3
मिमेट किरिस्‍तुनतोनि जीवाते तेदसि मंतिट, किरिस्‍तु स्वर्गमते पेनदा तिना बाजुंक उदसि मंतोर, अय्ते अगाटा पोल्‍लेन दोर्किच्‍कुनना कोसिस कीम्‍टु. 2-3 इंदके मीवा पडाना पिस्वर हासि होत्‍ता आनि मीवा पूना पिस्वर किरिस्‍तुनतोनि पेनदा लोप्पो मक्‍किचि मंता. अदुनहाटीं मिमेट बूमिपोर्रोटा पोल्‍लेने आयो गानि स्वर्गमता पोल्‍लेने मनसु इर्रट. मनाकु पिस्वर हीता किरिस्‍तु बस्के अय्ते मर्रा दिस्‍सानुर, अस्‍के मिमेटगुडा ओनतोनि ओना महिमाते दिस्‍किर.
पळाना पिस्वर आनि पूना पिस्वर
अदुनहाटीं बूमि पोर्रोटव मना कराब गुनाल्‍क इत्‍ते बोगमतनम, कराब विचाराल्क, जोसते मनमळ, इंकावरोनद आसे पडमळ, आस्‍ति कियमळ इद अय्ते बोम्मांक मोळ्कता लेक्‍कातेन वांता. इव अन्‍निन हव्‍किस पोहाट. इवुनाहाटींगे पेनदा होंग दाना पोल्‍ले केंजवोरा पोर्रो वांता. मिमेटगुडा मुन्‍ने आ पिस्वरते पिसानस्‍के, ओरालेसींगे ताकिंदिर. गानि इंदके मिमेट होंग आयमळ, गुल्‍गमळ, पगा पियमळ, अपमानम कियमळ, तोळ्‍दाल कराब पोल्‍लें वळ्‍कमळ इवन्‍निन होळसीम्टु. मिमेट वरोंक-वरोर आबद्‍दम वळ्‍कमटु, बारित्‍ते मीवा पडाना गुनमतुन आनि दाना कबाह्‍कुन तेंडसि पोहतिर. 10 इंदके पूना पिस्वर पिसमळ सुरुव कीतिर, मनाकुन पुटिस्ता पेनदा गुनम मत्‍ताप, मिमेट तेल्वि दोर्किच्‍कुनालय पूनगा तयार आसेक मंतिट. 11 इवने युनानि आयिर, यहुदि आयिर, कतना कीतोर आयिर, कतना कियवोर आयिर, केडाते मनानोर आयिर, स्‍कूति जातितोर्क आयिर, दासुड आयिर, दासुड आयवोर आयिर ईरा लोप्पो बतल तेडा हिल्‍ले. किरिस्‍तु अन्‍निने, अंटोर लोप्पो मनंतोर.
12 पेन मीकुन पवित्र आनि पावरमगल्‍ला लोकुल्‍कुनलेसीं पेर्कुत्‍ता. अदुनहाटीं दया कियमळते, पायदा कियमळते, सिन्‍नागासि मनमळते, सादा-सिंपल मनमळते ओप्के पीसि ताकट. 13 सामि मीवा तप्‍पुकुन मापि कीतोर, अय्ते मिमेटगुडा वरोना तप्‍पुकु वरोर मापि कीम्‍टु. मीलोप्‍पो बोनकन्‍ना इंकावरोन पोर्रो बतलन्‍ना तप्‍पु दोस्‍साना मत्‍ते, ओर ओप्‍केते वरोनद वरोर तप्‍पुकुन मापि कीकुंटु. 14 अचोने आयाका मिमेट अंटोर उंदासि पावरमते दोहताप मंटु. 15 मीवा मनसुने किरिस्‍तुना सांतिता राज्येम ताकिकांटी, इदुनहाटींगे मीकुन उंदि मेंदुल आसि केयमळ जर्गता. पेनदुक बस्‍केळ्‍क दन्यवाद कीम्‍टु. 16 किरिस्‍तुना पोल्‍ले मीलोप्‍पो निंडिसि मन्‍निकांटी, मिमेट पूरा तेल्‍विते वरोंक-वरोर करहट, तेळियागोट्‍सि वेहाटु, पेनदुक दन्यवाद कीसेके मना मनसुनाल बजनकु, कीर्तनकु, पाटां पारसेके होंटु. 17 अचोने आयाका, पोल्‍ले आयि, कबळ आयि बतल किय्‍यिना मिमेट सामि येसुना पोरोलतेन कीम्‍टु. ओनाहेंदाले पेनबाबांक दन्यवाद कीम्‍टु.
पूना पिस्वरते मनमळ
18 मरमिं आता मुरताह्‍कुनिटा! मिमेट पेनदुक नच्‍चानालायक मीवा मुय्‍दुर्कुना पोल्‍लेपोर्रो ताकट. 19 मुय्दुर्कुनिटा! मीवा मुत्‍तोह्‍कुन पावरम कीम्‍टु, अवुनतोनि कडकते मनमट.
20 पिलाल्‍कुनिटा! मिमेट अन्‍नि पोल्‍लेने मीवा यावल-बाबाल वेहताप ताकट, इल्‍हा ताकते सामिंक आनंदम आंता. 21 बाबोरिटा! मिमेट मीवा पिलाल्कुन चिड-चिड कियमट, अल्हा कीते, ओर निरास आंतुर.
22 दासुल्‍कुनिटा! मिमेट अन्‍नि पोल्‍लें ई दुनियाते मनना मीवा मालकुल्क वेहताप कीम्‍टु. मिमेट कियानद मनकालोर्कुन कूस कियाना दासुनलेसीं हुप्‍सालय आयो गानि बेस मनसुने, पेनदा वेर्रेते कीम्‍टु. 23-24 मिमेट बतलय्ते कींतिर मीवा मनसुनाल कीम्‍टु, मिमेट मनकालोर्कुनाहाटीं आयो गानि सामिनाहाटीं कीसेके मंतिट. मिमेट सामि किरिस्‍तुना सेवा कीसेके मंतिट. अदुनहाटीं ओनाहेंदाल मीकु वारसानता इनाम दोर्कंता, इद मीकु एरपाटे मंता. 25 पेन बोने मोकम हूळसि न्‍यायम किय्‍यो, बोर अय्ते तप्‍पु कींतोर, दाना सिक्‍सा ओनकु दोर्कंता.