3 योहान
योहान रासता मूडो सिट्‍टि
इद सिट्‍टिता बारेमते गिचचो परिचयम
रासतोना पोरोल: योहान
रासता कालम: इसवि सन 85-95
अद कालमते तप्‍पुड बोदां कराहनोर वेल्‍लेन मंदि वासि कलिसियातुन पाड किय्युंदुर. गानि अव्टेटाल इच्‍चुर सत्‍तेम बोदां कराहनोरगुडा मत्‍तुर. अय्ते कलिसियाते पेद्‍दा इंचि निल्ता मनकल, कलिसियाता कळमातोर्कुन आनि पलाताल कलिसियाते वायाना हेडमितोर्कुन बल्हा हूळकुनना? इदुना बारेमते योहान रासतोर. तप्‍पुड बोदानोर्कुन एरपाट कीसि ओरागटाल लक्‍कु मनना आनि सत्‍तेम बोदां कराहनोर्कुंक सहायम कियाना, इल्‍हा अंटोर्कुनगुडा कलिसियाता पेद्‍दा मनकल बेस हूळकुनागोम इंचि योहान इद सिट्‍टिते रासतोर.
बगा बतल मंता
जोहार आनि परिचयम 1-4
गयेसुंक जोहार वेहमळ 5-8
दियुतिरपेसना बारेमते 9-10
देमेतिरयुसना बारेमते 11-12
आकिरता बोदां 13-15
1
योहानुनाहेंदाल गयेसुंक जोहार
नना योहानुन, कलिसियाते बेस पोरोल होत्‍ता वरोन मनकन आंदुन. नना बोन अय्ते निजमते पावरम कींतन आ गयुसुंक इद सिट्‍टि रासेक मंतन. पावरमगल्‍ला दंटातोना! निमे बक्‍तिते पेनतोनि बल्हा बेस मंचंतिनो, अन्‍नि पोल्‍लेनेगुडा निमे अल्‍हेने मन, नीकु बदे रोगम वायाकोंटा निमे बस्‍केळ्‍क सुकमते मनना इंचि नना पारतना कीसेके मंतन. बारित्‍ते, गयुस निजमे सत्‍तेमते ताकसंतोर इंचि इच्‍चुर दादालोर निहागटाल वासि, नीवा बारेमते गवाइ वेहतुर. अदुन केंजसि नाकु वेल्‍लेन कुसि आता. नावा पिलाल्क सत्‍तेमते ताकसेक मंतुर, इत्‍ता पोल्‍ले नाकु वेल्‍लेन कुसितुन हींता. दीनकु तप्‍पा इंका बद्‍दे पोल्‍ले केंजसि नाकु इच्‍चोन कुसि आयो.
पावरमगल्‍ला दंटातोना! निमे एरपाट कियवोर निहगा वायिनागानि, वाता दादालोराहाटीं निमे बतल अय्ते कींतिनो, अद निमे वेल्‍ले विस्वासमतोनि कींतिन. ओर दादालोर नीवा पावरमता बारेमता गवाइ कलिसियाते वेहतुर. पेनदा लोकुल्‍कुन बल्हा अय्ते सार्ला कींतुरो अल्हा, निमे ओरा सेवा कीसि सार्ला कियानय्ते, नीवाहाटीं इंका बेस मनंता. बारित्‍ते ओर किरिस्‍तुना सेवाहाटीं पेय्‍स्‍तुर आंद. विस्वासम कियावोराहेंदाल ओर बतले सहायम येतुर. असोंटा मनकालोर्कुंक मनम सहायम कीसि ओर्कुन बेस हूळना. अस्‍के मनमगुडा सत्‍तेमताहाटीं कबळ कियानोरा लेक्‍काते वांतोम.
दियुतिरपेस आनि देमेतिरयुस
नना कलिसियातोर्क उंदि सिट्‍टि रासि लोहतन. गानि कलिसियाते पेद्‍दा आयालय हूळना दियुतिरपेस इनानोर नना वेहानदुन ओप्‍कुंचेक हिल्‍लोर. 10 अचोने आयका, कलिसियाते पूनें वायाना विस्‍वासुल्‍कुन ओर अय्ते बेस हूळोर आनि हूळकुंतोम इनानोर्कुनगुडा बेस हूळा हिय्योर. इंका बोर अय्ते बेस हूळकुंतुरो ओर्कुन कलिसियाताल पलाते पेच्‍हांतोर. मावा बारेमते कराब-कराब पोल्‍लें वळ्कंतोर, अदुनहाटीं नना बस्के अय्ते वांतन, अस्‍के ओना बारेमते कलिसियाते अंटोर्क वेहांतन.
11 पावरमगल्‍ला दंटातोना! निमे ओनालेसीं कराबता जोलिक होन्‍मा, सिराप बेस बतल अदे कीसेके मन. बेसता कबाह्‍क कियानोर पेनदा मनकल आंदुर, सेड्‍डा कबाह्‍क कियानोर पेनदा मनकल आयोर.
12 देमेतिरियुसना बारेमते अंटोरगुडा बेसतोर इंचि गवाइ वेहांतुर. पेनदा सत्‍तेमते ताकतोर इंचि सत्‍तेमता नदरतेगुडा ओर बेस मनकल आंदुर. ओर बेसतोर इंचि ननागुडा गवाइ हींतन, नावा गवाइ सत्‍तेम इंचि मीकु अय्ते एरपाटे मंता.
आकिरता जोहार
13 नीकु वेहालय नहगा इंका वेल्‍लेन पोल्‍लें मंतां, गानि साइतोनि ई कायदोमते रासमळ नाकु इस्‍टम हिल्‍ले. 14 बिरानेन नीकु कलियना इंचि नना आसे पडसेक मंतन. कलियतस्‍के, मनम मोकोम मुन्‍नेन वळ्‍क्‍कुनकोम. 15 पेन बाबल हिय्यना सांति बस्‍केळ्‍क नीतोनि मन्‍निकांटी. इग्‍गेटा नीवा दंटागाह्‍क नीकु जोहार वेहासेक मंतुर. अगा मनना अंटोर दंटागाह्‍कुंक पोरोल येत्‍सि नावा जोहार वेहा.