2 योहान
योहान रासता रोंडो सिट्टि
इद सिट्टिता बारेमते गिचचो परिचयम
रासतोना पोरोल: योहान
रासता कालम: इसवि सन 85-95
येसुन नम्मुकुत्ता विस्वासुल्कु बद सत्तेमतुन पीसि ताकाना? येसु किरिस्तु मनकना रूपमते पुट्सि वायाहिल्लोर इंचि वेहानोर वेल्लेन मंदि मंतुर. अय्ते ओरागटाल बल्हा जेगर्ता मंदगोम? मनम कीता विस्वासमता पलम पुरागा दोर्कनदाका मुन्ने बल्हा पिस्साना? तप्पुड बोदां कराहना गुरुल्कुन एरपाट कीसि, ओरा बोदानाल लक्कु मनना. इसोंटा पोल्लेना बारेमते योहान इद सिट्टिते रासतोर.
बगा बतल मंता
जोहार आनि परिचयम 1-3
पावरम कियमळ बारेमता पोल्ले 4-6
तप्पुड बोदां कराहनोरागटाल जेगर्ता मंटु 7-11
आकिरता बोदां 12-13
1
वरोंक-वरोर पावरम कियमळ बारेमता पोल्ले
1-2 नना मीवा कलिसियाते बेस पोरोल होत्ता मनकन आंदुन. पेन पेरता बाई आनि दाना पिलाल्कुंक,*पेन पेरता बाई आनि दाना पिलाल्कुंक दीना अर्तम पेन पेरता कलिसियातोर. योहान इद सिट्टि इदे कलिसियाकु रासतोर. इद सिट्टि रासेके मंतन. नना मीकुन पावरम कींतन. नना वरोने आयो, पेनदा सत्तेमतुन तेल्पिचकुत्तोर अंटोरे मीकुन पावरम कींतुर. बारित्ते, मनम सत्तेमतुन तेल्पिचकुत्तोम. अदुनहाटीं अद सत्तेम मना पिस्वरतगा निल्सि मंता आनि बस्केळ्के अद मनातोनि मनंता. 3 पेनबाबानहेंदाल आनि पेनबाबाना मर्रि येसु किरिस्तुनहेंदाल कुर्पा, दया, सांति इव सत्तेमते आनि पावरमते बस्केळ्क मनातोने मन्निंकांटी.
4 पेनबाबाल मनाकु हीता आदेस परकारम, नीवा इच्चुर पिलाल्क, सत्तेमते ताकानदुन हूळसि नाकु वेल्लेन कुसि आसेके मंता. 5 अय्ते बाई! नना मीकु बतल विनंति कीसेके इत्ते, मनम वरोंक-वरोर पावरम कियाना. इदु पूना आदेस इंचि नना मीकु रासेक हिल्लेन, गानि मुन्नेटाल मनगा मत्तादे आंद. 6 मिमेट सुरुवनाल बतल अय्ते केंजतिरो, अल्हेने वरोंक-वरोर पावरम कीम्टु इंचि पेन आदेस हीता. आ आदेसकुना परकारम ताकमळे पावरम कियमळ आंद.
तप्पुड बोदां कराहनोरागटाल जेगर्ता मंटु
7 येसु किरिस्तु मनकना रूपमते पुट्सि वायाहिल्लोर इंचि वेह्चि पसांचनोर वेल्लेन लोकुल्क इद दुनियाते पेय्सतुर. इसंटोरे हूळा! पसांचनोर आनि किरिस्तुना पगातोर्क. 8 मोमोट कीता कबाह्क, मीहेंदाल एर्तम आयाकोंटा हूळकुंटु. कीता कबाह्कुना पुरागा इनाम दोर्कानादाका जेगर्ता मंटु. 9 किरिस्तु कराहता बोदा परकारम ताकाकोंटा बोर अय्ते मुन्ने-मुन्ने दांतोर, ओर पेनतोनि कलिया हिल्लोर. गानि बोर अय्ते किरिस्तु कराहता बोदा परकारम ताकंतोर, ओनतोनि पेनबाबाल, मर्रि इव्वुरगुडा मनांतुर.
10 ओक्कला बोरन्ना मिहगा वासि, किरिस्तु कराह्ता बोदा तप्पा वेरे बोदा कराहनय्ते, ओन मी लोता लोप्पो वाया हियमटु, इंका ओन्क जोहारगुडा कियमट. 11 बारित्ते, बोर अय्ते असंटोन हेरा हींतोर, ओर ओना तप्पुड कबाह्कुने कलियसि मत्तोना लेक्काते वांतोर.
आकिरता जोहार
12 इंका वेल्लेन पोल्लें मीहाटीं रासाना इंचि नावा मनसु मंता. गानि अवुन नना साइते कायदोमपोर्रो रासोन. बारित्ते, मिहगा वासि मीकुन कलियसि, मीतोने अन्नि पोल्लें वळ्काना इंचि मनसुने आसे पडसेक मंतन. अस्के मना कुसि इत्तदगुडा पुरागा आंता. 13 पेन पेरता मीवा अक्कना पिलाल्क,†पेन पेरता मीवा अक्कना पिलाल्क योहान इदे कलिसियाताल इद सिट्टि रासि लोहातोर. मीकु जोहार वेहासेक मंतुर.