कुलुसि
कुलुसि विस्वासुल्कुंक पौलुसना सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 60
इद सिट्‍टि कुलुसि सहरता विस्वासुल्‍कुनाहाटीं येसुना प्रेरित पौलुस रासतोर. इद कुलुसि सहर आसिया एरियाते वांता. इगेटा विस्वासुल्‍क पौलुसुनाहेंदाल आयो, गानि कुलुसि सहरतोरे वरोर इपप्रास इनानोना हेंदाल विस्वास कीतुर.
अगाटा कलिसियाते इच्‍चुर लोकुल्‍क आबद्‍दम कराहनोर मंतुर इंचि इपप्रासुनाहेंदाल पौलुसुंक तेळियता. ओर तप्‍पुड बोदा वेहुंदुर आनि रीति रिवाजकु, पद्‍दतकु मत्‍ताप ताकतेने मुक्‍ति दोर्कंता इंचि करहुंदुर.
अदुनहाटीं पायदा हिल्वव दुनियाता रीति रिवाजकु, पद्‍दतकु कराहानोरा पोल्‍लें केंजमट इंचि वेहालय पौलुस इद सिट्‍टि रासि विस्वासुल्‍कुनगा लोहतोर. अल्‍हेने मिमेट वरोंक-वरोर पावरम कीम्‍टु, विस्वासमते गट्‍टिगा मंटु, किरिस्‍तुना पोल्‍लेते बेर्स्‍सेके होंट इंचिगुडा वेहतोर.
बगा बतल मंता
जोहार आनि परिचयम 1:1-8
किरिस्‍तुना स्वबावम आनि कबळ 1:9–2:19
किरिस्‍तुनतोनि पिस्सना पूना पिस्वर 2:20–4:6
आकिरता बोदां 4:7-18
1
जोहार
1-2 पेनदा इच्‍चाताल किरिस्‍तु येसुना प्रेरित आतोन नना पौलुसुन आनि तम्मुर तिमोतिनाहेंदाल, कुलुसि सहरते मंदना पवित्र अल्हेन किरिस्‍तुनलोप्‍पो विस्वासमलायक कलिसियाता लोकुल्‍कुंक इद सिट्‍टि रासेक मंतन. मना पेनबाबानाहेंदाल मीक कुर्पा, सांति दोर्किकांटी.
दन्यवादता पारतना
मोमोट मीवाहाटीं बस्‍केळ्‍क पारतना कीसेके, मना सामि येसु किरिस्‍तुना पेनबाबांक दन्यवाद कीसेके मंतोम. बारित्‍ते, किरिस्‍तु येसुना पोर्रोटा मीवा विस्वासम आनि अंटोर पेनदा लोकुल्‍कुन मिमेट कियाना मीवा पावरमता बारेमते केंजतोम. मीवाहाटीं स्वर्गमते उंदि आसे इर्सि मंता इंचि, अदुना बारेमते मिमेट मुन्‍नेने बेसता कबुरता सत्‍तेम पोल्‍लेते केंजतिर. अदे बेसता कबुर मिहगा वासि, पूरा दुनियाते पैलांचि लोकुल्‍कुना पिस्वरतुन बदलांचेके मंता. अल्‍हेने बस्के अय्ते अदुन मिमेट केंजतिर, केंजसि पेनदा निजम कुर्पातुन एरपाट कीसि स्विकार कीतिर, अस्‍केटाल अद मीवा पिस्वरतुनगुडा बदलांचेके मंता. आ बेसता कबुर मावा पावरमगल्‍ला इपप्रासुनाहेंदाल मिमेट करियतिर. ओर मावातोनि कलियसि कबळ कियानोर आनि मीवाहाटीं किरिस्‍तुना विस्वासमलायक सेवक आंदुर. पवित्र आत्माते मत्‍ता मीवा पावरमता बारेमते ओरे माक वेहतोर.
अदुनहाटीं मोमोट अव पोल्‍लें केंजतस्‍केटाल, मिमेट पूरा आत्माता तेल्‍विते, बुद्‍दिते दाना इच्‍चा मत्‍ताप निंडागोम इंचि बस्‍केळ्‍क पारतना कीसेके मंतोम. 10 इदुनहेंदाल, मिमेट अन्‍नि तीरुकुने सामिन कूस कियालय मीवा पिस्वर दानकु इस्‍टमाताप मनंता, मीक हरेक बेसता कबळते पलम दोर्किसि, पेनदा तेल्‍विते बेर्स्‍सेके दांतिट. 11 दाना महिमाता अन्‍नि तीरकुना बलमतोनि मीकुन गट्‍टिगा कींता, अदुनहाटीं अन्‍नि तीरकुना ओप्के, ओर्सकुनमळ इद मीक आनंदमतोनि दोर्कंता. 12-13 अदुनहाटीं पेनबाबांक मिमेट दन्यवाद कीम्‍टु. ओर मनाकुन वेलगुने मंदना पेनदा लोकुल्‍कुना वारसानहक्‍कुते तूस एताना लायक कीतोर. मनाकुन हीकटता कय्‍दाल इळबळिच्‍चि ओना पावरमगल्‍ला मर्रिना राज्येमते होळाहतोर. 14 ओना मर्रिनाहेंदाले मनाकु मुक्‍ति दोर्कंता, इत्‍ते ओनाहेंदाल पापाल्कुनाल मापि दोर्कंता.
