1 तिमोति
तिमोतिंकु पौलुसना मोदाटा सिट्‍टि
इस सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 64
इद सिट्‍टि पौलुस ओना मर्रिनसोंटा तिमोतिंकु रासतोर. इपीसि सहरते मनना विस्‍वासुल्‍कुन पेन हुपिस्‍ता हरदाल तप्‍सनाहाटीं तप्‍पुड बोदा कराहनोर वेल्‍लेन लोकुल्‍क तयार आतुर. अय्ते आ तप्‍पुड बोदानाल अगटा विस्‍वासुल्‍कुन बल्हा तपिच्‍चना, ओर्कुन विस्वासमते बल्हा गट्‍टिगा किय्याना, इंका ओर अंटोरतोनि बल्हा कलियसि-मेलियसि बक्‍तिते मनना. इसोंटव वेल्‍लेन पोल्‍लें पौलुस इद सिट्‍टिते रासि तिमोतिंकु हिम्मत हीतोर.
पेन उंदे आंद. इंका पेनदाल लक्‍कु आता अंटोर लोकुल्‍कुन मर्रा पेनतोनि कल्‍पानोरगुडा वरोरे आंदुर. ओरे मनकना रूपमते पुटता पेनदा मर्रि येसु किरिस्‍तु. अंटोर लोकुल्‍कुना पापाल्क मापि आयनाहाटीं येसु कुद्‍दु क्रुसुनपोर्रो ओना जीवातुन हीतोर. इचोने आयका अंटोर विस्वासुल्‍क वेरेतोरतोनि बल्हा मान-मर्यादाते मनना, पेन हुपिस्‍ता हर्दे बल्हा ताकाना इल्‍हा वेल्‍लेन पोल्‍लें तिमोतिंकु इद सिट्‍टिते पौलुस रासि लोहतोर.
बगा बतल मंता
जोहार आनि परिचयम 1:1-2
कलिसिया आनि अगाटा अदिकाराल्‍कुना बारेमते समजांचि वेहामळ 1:3–3:16
तिमोतिंकु ओना कबाह्‍कुना बारेमते समजांचि वेहामळ 4:1–6:21
1
तिमोतिंकु पौलुसना जोहार
इद सिट्‍टि पौलुसुनद आंद. मनम बोनपोर्रो अय्ते आसे पडसि मंतोम, आ किरिस्‍तु येसु आनि मनाकुन कापाळाना पेनदा आदेसताहेंदाल नना किरिस्‍तु येसुना प्रेरित*प्रेरित इद पोरोल्क “पेन लोहचीतोर” इंचि अर्तम. येसु पन्‍नेंड मंदितुन पेरकुत्‍तोर ओरे प्रेरितुल्क आंदुर. आतन. विस्वासमते नावा निजम मर्रि आता तिमोतिंकु इद सिट्‍टि रासतन. मना पेनबाबानाहेंदाल आनि मना सामि येसु किरिस्‍तुनहेंदाल नीकु कुर्पा, दया आनि सांति दोर्कि.
तप्‍पुड बोदानाल जेगर्ता मनना बारेमते
नना मेसिडोनिया राज्येम होननेंके नीकु नना विनंति कीसि वेहतन. दाना परकारम निमे इपीसि सहरते मन्‍नु. निमे अगा मत्‍ते, बोर अय्ते सत्‍तेमकु बदुल वेरे बोदां कराहंतुर, ओर्कुन अल्हा कराहकोंटा आपा. पुट्‍टिचि वेहना कतां, वंसाल्कुना जोलीं ओर होळसियालय आदेस हीम. बारित्‍ते अवुनहेंदाल वाद-विवादकु आंतां विस्वासमहेंदाल जर्गना पेनदा पिलानगुडा पुरागा आयो. ई आदेसता उद्‍देसम, पवित्र गुंडेताल, मनसुना बेस पोल्‍लेताल आनि निजम विस्वासमताल पुट्‍टना पावरम आंद. इच्‍चुर लोकुल्‍क इवनाल तप्‍पिसि वट्‍टि पोल्‍लें वळ्कालय दल्‍गतुर. ओर वेहना पोल्‍लेना अर्तम बतलो ओर्के तेळियाकोन्‍ना, गट्‍टि विस्वासमते ओर, मूसाना नियमाल्कुना गुरुल्क आयाना इनकुंचंतुर.
