26
पौलुस अग्रिपा राजाना मुन्‍ने गवाइ वेहंतोर
“इंदके नीवा पोल्‍लें वेहा परांतिन,” इंचि अग्रिपा राजाल पौलुसुन इत्‍तोर. अस्‍के पौलुस, नना वळकंतन, इंचि वेहालय ओना कय तेहचि वळकुमळ सुरुव कीतोर. अग्रिपा राजा! यहुदिल्क नावापोर्रो बव पोल्‍लेना बारेमते अय्ते तप्पु दोस्तुरो, अव अन्‍नि पोल्‍लेन नीवा मुन्‍ने वेहालय नाकु मोका दोर्कता इंचि नना कूस आसेक मंतन. कास कीसि, यहुदिरा रीति-रिवाजकु, ओरा विचाराल्‍कुना बारेमते नीकु बेस एरपाट मंता. अदुनहाटीं दया कीसि नावा नना वळ्‍काना पोल्‍लेन बेस केंजा इंचि विनंति कींतन.
नना सिन्‍ना मत्‍तस्केटाल नावा लोकुल्‍कुनतोनि येरुसलेमते मत्‍तन. अदुनहाटीं नावा ताकमळ, नावा पिस्वर बल्हा मत्‍ता अंटोर यहुदिल्कुंक एरपाटे मंता. (यहुदिल्क मोदोटाले नाकुन एरपाट कींतुर. अदुनहाटीं नावा बारेमते गवाइ वेहाना ओरा मनसु मत्‍ते, मावा दर्मता रीति-रिवाजकुन अंटोर्कन्‍ना एक्‍को नोमानोन ननाने इंचि ओर वेहा परांतुर) मावा दर्मतां रीति-रिवाजकुन, परिसिल्कु अंटोर्कन्‍ना एक्‍को नोमुंदुर, अवने नना वरोन परिसिन आंदुन. इदुन यहुदिल्कु बेस एरपाट कींतुर. ओर इनकुत्‍ते इद पोल्‍लेता गवाइगुडा हिया परांतुर. पेन मावा एनकटा पेद्‍दाल्कुंक पोल्‍ले हीसि मत्‍ता, अदे पोल्‍ले निजम इंचि नना आसे पडतन. अदुनहाटींगे, इंदके नावा न्‍यायम आयना मंता. अदे पोल्‍ले पूरा आंता इत्‍ता आसेते, मावा पन्‍नेंडु गोत्राल्कुना इस्राएल लोकुल्‍क पूरा मनसुने नर्का-पिय्यल उंदेतीर पेनदा सेवा कीसंतुर. इदे बरोसा इरताहाटीं राजा, यहुदिल्क नावापोर्रो दोसेम दोस्तुर. अयना, पेन हातोर्कुन मर्रा तेहंता इत्‍ता पोल्‍लेपोर्रो मीवा लोप्पोटाल बोनके विस्वासम बारि हिल्‍ले?
मुन्‍ने ननागुडा, नासरेत नाटेना येसुना पोरोलता विरोदमते वेल्‍लेने कबाह्‍क किय्‍याना इंचि विचारम कीसि मत्‍तन. 10 येरुसलेमते नना अल्हा कीतनगुडा. पेर्मालोरकुनाहेंदाल अदिकारम दोर्किच्‍कुंचि, वेल्‍लेटुर पेनदा लोकुल्‍कुन नना जेलने वाटतन. पेनदा लोकुल्‍कुन हव्कानेंके, हव्कट इंचि नना ओप्‍कुनुंदुन. 11 हरेक दर्मसास्‍त्रम कराहना लोते, ओर येसुना अपमानम कियानादाका, ओर्कुन नना तिप्‍पल्‍क किया वेहुंदुन. ओरापोर्रो नाकु इच्‍चोर होंग वायुंदु गदा, ओर्कुन तकलिप कियालय नना पलाते सहरकुनेगुडा होनुंदुन.
पौलुस ओर हूळता दर्सनम बारेमते वेहांतोर
12 अल्‍हेने उंदि मल्का नना पेर्मालोरकुनाहेंदाल अदिकारम एत्‍कुंचि दमिस्‍क सहर होंचेके मत्‍तन. 13 होननेंके पिय्यल आता नना हर्देने मत्‍तन, अस्‍के मब्बुनाल उंदि पोळ्‍दुंकन्‍ना एक्‍को वेलगु नावा आनि नातोनि मत्‍तोरा सुट्‍टु मेर्सता. 14 मेर्सतस्के मोमोट अंटोरम हिळु अरतोम. अस्‍के नाकु उंदि अल्किर केंजावाता, अद इब्रानि बासाते नाकुन इल्‍हा इत्‍ता, “साऊल, ए साऊल, नाकुन निमे बारि तकलिप कीसंतिन? मुल्कि पोर्रो कादे तंते नीके कस्‍टम,” इंचि केंजावाता. 15 अस्‍के, “सामि निमे बोन आंदिन?” इंचि नना पूसकीतन. सामि इत्‍तोर, “निमे बा येसुनय्ते तकलिप कीसंतिन ओने नना आंदुन. 16 गानि इंदके निमे तेदसि, काल्कुनपोर्रो नित्‍ता. नावा बारेमते निमे हूळता पोल्‍लेन अल्हेन नना नीकु हुप्‍सना पोल्‍लेन लोकुल्‍कुंक गवाइ वेहालय, नावा सेवक इंचि नीकुन निलाहंतन. 17 नना नीकुन नीवा यहुदिल्कुनगा आनि यहुदि आयवोरगा लोहांतन, अल्हेन ओरागटाल नीकु कापाळंतन. 18 ओर्कुन हीकटताल वेल्‍गुनहेके, देय्यमता अदिकारमताल पेनदाहेके तिरियना हर्रि हुप्‍सालय नीकुन लोहसेक मंतन. ओर अल्हा तिरियते, ओरा पापाल्क मापि आंतां, अल्‍हेने नापोर्रो बोर अय्ते विस्वासम कीसि पवित्र आतुरो, ओरतोनि ओर्कु वारसाहक्‍क दोर्कार,” इंचि येसु नाकु वेहतोर.