किरिस्‍तुंक अन्‍निनपोर्रो अदिकारम मंता
15 ओर दिस्‍सवसोंटा पेनदा रूपम आंदुर, ओर दुनिया पुट्‍टका मुन्‍नेटाले मत्‍ताहाटीं, दुनियाते पुटतवुने अन्‍निनपोर्रो पेद्‍दोड आंदुर. 16 बारित्‍ते, स्वर्गमते आयि, बूमिपोर्रो आयि, दिस्सानव आयि, दिस्‍सुवव आयि, राजगद्‍दें आयिं, सरकार आयि, पेद्‍दाल्‍क आयिर, आदिकारिल्‍क आयिर इव अन्‍निन ओनतोनि, ओनाहेंदाल आनि ओनाहाटीं पुटिच्‍मळ जर्गता. 17 पुटिस्ता अन्‍निने ओरे मोदाटोर, ओनाहेंदाले अन्‍नि नित्‍तिसि मंतां. 18 मेंदुललेसीं मंदना कलिसियाकु ओर तल्‍ला आंदुर. अन्‍नि पोल्‍लेने पेद्‍दोड आयागोम इंचि हातोरा लोप्पोटाल मोट्‍टा मोदाला तेदतोर ओरे आंदुर. ओरे मोदोल आंदुर. 19 बारित्‍ते ओनालोप्‍पो पेनदा गुनम पूरा निंडसि मत्‍तेने बाबो कूस मनंतोर. 20 क्रुसुनपोर्रो किरिस्‍तु पोंगागोटता नेत्‍तुरताहेंदाल, बूमिपोर्रो आनि स्वर्गमते मंदना अन्‍नि वस्‍तुकुन ओनतोनि कल्‍पिसि ओरा नड्‍डुम सांति मनागोम इंचि पेनदा इच्‍चा.
21 दीनकन्‍ना मुन्‍ने मिमेट पेनदागटाल लक्‍कु मत्‍तिर, कराब कबाह्‍कुनाहेंदाल दाना पगातोर आसि मत्‍तिर. 22 इंदके मीकुन पेनदा मुन्‍ने पवित्र, डाग हिलाकोंटा, दोसेम हिलाकोंटा निल्‍हागोम इंचि ओर ओना हामुरहेंदाल मीवा मेंदुल्ता हव्‍वितुन ओना मेंदुल्ते कल्‍पकुत्‍तोर. 23 गानि मिमेट विस्वासमते हीके-हेके आयाकुंटा गट्‍टिगा निल्‍सि मंटु, मिमेट केंजता बेसता कबुरता आसेतुन होळ्‍समट. अद बेसता कबुर मब्बुन हिळता अंटोर लोकुल्‍कुंक वेहमळ जर्गसेक मंता. अदे सेवा कियानाहाटीं नना, इत्‍ते पौलुसुन पेनदा सेवक आतन.
कलिसिया बेर्सानाहाटीं पौलुस तकलिप अरमळ
24 किरिस्‍तुना मेंदुलतसोंटा कलिसियाताहाटीं बवय्ते बादां तक्‍को मत्‍तां. अव बादन नावा मेंदुलताहेंदाल पूरा कीसेके मंतन, अदुनहाटीं इंदके मीवाहाटीं बवय्ते नावा दुक्‍काल्क मंतां अवुने नना आनंदमते मंतन. 25-26 पेनदा पोल्‍लेतुन मीकु पूरा वेहानाहाटीं पेन नाक अप्पजेपता जिम्मेदारिहेंदाल नना कलिसियाता सेवकुन आतन. अद पोल्‍ले वेल्‍लेन कालाल्‍कुनाल, पीळि-पीळिनाल मर्ममते मत्‍ता, गानि इंदके दाना पवित्र लोकुल्‍कुंक तेळियागोटता. 27 यहुदि आयवोरा लोप्पो इद मर्ममता महिमाता विलुवा बतल आंद मना लोकुल्‍कुंक तेळियाना इंचि पेन इनकुत्‍ता. मीवालोप्‍पो महिमाता आसे आसि मनना किरिस्‍ते आ मर्मम आंद. 28 हरेक मनकन किरिस्‍तुनलोप्‍पो पूरा कीसि पेनदा मुन्‍ने निल्‍हागोम इंचि, मोमोट किरिस्‍तुना बारेमते हरेक मनकंक कडकते वेहांतोम, हरेक मनकंक पूरा तेल्‍विते करहंतोम. 29 इदुनहाटीं किरिस्‍तुना पूरा ताकत नावा लोप्पो गट्‍टिगा कबळ कीसेके मंता, दानाहेंदाल नना मनसु दोस्‍सि बागा कस्‍टम कीसेके मंतन.