1 पेसतुस राज्यपाल कैसरिया सहरते वासि, मूड रोजकु आतारित्‍ते, अगटाल येरुसलेम सहरते होत्‍तोर. 2 अगा पेद्‍दा पेर्मालोर आनि यहुदि पेद्‍दाल्क वासि पेसतुस राज्यपालना मुन्‍ने पौलुसुनपोर्रो तप्पु दोस्तुर. 3 पौलुसुन नड्‍डुम हरदेन हव्कना विचारम मत्‍ताहाटीं, “मावा पोर्रो दया कीसि ओन येरुसलेमते लोहचीम इंचि पेसतुस राज्यपालुन ओर विनंति कीतुर.” 4 अस्‍के पेसतुस इत्‍तोर, “पौलुस कैसरिया सहरता जेलते मंतोर, नना बिराना अगा दांतन. 5 अदुनहाटीं मिहागटाल यहुदि पेद्‍दाल्कुन नावातोनि लोहचीम्टु. आ मनकानद बतलन्‍ना तप्पु मत्‍ते, ओना तप्पुन मिमेट हुप्‍सा परांतिर,” इंचि इत्‍तोर.

6 पेसतुस राज्यपाल एनमिदि पदि रोजकु ओरतोनि मंचि, कैसरिया सहरते वापस होत्‍तोर. इंकुंदि रोजु कोरटते न्‍यायम कियाना जेगातगा उद्‍दिस पौलुसुन तायालय आदेस हीतोर. 7 पौलुस वातारित्‍ते, येरुसलेमताल वाता यहुदिल्कु ओना सुट्‍टु निततुर. ओनपोर्रो पेद्‍दा-पेद्‍दा तप्पुक दोस्तुर, गानि उंदिंका तप्पु निजम कीसि वेहा पर्राहिल्‍लुर. 8 अस्‍के, “नना यहुदिल्कुना दर्मसास्‍त्रमता नियमकुना अड्‍डम बतले कबळ किया हिल्‍लेन, गुळितगा बतले तप्‍पु कबळ किया हिल्‍लेन, कैसर राजांक अड्‍डम बतले वळका हिल्‍लेन,” इंचि पौलुस इत्‍तोर. 9 पौलुस अल्हा इत्‍तस्के, यहुदिल्कुन कूस कियालय, “इव पोल्‍लेना न्‍यायम येरुसलेमते नावा मुन्‍ने आयागोम इंचि नीवा मनसु मंताना,” इंचि पेसतुस पौलुसुन पूसकीतोर. 10 अस्‍के पौलुस इल्‍हा जवाब हीतोर, “इंदके नना कैसरना कोरटतगा नित्‍तिसि मंतन, इग्‍गेने नावा न्‍यायम आयापींता. यहुदिल्कुना विरोदमते नना बतल तप्‍पु किया हिल्‍लेन इंचि नीकुगुडा बेस एरपाट मंता. 11 ओक्‍कला नना तप्‍पु कीतोन आसि, नावा तप्‍पु हामुर सिक्‍सालायक मनानय्ते, नना हायालय तयार मंतन. गानि बव पोल्‍लेन पोर्रोटाल अय्ते लोकुल्‍क नापोर्रो तप्‍पु दोस्सेक मंतुरो, अव पोल्‍लें ओक्‍कला आबद्‍दम पेय्‍सानय्ते, नाकुन बोरे ओरा कय्‍दे हिया पर्रुर. नावा न्‍यायम इग्‍गे आयाकोंटे, कैसर राजाना मुन्‍ने आयागोम इंचि कोरसंतन.” 12 जवाबुने पेसतुस ओना पंचादिते उदता पेद्‍दाल्कुनतोनि वळ्‍किसि, “निमे कैसर राजानगा न्‍यायमताहाटीं विनंति कीतिन अय्ते ओनागेन दाकिन,” इंचि इत्‍तोर.