19 अदुनहाटीं अग्रिपा राजा! पोर्रोटाल नाक हुपिस्‍ता दर्सनम हूळसि, अद आदेस परकारम ताकतन. 20 आयंका, मुन्‍ने दमिस्‍क सहरतोर्कुंक, पजा येरुसलेमते मनानोर्कुंक, यहुदियाता पूरा एरियाते मनानोर्कुंक आनि वेरे जातितोर्कुंकगुडा मनसु मार्सकुंचि पेनदागा वटु. वासि, मनसु मार्सकुत्‍तोरा लायकता बेसता कबाह्‍क कीसि हुप्‍सट, इंचि वेहतन. 21 इदे कारनमहेंदाल यहुदिल्क नाकुन गुळिते पीसि हव्कालय हूळसेक मत्‍तुर. 22 गानि इदवेरदाका पेन नाकुन सहायम कीता. अदुनहाटीं नना इग्‍गे नित्‍तिसि सिन्‍नाल्क, पेद्‍दाल्क अंटोर मुन्‍ने गवाइ हीसेक मंतन. बव पोल्‍लें अय्ते आयानव मंतां इंचि पेनदा कबुरतोर आनि मूसाल मुन्‍नेन वेहतुर, अव पोल्‍लें तप्‍पा नना वेरे बतले वेहोन. 23 अव पोल्‍लें बव इत्‍ते, किरिस्‍तुंकु तकलिप्‍कु बोगांचा पींता आनि हातोरा लोप्पोटाल ओरे मोदाला मर्रा जीवाते तेदसि, यहुदिल्कुंक, यहुदि आयवोर्कुंक वेलगुना बारेमता पोल्‍लें वेहंतोर, इंचि पौलुस इत्‍तोर.
पौलुस अग्रिपा राजाना मनसुन तिराहलय हूळतोर
24 इल्‍हा ओर वेहासेक मननेंके पेसतुस वरगेयसि, “पौलुस निमे पागल आतिन. एक्‍को करियतदे नीकुन पागल कीसंता,” इंचि इत्‍तोर. 25 अस्‍के पौलुस इल्‍हा इत्‍तोर, “पेसतुस महाराज, नना पागल आया हिल्‍लेन, निजमतुन नना बेस बुद्‍दिते वेहासेक मंतन. 26 ई पोल्‍लें मूलाते मक्‍किसि कीतव आयों. इवन्‍नि पोल्‍लें अग्रिपा राजांक बेस तेळियसे मंतां, इंचि नाकु विस्वासम मंता. अदुनहाटीं वेरियाकोंटा ओना मुन्‍ने वळ्कसेक मंतन. 27 अग्रिपा राजा! पेनदा कबुरतोर रासतवुन विस्वासम कींतिना, कियिना? निमे विस्वासम कींतिन नाकु एरपाटे,” इत्‍तोर. 28 अस्‍के, “बिरानेन नाकुन किरिस्‍तुनोन कियालय हूळसंतिना?” इंचि अग्रिपाल पौलुसुन इत्‍तोर. 29 अस्‍के “बिरानेन आयि, आल्‍सेमते आयि, सिराप निमेने आयो, इय्याला इग्‍गे केंजानोर अंटोर, इव बेडीं होळसि, कळमता अन्‍नि पोल्‍लेने नावालेसीं आयना इंचि पेनदुक पारतना कीसेक मंतन,” इंचि पौलुस इत्‍तोर.
30 अल्हा इत्‍तस्के, अग्रिपा राजाल, ओना हेलड बर्निका, राज्यपाल आनि ओरतोनि उद्‍दिस मत्‍तुर अंटोर तेदतुर. 31 अगटाल पलाते पेय्सि ओर-ओरे इल्‍हा वळकालय दल्‍गुतुर, “हामुर सिक्‍सालायक हिलाकोंटे जेल सिक्‍सालायक ईर बतले तप्पु किया हिल्‍लोर,” इंचि इत्‍तुर. 32 पजा, “कैसर राजाना मुन्‍ने नावा न्‍यायम आयगोम इंचि, ईर इनाकोंटा मंचि मत्‍ते, ईन होळसालय कुदुरवळ,” इंचि अग्रिपा राजल पेसतुसुन इत्‍तोर.