोद कींता आनि सिन्‍नातनम आसि मनानोर्कुंक कुर्पा कींता,” इंचि दर्मसास्‍त्रमते रासि मंता. अदुनहाटीं पेनदा पोल्‍लेपोर्रो ताकट, देय्यमकु एदुर तिरियट. अस्‍के अद मिहागटाल वित्‍तंता. मिमेट पेनदुक दग्‍गेरा वट, अस्‍के पेन मीवा दग्‍गेरा वांता. ए पापि लोकुरिटा! मीवा पापाल्कुन नोर्राट. रोंडु मनसुकुने ताकानोरिटा, मीवा मनसुन साप इर्राट. पापि लोकुल्‍कुम इंचि दुक्‍कमते मंटु, अळट. मिमेट कव्वानद होळसिसि दुक्‍कमते मंटु, आनंदमते मनानद होळसिसि नाराजते मंटु. 10 सामिना मुन्‍ने मिमेट सिन्‍नातनम आसि मंटु, अस्‍के मीकुन पेन पोर्रोळ्‍क तेहांता.
तप्पु दोसना अदिकार मीक हिल्‍ले
11 विस्वासुल्‍कुनिटा! वरोना-वरोर अपमानम कीकुनमट, बोर अय्ते ओना दंटातोन अपमानम कींतोर, ओनपोर्रो तप्पु दोसंतोर, असोंटा मनकल दर्मसास्‍त्रमता अपमानम कींतोर, दानपोर्रो तप्पु दोसंतोर. अय्ते निमे गिंटा दर्मसास्‍त्रमपोर्रो तप्पु दोसते, निमे नियम परकारम ताकानोन आयिन गानि न्‍यायम कियानोनालेसीं आंतिन. 12 दर्मसास्‍त्रम हियानद आनि न्‍यायम कियानद पेन उंदे आंद. दानके पिसागोटना आनि नासडेम किय्‍याना ताकत मंता, गानि निमे बोन आंदिन पक्‍कातोनपोर्रो तप्पु दोस्सानोन?
मना पिस्वर पेनदा कय्‍दे मंता
13 केंजाट, “इय्याला हिलाकोंटे नाडि पलाना सहरते होंचि, वर्सामेड मंचि, दंदा कीसि कमांचकोम,” इंचि मिमेट इंतिट. 14 गानि नाडि बतल आंता मीक तेळियो, मीवा पिस्वर इत्‍ते गळसेम दिस्‍सि मर्रा दिसाकोंटा आयाना मूळमतसोंटद आंद. 15 अदुनहाटीं मिमेट, “सामिना इच्‍चा मत्‍ते मनम जीवाते मंदकोम, इदो, अदो बदो उंदि कबळ कीकोम,” इंचि इनमळ गावाले. 16 गानि इंदके मीवा पोल्‍लेने मिमेट गर्राते मनंतिर, इसोंटा अन्‍नि तीरकुना गर्रा बेस आयो. 17 अदुनहाटीं बोर अय्ते बेस कबळ कियाना इंचि तेळियसिगुडा ओर कियाकोंटे, ओनाहाटीं अद पापम आंद.