2
1 मिमेट नाकुन हूळाकोन्ना गानि मीवाहाटीं, लोदिकिया सहरते मंदना विस्वासुल्कुनाहाटीं आनि कळमता अंटोर विस्वासुल्कुनाहाटीं नना वेल्लेन कस्टम कीसेके मंतन, इद मीक तेळियाना इंचि नावा इच्चा मंता. 2-3 इद कस्टम बारि कीसेके इत्ते, मिमेट मीवा विस्वासमते दैरनेमते मनना, मिमेट पावरमते वरोंक-वरोर कलियसि मंदना, मीक पूरा बुद्दिता पूरा दनम दोर्कना, पेनबाबाना मर्मम इत्ते किरिस्तुना लोप्पो मक्किस मत्ता बुद्दि, तेल्विता कजानातुन एरपाट कियाना. 4 बोरन्ना तिय्यटा पोल्लेनतोनि मीकुन पसांचामन्नि इंचि नना इद वेहासेक मंतन. 5 नना मेंदुल्ते मिहागटाल लक्कु मंतन, गानि आत्माते मिहागेन मंतन. मीवा रोजता पिस्वर आनि किरिस्तुनलोप्पो मंदना मीवा गट्टि विस्वासम हूळसि नाक वेल्लेन कुसि आसेक मंता.
किरिस्तुनलोप्पो निंडिसि मंतिर
6 इंदके मिमेट किरिस्तु येसुन सामि इंचि स्विकार कीतिर, अय्ते ओर बल्हा वेहतोर अल्हेने ताकाटु. 7 मराता हिह्कुनलेसीं मिमेट किरिस्तुनलोप्पो होळियसि होंटु, बेर्स्सेके होंटु. मीक कराहतालेसीं विस्वासमते गट्टिगा आसेके होंटु, बस्केळ्क पेनदुक दन्यवाद कीसेके मंटु.
8 मिमेट जेगर्ताते मंटु! बोरन्ना वासि मीकुन दुनियाता तेल्वि पोल्लें, एर्तम दोका हिय्यना पोल्लें वेह्चि पसांचा परांतुर, अव पोल्लें मनकालोर्कुना रीतिरिवाजकुनालेसीं, दुनियाते एनकटा कराहता पोल्लेनलेसीं मंतां गानि किरिस्तुना पोल्लेनलेसीं हिल्लें. 9 बारित्ते पेनदाव अन्नि गुनाल्क किरिस्तुना मेंदुल्ते मनंतां. 10 अंटोर राज्येम कियानोर्कुनपोर्रो, अदिकारकुनपोर्रो किरिस्तु तल्लालेसीं मंतोर, ओनालोप्पो मिमेट पूरा आतिर. 11 मीवा मेंदुल्ता पापाल्क पायताहाटीं ओनालोप्पो मीकुन कतना कियमळ जर्गता. अद कतना कय्दे कीतद आयो गानि किरिस्तुनलोप्पो कीतद आंद. 12 अचोने आयाका, मिमेट बापतिस्मा एतताहेंका किरिस्तुनतोनि बोंदा दोस्ताप आतिट. हातोरव्टेटाल ओन जीवाते तेहाता पेनदा सक्ति पोर्रो मिमेट विस्वासम इरताहाटीं ओनतोनि जीवातेगुडा तेदतिट. 13 मिमेट तप्पु कबाह्क कीतिर, यहुदि आयवोर मत्तिर, अदुनहाटीं आत्माते हासि मत्तिर. गानि पेन मना अन्नि पापाल्कुन मापि कीसि किरिस्तुनतोनि मीकुन जीवाते तेहता. 14 नियमकुना पुस्तकम मनाकु विरोदमते मत्ता, गानि पेन किरिस्तुन क्रुसुनपोर्रो मोल्लां कोह्किसि अद पुस्तकमताल मनाकु विरोदमते मत्ता पोल्लें तेंडसि पोहता. 15 इल्हा राज्येम कियानोर्कुंक आनि अदिकारकुंक पेन ताकत हिलाकोंटा कीता. कीसि किरिस्तु क्रुसुनपोर्रो जीवा हीसि गेल्सताहाटीं ओरा अंटोरा मुन्ने तमासा आसि सिग्गु हिलाकोंटा आता. 16 अदुनहाटीं मीवा तिनना-उनना बारेमते आयि, पंडुगुना बारेमते आयि, अमासा हिलाकोंटे नोमकेम रोजुना बारेमते आयि बोर्कुने मीवा न्यायम किया हियमटु. 17 इवन्निगुडा मुन्ने वायाना निजम पोल्लेना नीडा आंदु, आ निजम पोल्ले किरिस्तु आंदुर.
18 बोरन्ना सतागा सिन्नातनम हुपिच्कुनानोर, दूताना पूजा कियानोर, हूळता पोल्लेनपोर्रो, ओना मनसुना पालतु पोल्लेनपोर्रो पेद्दिरकेम कियानोना हेंदाल मीवा पेनदा इनामतुन तपिच्कुना हियमटु. 19 असोंटा मनकल पूरा मेंदुल्ता कील्कुन, नराल्कुन उंदि कीसि, पेनदाहेंदाल मेंदुल्तुन बेर्सागोटना तल्ला, इत्ते किरिस्तुन पीसि मन्नोर. 20-21 गानि इंदके मिमेट दुनियाता पोल्लेनाल किरिस्तुनतोनि हासि होत्तिर, अय्ते “अद इटमट, अदुन तिनमट, अदुन पियमट” इंचि दुनियातोरालेसीं नियमकुने बारि ताकसेक मंतिट? 22 इवन्नि पोल्लें वाळकुत्तारित्ते नासडेम आसि होनना वस्तुकुनलेसीं मंतां, बारित्ते अव सिराप मनकना नियमाल्क आनि कराहमळ्क संबंदिस्तव आंदुं. 23 इव नियमकुने मना मनसुनाल तयार कीता बक्ति कियालय, सिन्नातनम हुपिच्कुनालय, मना मेंदुल्तुन तीराता कस्टम कीकुनालय बुद्दि अय्ते मंता, गानि मना मेंदुल्ता कराब इच्चान आपालय इव बतल कबळ्क ओज्जों.