पेन हुपिस्ता पोल्लें
योहानुंक पेन हुपिस्ता पोल्लें
इद पुस्तकमता बारेमते गिचचो परिचयम
रासतोना पोरोल: योहान
रासता कालम: इसवि सन 96
इद पुस्तकम येसु सामिना वरोर सिस्युड योहान रासतोर. येसुन नम्मुताहाटीं ओन पतमोस दीबेते मनना जेलने वाटतुर. ओर जेलने मननेंकेन, वायाना कालमते जर्गाना पोल्लें येसु सामि ओन्कु हुपिस्तोर. अवे पोल्लेन योहान ई पुस्तकमते रासतोर.
अद कालमते लोकुल्क येसुनपोर्रो विस्वासम कीताहाटीं, रोम सरकार वेल्ले तकलिप हियुंदु. गानि कस्टाल्क, तिप्पल्क अय्ते वायनुंगे, अयना बोर अय्ते आकिरदाका विस्वासमते गट्टिगा निल्सि मनांतोर, ओन्के पिस्वरता इनाम दोर्कंता, इल्हा वेहचि येसु सामि आ तकलिपते मत्ता विस्वासुल्कुना विस्वासमतुन गट्टिगा कीतोर. येसु सामि मर्रा मल्सि वायानादाका बोर अय्ते विस्वासमते गट्टिगा मनंतुर, ओर्क पूना बूमि, पूना मब्बु, पूना येरुसलेम दोर्कंता इंचि येसु सामिनाहेंदाल योहान ई पुस्तकम रासतोर.
बगा बतल मंता
जोहार आनि परिचयम 1:1-8
एडुं कलिसियानोर्क रासता सिट्टिं आनि अवुना मुक्य उद्देसम 1:9–3:22
एडुं सिक्कां तंचि मत्ता पुस्तकम 4:1–8:5
एडुं तूताकोम्कु 8:6–11:19
मासुल तरास आनि रोंडु जिवरासिं 12:1–13:18
तीराता दर्सनाल्क 14:1–15:8
पेनदा होंगुना एडुं वाटिं 16:1-21
बेबिलोनता नासडेम आनि देय्यमता ओडुमळ 17:1–20:10
आकिरता न्यायम 20:11-15
पूना स्वर्गम, पूना बूमि, पूना येरुसलेम 21:1–22:5
आकिरता बोदां 22:6-21
1
योहानुंक पेन हुपिस्ता पोल्लें
1 इव पोल्लें, वायाना कालमते बिरानेन जर्गानव आंदुं, इवुन येसु किरिस्तु ओना सेवाकुल्कुंक वेहना इंचि पेन ओन्क अप्पजेपता. अस्के येसु ओना उंदि दूतातुन योहान इनना वरोन सेवाकुनगा लोहचि, ओन्क रासालय वेहतोर. 2 अस्के ओर पेनदा पोल्लेता बारेमते, येसु किरिस्तुना गवाइता बारेमते आनि ओर हूळता अन्नि पोल्लेना बारेमते गवाइ वेहतोर. 3 पेनदाहेंदाल वाता ई वायाना कालमते जर्गना पोल्लेन बोर अय्ते हदवंतुर, केंजांतुर आनि अव्टे रासि मत्ता परकारम ताकंतुर ओर आसिर्वाद दोर्कतोर आंदुर. बारित्ते इव पोल्लें जर्गना वेला दग्गेर्क एवता.
योहान येसुना पोल्लेन एडुं कलिसियानोर्क वेहांतोर
4-5 आसिया राज्येमते मनना एडुं कलिसियानोर्क नना योहानुन बतल रासेक इत्ते, इंदके मनानद, मोदोलताल मत्तद आनि मुन्ने वायाना मंता आ पेनदाहेंदाल, दाना राजगद्देता मुन्ने मनना आ एडुं आत्मानाहेंदाल इंका विस्वासमलायक गवाइ मत्ता येसु किरिस्तुनाहेंदाल मीकु कुर्पा, सांति दोर्किकांटी. येसु हातोराव्टेटाल जीवाते तेदता मोदाटा मनकल आंदुर. ओर ई बूमिपोर्रोटा राजालोरा राजाल आंदुर. मना अंटोर्कुन पावरम कियानोर आंदुर, इंका ओना नेत्तुरतुन पोंगागोटसि मनाकुन मना पापाल्कुनाल पाय्सतोर. 6 मना पेनबाबाना पेद्दातनम, अदिकारम बस्केळ्क मननाहाटीं ओर मनाकुन पेनदा राज्येमतोर आनि पेर्मालोर्क कीतोर. आमीन!
