1 विस्वासुल्‍कुनिटा! मीक आकिरते वेहानद बतल इत्‍ते, सामिना पोल्‍ले मीलोप्‍पो पैलांचतापे, वेरेतोरा लोप्‍पोगुडा बिराना पैलांचि पेद्‍दातनम दोर्कनाहाटीं पारतना कीम्‍टु. 2 अल्‍हेने अंटोर लोकुल्‍क विस्वासुल्‍क आयुर, अदुनहाटीं तेडा आनि दुस्‍ट लोकुल्‍कुनाल पेन माकुन पिसागोट्‍टि. 3 गानि सामि विस्वासमगल्‍लोड आंदुर; ओर मीकुन देय्यमता कयदाल कापाळसि गट्‍टिगा निलाहंतोर. 4 मोमोट आदेस हीताप मिमेट ताकसेके मंतिट. मुन्‍नेगुडा अल्हे ताकंतिर इंचि सामिन लोप्पो माक मीवा बारेमते बरोसा मंता. 5 सामि मीवा मनसुकुन पेनदा पावरमते अल्‍हेने किरिस्‍तुना गट्‍टि ओप्‍केते ताकसा परांतोर.

6 विस्वासुल्‍कुनिटा! बोर अय्ते लंडु आसि मंतुर, मोमोट वेहता रीति-रिवाज परकारम ताकसेक हिल्‍लुर, असोंटा हरेक मनकानाल लक्‍कु मंटु इंचि मना सामि येसु किरिस्‍तुना पोरोलते मीक आदेस हीसेक मंतोम. 7 मोमोट मीवातोनि मत्‍तस्के लंडु आसि मना हिल्‍लोम, अदुनहाटीं मालेसीं बल्हा ताकाना इंचि मीक कुद एरपाटे मंता. 8 मोमोट बोनगागुडा पुक्‍कटता गाटो तिना हिल्‍लोम, मी लोप्पोटाल बोनके बर्वु आयामन्‍नि इंचि नर्का-पिय्यल कबळ, कस्‍टम कीसि गाटो तित्‍तोम. 9 माक मीपोर्रो बर्वु आयाना अदिकारम हिल्‍ले इत्‍ताप आयो, गानि मिमेटगुडा मावालेसीं मंदना इंचि मीक हुप्‍सालय मोमोट कबळ कीसि तित्‍तोम. 10 मोमोट मीवातोनि मत्‍तस्के, “बोर्कन्‍नागिंटा कबळ कियानद हिलाकोंटे, ओर गाटो तिनामन्‍नि” इंचि आदेस हीसि मत्‍तोम. 11 गानि मिहगा इच्‍चुर लोकुल्‍क लंडोर्क मंतुर, ओर बतले कबळ किय्युर, सिराप इंकावरोना जोलिक होनना कबाह्‍क कीसेके मनंतुर इंचि मोमोट केंजतोम. 12 असोंटा लोकुल्‍क चुपचाप कबळ कीसि ओरा पिस्वरता कमाइ कियिरकांटी, ओर्क मोमोट सामि येसु किरिस्‍तुना पोरोलते आदेस हीसि, बुद्‍दि वेहंतोम. 13 विस्वासुल्‍कुनिटा! मिमेट बेसता कबाह्‍कुने नेरबळताप मनमट. 14 बोरन्‍नागिंटा इद सिट्‍टिते रासता पोल्‍लेन केंजसि ताकाकोंटे, ओनपोर्रो नदर इर्राट, ओनकु सिग्गु वायागोम इंचि ओनतोनि दंटा पियमट. 15 अयना ओन पगातोनलेसीं हूळमट, गानि तम्मुनालेसीं ओन्क वेर्रे वेहाट.

16 कुद सांति हियना सामि, बस्‍केळ्‍क अन्‍नि तीरुकुने मीक सांति हिय्यिर, बस्‍केळ्‍क मी अंटोरतोनि मन्‍निरकांटी. 17 नना पौलुसुन आंदुन, नावा कयदेने मीक जोहार रासेक मंतन. अन्‍नि सिट्‍टिने इद नावा आनवल आंद, नना इल्हे रासंतन. 18 मना सामि येसु किरिस्‍तुना कुर्पा मी अंटोरतोनि मन्‍निकांटी.