2
अन्निटकन्ना मंचि मुक्ति
1 अदुनहाटीं मनम केंजता सत्तेम पोल्लेनाल लक्कु आयामन्नि इंचि अवुनहेके मनम बेस लक्से हियगोम. 2 बारित्ते, पेनदा दूतानाहेंदाल वेहता पोल्ले सत्तेम इंचि रुजुव आता,✡गलातिया 3:19 अस्के आ पोल्ले परकारम कबळ कियाका तप्पु कीतोर्कु आनि ताकुवोर्कु दग्गुता सिक्सा दोर्कता. 3 अय्ते इच्चोर पेद्दा मुक्तिता कबुरतेके लक्से इर्राकोंटे, वायाना सिक्साताल मनम बल्हा तपिच्कुना पर्रांतोम? इदुना बारेमते मोट्टा मोदाला सामिए वेहतोर. अद कबुरतुन सामिनगटाल बोर अय्ते केंजतुरो, ओर अद कबुरतुन मनाकु तेळियागोट्सि रुजुव कीतुर. 4 अचोने आयका पेनगुडा चिन्हां, इचंत्रमता कबाह्क, तीराता अद्बूताल्क आनि पवित्र आत्माता वराल्क दाना इच्चा परकारम दाना बक्तुल्कुंक हीसि, ई मुक्तिता बारेमते गवाइ हीसेक मत्ता.
येसु मनकना रूपमते मारियमळ
5 मुन्ने वायाना बद दुनियाता बारेमते मोमोट वेहचंतोम, आ दुनियातुन पेन दाना दूताना कय हिळु इर्रा हिल्ले. 6 इदुना बारेमते दर्मसास्त्रमते उंदगा बोरो वरोर गवाइ वेहासेक इल्हा इत्तोर:
“मनकल इत्ते असल बोर आंदुर, ओना बारेमते निमे इच्चोन विचारम कीसंतिन.
हिलाकोंटे निमे इच्चोर पिकिर कियनाहाटीं,
असल मनकना रूपमते पुटतोर बोर आंदुर?
7 निमे ओन पेनदा दूतांकन्ना गिचचो सिन्नगा कीतिन,
गानि निमे ओन्क पेद्दातनम आनि कदरता किरिटम हीसि,
निमे नीवा कय्दा कबाह्कुनपोर्रो ओन्क अदिकारम हीतिन,
8 अन्निटतुन ओना काल्कुनगा इरतिन.”✡बजन संहिता 8:4-6
इंचि इत्तोर. पेन अन्निटवुनपोर्रो ओन्क अदिकारम हीता, ओना अदिकारमते हिलाकोंटा बतातुने होळसा हिल्ले. गानि इंदके अन्नि ओना अदिकारमते मत्ताप दिस्सेक हिल्ले. 9 अयना जेरासेपताहाटीं पेनदा दूतांकन्ना सिन्नागासि मत्ता येसुन मनम हूळसंतोम. पेनदा कुर्पाहेंदाल अंटोर मनकालोरहाटीं ओर ओना जीवातुन हीसि हामुरता रुसि हूळतोर. हामुरतुन सहन कीताहाटीं पेन ओन्क पेद्दातनम आनि कदरता किरिटम केराहता.
10 पेन अन्निटवुन सतताहाटीं तयार कीता आनि सतागे अन्निटवुन ताकिच्चंता. आ पेन दाना महिमाता राज्येमते वेल्लेन मंदितुन सतता मर्क-मियाह्क कीसि तर्रानाहाटीं, दाना सतता मर्रि येसुन पेरता. मनाकु मुक्ति दोर्कगोम इंचि येसुन अद वेल्लेन तिप्पल्कुनतोनि ओन पुरागा कीता.
तम्मुर-हेलड इनालय येसु सिग्गु अर्रोर
11 मनाकुन पवित्र किय्याना येसु आनि पवित्र आतोरम मनम, वरोर बाबाना पिलाल्कुमे आंदुम. अदुनहाटीं मनाकुन तम्मुह्क-हेलाह्क इंचि वेहालय येसु सिग्गु अर्रोर. 12 अदुनहाटीं,
“नावा तम्मुह्कुंक-हेलाहकुंक नीवा पोरोल वेहकन,
कलिसियातोरा मुन्ने नना नीकुन तल्सकुनकन,”✡बजन संहिता 22:22
इंचि ओर पेनदुन इत्ता पोल्ले दर्मसास्त्रमते रासतद मंता.
13 मर्रा,
“नना पेनदापोर्रो बरोसा इर्रांतन.” अचोने आयका,
“इग्गे नना, नाकु पेन हीता पिलाल्कुनतोनि मंतन,”✡यसायाह 8:17-18
इंचि दर्मसास्त्रमते रासतद मंता.
14-15 पेनदा पिलाल्क आता मनम, मेंदुल रूपमते मत्ताहाटीं येसुगुडा हरेक पोल्लेते मनालेहका आसि वातोर. मना पिस्वरंता हामुरता वेर्रे मनागा मत्ताहेंका देय्यमता अदिकारम मनापोर्रो मत्ता. गानि येसु ओना हामुरताहेंदाल, देय्यमता अदिकारमतुन नासडेम कीसि, मनाकुन हामुरता वेर्रेताल इळबळिस्तोर. 16 पेनदा दूतांक सहायम कियालय येसु असले वायाहिल्लोर गानि अब्राहामुना वंसंमतोर्के सहायम कियालय वातोर.*मनम येसुन विस्वासम कीतोम इंचि, मनमगुडा अब्राहामुना वंसंमतोरमे आंदुम. 17 इदुनाहाटींगें येसुंक अन्नि तीरकुने ओना तम्मुह्क-हेलाह्कुनलेसीं रूपम येतमळ अव्सरम मत्ता. इल्हा रूपम येतते ओर पेनदा मुन्ने सेवा कियाना वरोर दयागल्लोड आनि विस्वासमलायक पेद्दा पेर्मल आंतोर. अस्केन ओर लोकुल्कुना पापाल्कुनाहाटीं मोक्कु हिय्या पर्रंतोर. 18 ओर कुद्दु परिक्साते अर्सि तिप्पल्क बोगांचि मंतोर, अदुनहाटीं इंदके बोर अय्ते परिक्साते अर्सि तिप्पल्क बोगांचंतुरो, ओर्कु ओर सहायम किया पर्रंतोर.