7 हुळाट, येसु किरिस्तु मब्बु तेर्पेनतोनि वासेक मंतोर. अंटोर ओन हूळानुर. ओरव्टे ओन कोह्कतोरगुडा मंदानुर. दुनियातोर अन्नि वंसाल्कुना लोकुल्क सातितुन तंचेके दुक्कम कियानुर. हो इल्हे आयार आमीन!
8 “ननाने अल्पा आनि ओमेगा*अल्पा आनि ओमेगा ग्रीक बासाते अल्पा सुरुवना अक्सरम आनि ओमेगा आकिरता अक्सरम आंदु. आंदुन. ननाने मोदाटोन, इंदके मनानोन, मर्रा वायानोन आनि अन्निटकन्ना सक्तिमंतुनगुडा ननाने आंदुन” इंचि पेन इंता.
किरिस्तुना दर्सनम
9 नना योहानुन मीवा दादान आंदुन. येसु बोगांसता तिप्पल्कुने, राज्येमते आनि ओप्के पियमळते मीवातोनि दंटाते मंतन. नना पेनदा पोल्ले आनि येसुना बारेमते गवाइ वेहताहाटीं पतमोस इनना दीबेतगा बंद कीसि मंतन. 10 सामिना रोजुननाड, इत्ते अय्तारम, नना पवित्र आत्माते निंडिस मत्तन. नावा पज्जो तूताकोमता आवाजनसोंटा पेद्दा आवाज केंजावाता. 11 “निमे बतल अय्ते हूळांतिन अदुन पुस्तकमते रासि, इपीसि, स्मुरना, पेर्गमम, तुयतीरा, सरदिस, पिलाडेलपिया आनि लोदिकिया इव एडुं कलिसियानोर्क लोहचीम” इंचि इत्ता.
12 अस्के, नातोनि बोर वळ्कसेक मंतोर इंचि हूळालय पज्जो तिरियसि हूळतन अय्ते, नाक बंगारमता एडुं दीसोडिं दिसतां. 13 अव एडुं दीसोडिन नड्डुम वरोर मनकना रूपमते पुटतोर मत्तोर. ओर पोडगु कपडि केरसि मत्तोर ओना सातिक बंगारमता पट्टा दोहचि मत्ता. 14 ओना तल्ला, ओना केल्क तेल्ला गोर्रेता बूरालेसीं, बर्पुनलेसीं तेल्लगा दिस्सेक मत्ता. ओना कळ्क तळमिता वेल्गुनलेसीं मत्तां. 15 ओना काल्क कोल्मिते वाटसि एर्रगा आता इत्तोळलेसीं मेर्सेक मत्तां. ओना लेंग समुद्रमता वेल्लेने एता तळालेसीं मत्ता. 16 ओर ओना तिना कय्दे एडुं सुक्कान पीसि मत्तोर. ओना तोळ्दाल रोंडु बाजुकुंक आयदार्क मत्ता कसेरलेसीं पेय्सेक मत्ता. पिय्यल आतस्के पोळ्दु बल्हा मेर्संता अल्हा ओना तोड्डि मेर्सेक मत्ता.
17 बस्के अय्ते ओन नना हूळतन, अस्के नना हाताप आसि ओना काल्कुनगा अरतन. अस्के ओर ओना तिना कयदुन नापोर्रो इरसि, “निमे वेरियमा सुरुव आनि आकिर ननाने आंदुन, नना पिस्सि मंतन. 18 नना अय्ते हासि मत्तन गानि हूळा, इंदके नना बस्केळ्ताहाटीं पिस्सि मनंतन. हामुर आनि नरकमता चाबि नहागेन मंता. 19 निमे इदवेरादाका हूळता पोल्लें, बव अय्ते जर्गसेक मंतांगो आनि मुन्ने जर्गानव अन्नि पोल्लें रासि इर्रा. 20 निमे नावा तिना कय्दे हूळता एडुं सुक्कां आनि बंगारमता एडुं दीसोडिना मर्ममता अर्तम इल्हा मंता; एडुं दीसोडिं इत्ते एडुं कलिसियां आंदु आनि एडुं सुक्कां इत्ते, उंदि-उंदि कलिसियाता उंदि-उंदि दूता आंदु” इंचि इत्ता.