1 नना यहुदन, येसु किरिस्‍तुना सेवकुन आनि याकोबुना तम्मुन आंदुन. पेनबाबाल मीकुन केय्‍सि पावरम कीतोर आनि येसु किरिस्‍तुना कय्‍दे कापाळसेक मंतोर, मी अंटोर्क नना जोहर कींतन. 2 मीक दया, सांति, पावरम वेल्‍लेन दोर्किकांटी.

3 पावरमगल्‍लोरिटा! मनाक अंटोर्क दोर्कता मुक्‍तिता बारेमते मीकु रासाना इंचि इनकुंचेके मत्‍तन, गानि इंदके विस्वासमता बारेमते रासि दाना सत्‍तेमतुन कापाळनाहाटीं मीक तेळियागोटसि वेहाना इंचि नाक अव्‍सरम अनपिस्ता. ई सत्‍तेमतुन पवित्र लोकुल्‍कुंक बस्‍केळ्‍ताहाटीं उंदे मल्का हियमळ जर्गता. 4 बारित्‍ते चुपचाप इच्‍चुर लोकुल्‍क मीलोप्‍पो होळियतुर, ओर पेनदा बक्‍तुल्क आयुर. ओर पेनदा कुर्पातुन बिगडांचि पापमता कबाह्‍क कियानाहाटीं मना वरोरे मालक सामि येसु किरिस्‍तुन ओप्‍कुन्‍नुर. असंटोर्क सिक्‍सा आंता इंचि मोदाटाले दर्मसास्‍त्रमते रासि मंता. 5 मीक इवन्‍नि पोल्‍लें मोदाटाले एरपाट मंतां, अय्नागानि इव पोल्‍लें मीक मति कीसि हींतन इंचि इनकुंचेके मंतन. पेन दाना लोकुल्‍कुन इजिप्‍त देसेमताल पेचाह्ता पजा बोर अय्ते दान विस्वासम किया हिल्‍लुर, ओर्कुन नासडेम कीता. 6 अचोने आयाका, बवय्ते पेनदा दूतां अवुना अदिकारमता जेगान इर्रा हिल्‍लें, अल्हेन अव जेगान होळ्‍सीतां, पेन अवुनगुडा न्‍यायम कियाना रोजुनहाटीं हीकटते बस्‍केन नेम्मुवा गोल्सुल्कुने दोहचि इर्ता. 7 अल्‍हेने सदोम, गमोरा सहरतोर, अल्हेन पकापीसि मत्‍ता सहरकुनोर व्यबिचारम कीतुर आनि परायतोर पज्जो अर्सि मत्‍तुर. इद उंदि उदाहरनलेसीं, ओर बस्‍केळ्‍क पोत्‍तना तळमिते सिक्‍सा बोगांचेक मंतुर. 8 अल्‍हेने कलां*कलां मनसुने इनकुनमळ गुडा कलांगे आंदुं. हूळना लोकुल्‍कगुडा मेंदुल्तुन पापमते अरहंतुर, पेनदा अदिकारमतुन हय्सुर आनि स्वर्गमकु संबंदिंचि मत्‍तोर्कुना अपमानम कींतुर. 9 गानि पेनदा पेद्‍दा दूता मिकायेलगुडा बस्के अय्ते मूसाना पीनगुना बारेमते देय्यमतोनि लोल्‍लि कीता, अस्‍के अदुन बतले अपमानम आयानसोंटा पोल्‍लें इना हिल्‍ले गानि, “पेने नीकुन तेरहिकांटी” इंचि सिराप इच्‍चोने इत्‍ता. 10 ई लोकुल्‍कुंक बव पोल्‍लें अय्ते तेळियों अवुन हय्सुर, गानि बुद्‍दि हिल्वा जिवरासिनलेसीं बव पोल्‍लें अय्ते ओर्क तेळियंतां अवुनाहेंदाले ओर नासडेम आंतुर. 11 अय्यो, बच्‍चोर गोसा आयार! बारित्‍ते ओर काइन ताकता हर्दे ताकतुर, पाय्दाताहाटीं बिलाम इनानोर कीता तप्पु कीतुर आनि कोरह बल्हा विरोद कीसि नासडेम आतोर, अल्हे