1 विस्वासुल्‍कुनिटा! इंदके मना सामि येसु किरिस्‍तु मर्रा वायाना बारेमते, आनि मनम जमा आसि ओनतोनि कलियाना बारेमते मीक विनंति कीसेके मंतोम. 2 अद बतल इत्‍ते, सामि मल्सि वायाना रोजु वाता इंचि मिमेट आत्माताहेंदाल*आत्माता बविस्यवानि. आयि, पोल्‍लेताहेंदाल आयि, मावाहेंदाले सिट्‍टि वाता इत्‍ताप आयि मीक केंजा वाते, मीवा मनसुन हीके-हेके आया हियमटु, वेरियमट. 3 बोरे आयिर बदे रीतुने मीकुन दोका किया हियमटु; बारित्‍ते मुन्‍ने वरोना पोल्‍ले वरोर केंजाकोंटा आयाना कालम वायार, पजा पेनदा पोल्‍लेतुन विरोद कियाना नासडेमता मर्रि दिस्‍सानुर, दाना पजाने किरिस्‍तु मर्रा वायाना रोजु वायार. 4 आ नासडेमता मर्रि, पेन इंचि इनानवुन अन्‍निन, मनकालोर मोळ्‍कानवुन अन्‍निन विरोद कीसि, ओनद ओरे पेद्‍दोन इंचि वेहकुंतोर. ओर पेनदालेसीं पेनदा गुळिते होंचि उद्‍दानुर, आनि ननाने पेनदुन इंचि वेहकुनानुर.

5 नना मीवातोनि मत्‍तस्के इव पोल्‍लें वेहतन, मीक मति हिल्‍लेना? 6 पेनदा पोल्‍लेक विरोदमते तिरियानोर ओना वेला वातारित्‍तेन दिस्‍सानुर, इंदके ओन बतल आपसेके मंतानो मीक एरपाटे मंता. 7 पेनदा पोल्‍लेतुन विरोद कियानोना मर्ममता ताकत इंदकेगुडा कबळ कीसेकेन मंता; गानि दान आपानोन पक्‍कक कियानादाका पेन ओन आपसेकेने मनंता. 8 बस्के अय्ते पेनदा पोल्‍लेतुन विरोद कियानोर दिस्‍सानुर, अस्‍के येसु सामि ओना तोळ्‍दा ऊपिरते ओन हव्‍किसि, ओर वायानेंके दिस्‍सना वेलगुने ओन नासडेम कियानुर. 9 पेनदा पोल्‍लेतुन विरोद कियानोर वायमळ इत्‍ते, देय्यमतदे उंदि कबळ आंदु, ओर वासि आबद्‍दम पोल्‍लेने देय्यमतव अन्‍नि ताकतकुनतोनि चिन्‍हां, इचंत्रमता कबाह्‍क कियानुर. 10 पजा कराब कबाह्‍क कीसि नासडेम आयानोर्कुन अन्‍नि तीरुकुने पसांचंतोर. बारित्‍ते बद सत्‍तेमतुन अय्ते पावरमते ओप्‍कुंचि मत्‍ते मुक्‍ति दोर्किस मनवळ, ओर अदुन ओप्पकुन्‍ना हिल्‍लुर. 11 अदुनहाटीं ओर आबद्‍दमतुने विस्वासम किय्‍यिर इंचि पेन ओरा लोप्पो गयबेत कियाना सक्‍तितुन लोहंता. 12 बचुटुर अय्ते सत्‍तेम पोल्‍लेतुन विस्वासम कियवा, कराब कबाह्‍कुने कूस आंतुर, ओर अंटोर्क पेन सिक्‍साता आदेस हिय्यार. 13 सामिना पावरमगल्‍ला विस्वासुल्‍कुनिटा! मिमेट पवित्र आत्माताहेंदाल पवित्र आसि, सत्‍तेमते विस्वासम इर्सि पिसालय पेन मीकुन मुन्‍नेने पेरता. अदुनहाटीं माकु मीवा बारेमते पेनदुक बस्‍केळ्‍क दन्यवाद कियमळ गावाले. 14 इल्‍हा मिमेट मना सामि येसु किरिस्‍तुना महिमातुन दोर्किच्‍कुनना इंचि, पेन मोमोट वेहता बेसता कबुरताहेंदाल मीकुन केयता. 15 अदुनहाटीं विस्वासुल्‍कुनिटा! गट्‍टिगा निल्‍सि मंटु, मावा तोळ्‍दाल पेय्सता पोल्‍लेहेंदाल, सिट्‍टिताल बव रीति-रिवाजकु अय्ते मीक कराहतोम अवुन पीसि ताकट. 16 मना सामि येसु किरिस्‍तु आनि पेनबाबाल मनाकुन पावरम कीसि, ओना कुर्पाहेंदाल बस्‍केळ्‍क मनना सांति, बेसता आसे हीतोर. 17 मीवा हरेक बेस कबळते, हरेक पोल्‍लेते पेन मीकुन गट्‍टिगा किय्‍यिकांटी, इंका मीवा मनसुने सांति हिय्यिकांटी.