मूसाना नियमकुने मत्‍ताप बरोबर ताकानय्ते, अद मंचिदे इंचि माकु एरपाटे. इंका इव नियमकु नीतिमंतुल्‍कुनाहाटीं रासमळ जर्गाहिल्‍ले. गानि अव अय्ते, नियमकुन पीसि ताकवोराहाटीं, आदेसकुन पीसि ताकवोराहाटीं, बक्‍ति कियवोर आनि पापि लोकुल्‍कुनाहाटीं, अपवित्र आनि सत्‍तेमते ताकवोराहाटीं, तल्‍लुर-बाबोन हव्कानोराहाटीं, मनकालोर्कुन हव्कानोराहाटीं, 10 बोगमतनम कियानोराहाटीं, मांड्‍सा-मांड्‍सातोनि बोगमतनम कियानोराहाटीं, मनकालोर्कुन दोर्कापीसि अम्मानोराहाटीं, आबद्‍दम वळ्कानोराहाटीं, तप्‍पुड गवाइ वेहानोराहाटीं इंका सत्‍तेम पोल्‍लेन आबद्‍दम कियानोराहाटीं ई मूसाना नियमकु मंतां. 11 तल्‍सकुननालायक पेनदाहेंदाल वाता महिमामय बेसता कबुरतुन नना कराहना इंचि नाकु अप्पजेपमळ जर्गता.
पौलुसुनपोर्रो पेनदा दया मंता
12 मना सामि येसु किरिस्‍तु नाकु बलम हीतोर अदुनहाटीं नना ओन्क दन्यवाद कींतन. इंका नाकुन विस्वासम लायकतोर इन्कुंचि ओना सेवाताहाटीं निलाहतोर. 13 मुन्‍ने नना बदनाम कियुंदुन, तकलिप हियुंदुन, तेंडसि पोहचि वळ्‍कुंदुन. अयना नाकु सामिना दया दोर्कता, बारित्‍ते नना कियानद बतलो तेळियका, अविस्वासमते अल्हा कीतन. 14 मना सामिना कुर्पा नाकु वेल्‍लेन दोर्कता. अचोने आयका, येसु किरिस्‍तु ओनगा मनना विस्वासम आनि पावरमगुडा नाकु हीतोर.
15 पापिर्कुन पिसागोटनाहाटीं येसु किरिस्‍तु इद दुनियाते वातोर. ई पोल्‍ले सत्‍तेम आनि पूरा ओप्कुननालायक मंता. अंटोर्कन्‍ना पेद्‍दा पापिन नना आंदुन. 16 अय्नागानि येसु किरिस्‍तु नापोर्रो दया हुपिस्तोर. अल्हा दया हुपिच्‍चि, मुन्‍ने बोर अय्ते बस्‍केळ्‍क पिस्सना पिस्वर दोर्कना इंचि ओनपोर्रो विस्वासम कींतुरो, ओर्क ओना अंतेम हिलुवा सहनमतुन हुपिचनाहाटीं उंदि उदाहरनता रूपमते नावसोंटा पापिन इरतोर. 17 बस्‍केळ्‍क मनना राजाल, बस्‍केने नासडेम आयवोर, बस्‍केने दिस्सोर असोंटा मावा उंदे पेनदुक पीळि-पीळिनदाका कदर, पेदातनम दोर्कि. आमीन.
तिमोतिना जिम्मेदारिं
18-19 कोको तिमोति! पेनदा कबुरतोर नीवा बारेमते मुन्‍ने बव पोल्‍लें अय्ते वेह्‍चि मत्‍तुरो, आ पोल्‍लेना परकारम, निमे नीवा विस्वासमतुन गट्‍टिगा पीसि, मनसुना बेस पोल्‍ले पीसि वरोर बेस सिपाइलेह्का लडाइ कीसेके मनना इंचि नना नीकु आदेसतुन अप्पजेपसंतन. बारित्‍ते मनसुना पोल्‍लेतुन हय्सका वेल्‍लेन मंदि लोकुल्‍क, उंदि डोंगा रोंडु तुकडां आसोत्‍ताप, ओर ओरा विस्वासमतुन नासडेम कीकुत्‍तुर. 20 विस्वासमतुन नासडेम कीकुत्‍तोरव्टेटाल हुमिनयुस आनि सिकंदर ईर इव्वुर मंतुर. पेनदुन बदनाम कियाकोंटा बल्हा मनना इत्‍ता पोल्‍ले करियना इंचि नना ईर्कुन देय्यम्‍क अप्पजेपतन.

*1:1 प्रेरित इद पोरोल्क “पेन लोहचीतोर” इंचि अर्तम. येसु पन्‍नेंड मंदितुन पेरकुत्‍तोर ओरे प्रेरितुल्क आंदुर.