ईरगुडा नासडेम आंतुर. 12 ईर, मिमेट कलियसि-मेलियसि तिंदना बोजनाल्‍कुन हेळाह्‍नोर आंदुर, इंका मीवातोनि उद्‍दिस सिग्गु हिलाकोंटा तिंचि पीर निहकुंतुर. ओर वळितोनि वित्‍ताना मब्बुनसंटोर आंदुर. आकिं रालाना कालमते कायां हिलाका रोंडु मल्कां हासि पीकिसि पोहता मराकुनसंटोर आंदुर. 13 ओर, समुद्रमता तडाने एतपोर्रो तेलाना कराब पोंगुरतालेसीं सिग्गु हिल्वा कबाह्‍क कियानोर आंदुर. ओर हर्रि तप्‍सि तिरियना सुक्‍कानसंटोर आंदुर. ओराहाटीं बस्‍केन मारवा हिर्र-हीकट तयार कीसि मंता. 14-15 आदामनगटाल एडुंगो पीळितोर हानोक इनानोर ईरा बारेमते इल्‍हा बविस्यवानि कीतोर, “हूळा, सामि वेय्‍कुना पवित्र लोकुल्‍कुनतोनि अंटोरा न्‍यायम कियालय वांतोर. ओर अंटोर बक्‍ति हिल्वा लोकुल्‍क ओर कीता अन्‍नि तप्‍पुड कबाह्कुनाहाटीं अल्हेन बक्‍ति हिल्वा पापि लोकुल्‍क सामिंक विरोदमते वळ्‍कतव अन्‍नि पोल्‍लेनाहाटीं ओर्क सिक्‍सा हियमळ जर्गंता,” इंचि वेहतोर. 16 इसोंटा लोकुल्‍क गुल्‍गसेक मनानोर, नसीब बरोबर हिल्‍ले इनानोर, ओरा इच्‍चां मत्‍ताप ताकानोर, पेद्‍दिरकेम पोल्‍लें वळ्कानोर, सतता पाय्दाताहाटीं तिय्यटा पोल्‍लें वळकानोर आंदुर.

17-18 पावरमगल्‍लोरिटा! मना सामि येसु किरिस्‍तुना प्रेरितुल्‍कु मीवातोनि मुन्‍नेने, “आकिर वेलाते बक्‍ति हिल्वा इच्‍चां मत्‍ताप ताकानोर, मीकुन सिडांचंतुर,” इंचि वेहतुर, इव पोल्‍लेन मिमेट मति कीम्‍टु. 19 ई लोकुल्‍क मीलोप्‍पो वरोनद-वरोंक अर्राकोंटा कींतुर, ईरा मनसुंक वाताप ताकंतुर, ईरा लोप्पो पेनदा आत्मा हिल्‍ले. 20 गानि पावरमगल्‍लोरिटा! पवित्र आत्माते पारतना कीसेके वेल्‍ले पवित्र विस्वासमते मीवद मिमेट बेर्सेक होंटु. 21 बस्‍केळ्‍क मनना पिस्वरताहाटीं मना सामि येसु किरिस्‍तुना दयाता आसेते एदुर हूळसेक पेनदा पावरमते निल्‍सि मंटु. 22 बोर अय्ते विस्वासमतुन अनमानम कींतुर, ओरापोर्रो दया कीम्‍टु. 23 तळमिताल इग्‍गिस पिस्‍सागोटताप इच्‍चुर्कुन पिस्‍सागोटट आनि वेल्‍लेटोरा पोर्रो वेर्रेतोनि मिमेट दया कीम्‍टु. गानि मेंदुल्ते कियाना पापाल्कुन मिमेट हय्समट. 24 पेन मीकुन तप्‍पुळ बोदानाल हिळु अर्राकोंटा कापाळसि, दाना महिमाता मुन्‍ने आनंदमते आनि दोसेम हिलाकोंटा निल्‍हा परांता, 25 अद उंदे पेनदुक, मनाकु मुक्‍ति हियानोर सामि येसु किरिस्‍तुनाहेंदाल, महिमा, पेद्‍दातनम, ताकत, अदिकारम मुन्‍नेटा कालमते मत्‍ताप इद कालमते आनि युगा-युगाल्‍कुनदाका मन्‍निकांटी, आमीन.