2 तेसलोनि
तेसलोनि विस्वासुल्कुंक पौलुसना रोंडो सिट्टि
इद सिट्टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 50-54
इद सिट्टि पौलुस रासतद आंदु. पौलुस तेसलोनि सहरता विस्वासुल्कुंक मोदाटा सिट्टि रासता कोन्नि रोजकुना पजा, अगाटा विस्वासुल्कुना लोप्पो पूना परिस्तिति सुरुव आता. अद बतल इत्ते, “सामि मल्सि वायाना रोजु वाता” इंचि रासतदुन ओर बच्चुंगो तीरकुना अर्ताल्कु तेंडालय दल्गतुर. इच्चुर लोकुल्कुनद सामिना न्यायम सुरुव आता इंचि ओरा विचारम मत्ता. अदुनहाटीं दुनिया मुळगाना वेला दग्गेरेने मंता इंचि कबळ कियाकोंटा, ओर लंडु आसि मनुंदुर.
इसोंटा तप्पुड विचाराल्क, ओरा मनसुनाल तेंडसि पोहालय पौलुस तेसलोनि सहरता विस्वासुल्कुंक रोंडो सिट्टि रासतोर. अल्हेने, “सामि मल्सि वायाना रोजु वाता” इंचि इच्चुर इनुंदुर, अद पोल्ले ओर्क बेस तेळियागोम इंचि पौलुस इद सिट्टि रासतोर.
बगा बतल मंता
जोहार आनि परिचयम 1:1-2
स्तुति आनि आदेसाल्क 1:3-12
किरिस्तु मर्रा वायना बारेमते समजांचि वेहामळ 2:1-17
किरिस्तु वेहताप पिस्साना बारेमता बोदां 3:1-15
आकिरता बोदां 3:16-18
1
जोहार
1-2 नना पौलुस,*इद सिट्टि पौलुस रासतोर, सिल्वानुस आनि तिमोति ओनतोनि नमस्कारम वेहतुर. सिल्वानुस आनि तिमोति मोमोट इद सिट्टि मीकु तेसलोनि सहरते मंदना कलिसियातोर्कुंक रासेक मंतोम. मना पेनबाबाल आनि सामि येसु किरिस्तुनाहेंदाल कुर्पा, सांति दोर्किकांटी.
तेसलोनि विस्वासुल्कुना विस्वासम आनि पिस्वर
3 विस्वासुल्कुनिटा! मीवा विस्वासम वेल्ले बेरस्सेक मंता, मिमेट वरोन-वरोर कीकुनना पावरम वेल्ले बेरस्सेक मंता. अदुनहाटीं मोमोट बस्केळ्क मीवा बारेमते पेनदुक दन्यवाद कियमळ गावाले. इदे बरोबर मंता. 4 अचोने आयाका मिमेट तकलिपकुन, बादन ओप्के पीसि पेनदा लोप्पो गट्टिगा विस्वासमते निल्सि मंतिर. अदुनहाटीं मोमोट मीवा बारेमते पेनदा कलिसियाने पेद्दातनम वेहकुंचेके मंतोम. 5 इद पेनदा सत्तेम न्यायमता रुजुव आंदु. मिमेट पेनदा राज्येमते होननालायक आयागोम इंचि इवन्नि बादां अरसेक मंतिर. 6 बोर अय्ते मीकुन तकलिप कींतुर, दानकु बदुल पेन ओर्क तकलिप हियमळ न्यायमे आंद. 7 बस्के अय्ते सामि येसु ओना बलमगल्ला दूतनतोनि पोत्तना तळमिते स्वर्गमताल दिस्सानुर, अस्के तकलिपते मत्तोर्कुंक आनि माकु सांति हियानुर. 8 बोर अय्ते पेनदुन एरपाट किय्युर, बोर अय्ते मना सामि येसुना बेसता कबुरतुन पीसि ताकुर, ओर्क पेन सिक्सा हिय्यार. 9 ओर सामिना मुन्नेटाल आनि ओना ताकतता महिमाताल लक्कु आसि ओर्क बस्केळ्क मनना नासडेमता सिक्सा आयार. 10 बस्के अय्ते येसु सामि मर्रा वायानुर अस्के ओना पवित्र लोकुल्कुनाहेंदाल महिमा एतंतोर आनि विस्वासम कीतुर अंटोराहेंदाल ओर पेद्दातनम दोर्किच्कुंतोर. बारित्ते मोमोट वेहता गवाइतुन मिमेट विस्वासम कीतिट. 11 इदुनहाटीं, मना पेन मीकुन बताहाटीं अय्ते केयता अदुनलायक मिमेट मनालय, अन्नि बेसता कबाह्क पूरा कियालय आनि विस्वासमतव पूरा कबाह्क पेनदा ताकततोनि पूरा आयालय मोमोट मीवाहाटीं बस्केळ्क पारतना कीसेके मंतोम. 12 इल्हा मना पेन आनि मना सामि येसु किरिस्तुना कुर्पातुन पीसि, मीवाहेंदाल मना येसु सामिना पोरोल्क कदर दोर्काना आनि ओनहेंदाल मीक कदर दोर्काना.