1 विस्वासुल्‍कुनिटा! मोमोट मिहगा वातद एर्तम आयाहिल्‍ले इंचि मीक एरपाटे मंता. 2 गानि दीनकन्‍ना मुन्‍ने पिलिपिया सहरते माकुन बदनाम कीसि वेल्‍लेन दुक्‍कम हीतुर. लोकुल्‍क माकुन बागाने विरोद कीतुर. विरोद किय्यिनागानि पेनदा बेसता कबुर मीक वेहालय पेन दैरनेम हीता, इदगुडा मीकु एरपाटे मंता. 3 बारित्‍ते मावा बोदा गलतितेनो, कराब विचाराल्कुनेनो, पसांचना उद्‍देसमते वेहतद आयो. 4 गानि पेन माकुन दाना बेसता कबुरता लायक कीसि, बेसता कबुरतुन वेहालय माक अप्पजेपता. अदुनहाटीं मावा मनसुन परिक्‍सा कीसि हूळना पेनदुन कूस कियालय वेहंतोम गानि मनकालोर्कुन कूस कियालय पेनदा पोल्‍ले वेहोम. 5 बारित्‍ते मोमोट मीकुन बस्‍केने बुद्रगिच्‍चना पोल्‍लें वळ्का हिल्‍लोम. अल्‍हेने मावा आस्तिताहाटीं मीकुन नळेह किया हिल्‍लोम, दीनकु पेने गवाइ मंता, इंचि मीक एरपाटे मंता. 6 इच्‍चोरे आयाका, मोमोट अय्ते किरिस्‍तुना प्रेरितुल्कुम इंचि मीपोर्रो मावा अदिकारम हूपिस्तोमे, गानि मिमेट आयि, वेरेटोर आयि, इंका बोनाहेंदाले आयि पेद्‍दातनम दोर्किच्‍कुनालय मोमोट हूळा हिल्‍लोम. 7 तल्‍लुर दाना पिलाल्कुन बल्हा अवरिच्‍कुंतनो, अल्हे मोमोटगुडा मीकुन बेस हूळकुत्‍तोम. 8 अदुनहाटीं मीपोर्रो इच्‍चोर पावरम मंता गदा, मोमोट मीक सिराप पेनदा बेसता कबुरे आयो, मावा जीवागुडा हियालय तयार मत्‍तोम. मिमेट अच्‍चोर पावरमतोर आसि मत्‍तिट. 9 विस्वासुल्‍कुनिटा! मावा कस्‍टम, तकलिप मीक मते मंदार. मोमोट मीक बोनके बर्वु आयामन्‍नि इंचि नर्का-पिय्यल कबळ कीतोम. अल्हा कीसेके पेनदा बेसता कबुर मीक वेहचि मत्‍तोम.

10 मी विस्वासुल्कुना नड्‍डुम मोमोट बल्हा पवित्रते, सत्‍तेमते, दोसेम हिलाकोंटा मत्‍तोम, इदुना मिमेटे गवाइ मंतिट, पेनगुडा गवाइ मंता. 11-12 पेन मीकुन दाना राज्येमते आनि दाना पेद्‍दातनमते कलियालय केयता, अदुनहाटीं दानकु नच्‍चनालायक मिमेट ताकट इंचि वेहतोम. बाबाल बल्हा ओना पिलाल्कुन अवरिच्‍कुंतोर अल्‍हेने, मोमोट मीक हरेक मनकंक तेळियागोट्‍सि वेहासेके, दैरनेम हीसेक, विनंति कीसेके मत्‍तोम, इद मीक एरपाटे.

13 बस्के अय्ते पेनदा पोल्‍ले मावाहेंदाल मिहगा एव्ता, अस्‍के अद मनकालोराहेंदाल वातद आयो, गानि पेनदाहेंदाल वाता निजम पोल्‍ले आंद इंचि मिमेट केंजसि ओप्कुत्‍तिर. अदुनहाटीं मोमोट पेनदुक बस्‍केळ्‍क दन्यवाद कींतोम. मीवा विस्वासुल्कुना नड्‍डुम पेनदा पोल्‍लेगुडा कबळ कीसेके मंता. 14 अद बल्हा इत्‍ते, विस्वासुल्‍कुनिटा! यहुदिया राज्येमते येसु किरिस्‍तुनलोप्‍पो मत्‍ता पेनदा कलिसियातोरलेसीं मिमेट ताकसेक मंतिट. बारित्‍ते बल्हा मिमेट मीवा देसेमतोराहेंदाल तकलिप बोगांच्‍तिरो, अल्‍हेने ओर ओरा यहुदिल्कुनाहेंदाले तकलिप बोगांच्‍तुर. 15 ओरे सामि येसुन आनि पेनदा कबुरतोर्कुन हव्कतुर. ओर माकुन पलाते दोबतुर. पेन ओरतोनि कूस हिल्‍ले. ओर अंटोर लोकुल्‍कुना विरोदमते मंतुर. 16 पेनदा पिसागोटमळ बारेमते यहुदि आयवोर्कुनतोनि वळ्कते, ओर माकुन आपंतुर. इल्‍हा कीसि बस्‍केळ्‍क ओरा पापाल्कुन निहकुंतुर. गानि आकिरते पेनदा होंग ओरपोर्रो रेयंता.

17 विस्वासुल्‍कुनिटा! गडसेमताहाटीं मोमोट मिहागटाल लक्‍कु आतोम, गानि मनसुनाल लक्‍कु आया हिल्‍लोम. मर्रा मोमोट वेल्‍लेने आसेते मीवा मोकम हूळना इंचि बच्‍चोरो कोसिस कीतोम. 18 बारित्‍ते माक मिहगा वायागोम इंचि मंता. नना पौलुस, बच्‍चुंगो मल्कां कोसिसगुडा कीतन, गानि देय्यम माक अड्‍डम आयुंदु. 19 मावा आसे आयि, मावा कुसि आयि, मना येसु सामि मर्रा वायानस्के ओना मुन्‍ने मावा पेद्‍दातनमता किरिटम आयि! बतल आंद? मिमेट आयिरा? 20 हो, मावा पेद्‍दातनम, मावा कुसि मिमेटे आंदिर.