1 तेसलोनि
तेसलोनि विस्वासुल्कुंक पौलुसना मोदाटा सिट्टि
इद सिट्टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 50-54
तेसलोनि सहर मेसिडोनिया एरियाता राजदानि मत्ता. अगा यहुदि आयवोर मनुंदुर, गानि ओर यहुदि मतमतुन नम्मुंदुर. पौलुसनाहेंदाल अगागुडा विस्वासुल्क तयार आतुर. पौलुस वेहता बेसता कबुरतुन लोकुल्कु विस्वासम कीसंतुर इंचि यहुदिल्क पौलुसुन विरोद कियालय दल्गतुर. अदुनहाटीं पौलुस तेसलोनि सहर होळसि एतेंस सहरते होत्तोर. अगटाल विस्वासुल्कुना परिस्तिति कन्कुनालय तिमोतिन मर्रा तेसलोनि सहरते लोहतोर. ओर वापस वासि अगाटा विस्वासुल्कुना परिस्तिति पौलुसुंक वेहतोर.
पौलुस अगाटा परिस्तिति केंजसि कूस आतोर. पजा तेसलोनि सहरता विस्वासुल्क, दैरनेमते आनि विस्वासमते गट्टिगा मंदालय ओर्क इद मोदाटा सिट्टि रासि लोहतोर.
अल्हेने किरिस्तु बस्के मल्सि वायानुर, ओर वायाका मुन्ने हाता विस्वासुल्कुनद बतल आंता? इसोंटा पोल्लें इद सिट्टिते रासि मंतां.
बगा बतल मंता
जोहार आनि परिचयम 1:1
दन्यवाद आनि स्तुति कियमळ 1:2–3:13
किरिस्तु वेहताप पिस्साना बारेमता बोदां 4:1-12
किरिस्तु मर्रा वायना बारेमते समजांचि वेहामळ 4:13–5:11
आकिरता पोल्लें 5:12-22
आकिरता बोदां 5:23-28
1
जोहार
1 नना पौलुस, सिल्वानुस*सिल्वानुस सिल्वानुस इत्ते सिलास आंदुर, ओन्क रोंडु पोरोलीं मत्तां. आनि तिमोति मोमोट इद सिट्टि मीक तेसलोनि सहरते मंदना कलिसियातोराहाटीं रासेके मंतोम.†इद सिट्टि पौलुस रासतोर, सिल्वानुस आनि तिमोति ओनतोनि जोहार वेहतुर. मिमेट पेनबाबाल आनि सामि येसु किरिस्तुनतोनि कलियसि मंतिट इंचि मीक पेनदाहेंदाल कुर्पा, सांति दोर्किकांटी.
तेसलोनि कलिसियातोरा विस्वासम
2 मोमोट पारतनाने मीवा मति कीसेके, मी अंटोराहाटीं पेनदुक बस्केळ्क दन्यवाद कींतोम. 3 मिमेट विस्वासमते कियाना कबाटुन, पावरमते कियाना मीवा कस्टमतुन अल्हेने सामि येसु किरिस्तुनापोर्रोटा आसेते ओप्के पीसि मत्तादुन मोमोट मना पेनबाबाना मुन्ने बस्केळ्क मति कीसेके मंतोम.
4 विस्वासुल्कुनिटा! पेन मीकुन पावरम कीसि पेर्ता इंचि माक एरपाटे मंता. 5 बारित्ते, मोमोट वेहता बेसता कबुर सिराप पोल्लेनतोने आयो गानि ताकतते, पवित्र आत्माते आनि पूरा गट्टि विस्वासमते मिहगा वाता. मोमोट मीवा नड्डुम मंचेके बल्हा ताकतोम मीक एरपाटे मंता. 6 मिमेट वेल्ले दुक्कमते मत्तस्केगुडा पवित्र आत्मा हियना कुसिते बेसता कबुरतुन केंजतिर. मिमेट मावालेसीं, सामिनलेसीं ताकालय सुरुव कीतिर. 7 इल्हा मिमेट अकाया आनि मेसिडोनिया राज्येमता विस्वासुल्क मीकुन हूळसि ताकालय, मिमेट ओर्क उंदि उदाहरनलेसीं आतिर. 8 बारित्ते मीहेंदाल सामिना पोल्ले सिराप मेसिडोनिया आनि अकाया राज्येमतेन एवता इंचि आयो गानि पेनदापोर्रोटा मीवा विस्वासमता बारेमते अन्नि जेगाने तेळियसि होत्ता. अदुनहाटीं मोमोट मीक वेहाना बतल अव्सरम हिल्ले. 9 बारित्ते मोमोट मिहगा वातस्के, मिमेट माकुन दग्गेरा कीसि बल्हा बेस हूळतिर, ओरे मावा बारेमते वेहासेक मंतुर. अल्हेने मिमेट बोम्माना पेनकुन होळसिसि, जीवाते मनना निजम पेनदा सेवा कियालय बल्हा मलतिर इंचि वेहासेक मंतुर. 10 पेन येसुन हातोरव्टेटाल तेहता. इंदके स्वर्गमताल दाना मर्रि येसु मल्सि वायानदुन एदुर हूळसेक मंतिर, इंचि इव पोल्लें अंटोर्क वेहासेक मंतुर. वायाना पेनदा होंगुनाल ओरे येसु मनाकुन पिसागोटंतोर.