13 कोन्‍नि रोजकु आतारित्‍ते, अग्रिपा राजाल*अग्रिपा राजाल प्रेरितुल्‍कुना कबाह्‍क 12:1वचनमते मनना हेरोद राजाना मर्रि, ई अग्रिपाल आंदुर. आनि ओना हेलड बर्निका, पेसतुस राज्यपालुंक कलियालय कैसरिया सहरते वातुर. 14 ओर इव्वुर वेल्‍लेने रोजकु अगा मत्‍तुर. मत्‍तस्के, पेसतुस राज्यपाल पौलुसुना न्‍यायमता बारेमते अग्रिपा राजांक इल्‍हा वेहतोर. मुन्‍नेटा पिलिक्‍स राज्यपाल, वरोर मनकन इग्‍गेने जेलने इरसि होत्‍तोर. 15 नना येरुसलेमते मत्‍तास्‍के, पेर्मालोर्क आनि यहुदि पेद्‍दाल्क ओनपोर्रो तप्पु दोस्‍सि, ओन्क सिक्‍साता आदेस हियालय नाकुन इत्‍तुर. 16 अस्‍के नना ओर्कुन इल्‍हा इत्‍तन, “बदवेरदाका अय्ते तप्पु कीता मनकल, तप्पु दोस्तोरा मुन्‍ने नित्‍तिसि, ओना तप्पुना बारेमते वळ्कोरो, अदवेरदाका ओन्क सिक्‍सा हियना रोमि लोकुल्‍कुना रिवाज हिल्‍ले,” इत्‍तन. 17 अल्हा इत्‍तस्के, ओर लोकुल्‍क नावातोनि इग्‍गे वातुर. नना आल्सेम कियाका, इंकुंदि रोजु न्‍यायम कियाना जेगातगा उद्‍दिस, आ मनकन तायालय आदेस हीतन. 18 ओनपोर्रो तप्पु दोस्सानुर नित्‍तिसि ओना तप्पुक वेहतुर, गानि नना इनकुत्‍ताप बदे तप्पु ओनपोर्रो वेहा हिल्‍लुर. 19 सिराप ओर ओरा दर्मता बारेमते आनि येसु पोरोलता वरोर हासोत्‍ता मनकना बारेमते ओरा लोल्‍लि मत्‍ता. गानि पौलुस मात्रम हासोत्‍ता येसु जीवाते मंतोर इंचि इंतोर. 20 इसोंटा पोल्‍लेन बल्हा न्‍यायम कीकन इंचि नाकु तेळियाकोंदु. अदुनहाटीं नना, “इव पोल्‍लेना पय्सला कियालय येरुसलेम दांतिना?” इंचि ओन पूसकीतन. 21 अस्‍के पौलुस इत्‍तोर, “नावा न्‍यायम कैसर राजानगा आयागोम, अदवेरदाका इग्‍गेने जेलते मनंतन,” इंचि विनंति कीतोर. अदुनहाटीं नना ओन कैसरनगा लोहनदाका ओर इग्‍गेने मन्‍निर, इंचि आदेस हीतन.

22 अस्‍के अग्रिपा राजाल, “आ मनकल इनना पोल्‍लें नाकु केंजना मनसु मंता,” इंचि पेसतुसुनतोनि इत्‍तोर. “अल्हा अय्ते, ओना पोल्‍लें नाडि केंजकिन,” इंचि पेसतुस इत्‍तोर.

23 इंकुंदि रोजु अग्रिपा राजाल आनि बर्निका बेस सोक आसि वातुर. सिपाइल्कुना अदिकारिल्‍क, सहरता पेद्‍दा मनकालोर्कुनतोनि कूळसि पंचादि कियाना जेगाते ओर होत्‍तुर. अस्‍के, पौलुसुन पीसि वटु, इंचि पेसतुस आदेस हीतारित्‍ते, पौलुसुन तत्‍तुर. 24 अस्‍के पेसतुस राज्यपाल इत्‍तोर, “अग्रिपा राजाल आनि इगे जमा आता लोकुरिटा! ई मनकन मिमेट हूळसंतिर, येरुसलेमतोर आनि इग्‍गेटुर वेल्‍लेटोरगुडा यहुदिल्क नहगा वासि, ईन जीवाते इरमळ बेस आयो, इंचि वरगेयसेक विनंति कीतुर. 25 गानि ईर हामुटा सिक्‍सालायक बतले तप्पु कियवाप नाकु दिसता. ओर कुद कैसर राजाना मुन्‍ने न्‍यायम आयागोम इंचि विनंति कीतोर, अदुनहाटीं ईन कैसर राजानहेके रोमते लोहना विचारम कीसेक मंतन. 26 गानि ईना बारेमते कैसर राजांक बतल रासाना नाकु तेळिया हिल्‍ले. अदुनहाटीं ईना पोल्‍लें केंजता पजा, बदन्‍ना पोल्‍ले नाकु रासालय दोर्कार बारे इंचि मीवा मुन्‍ने ईन तत्‍तन, कास कीसि अग्रिपा राजाना मुन्‍ने तत्‍तन. 27 जेलते मत्‍ता मनकना बारेमते ओना तप्पु बतले वेहवा, उंदे मल्का ओन कैसर राजानगा लोहमळ नाकु बेस दिस्सो,” इंचि इत्‍तोर.