1 हरेक पेद्‍दा पेर्मन, लोकुल्‍क ओरा लोप्पोटाल पेर्रांतुर. लोकुल्‍कुना पापाल्क मापि आयानाहाटीं लोकुल्‍कुनाहेंदाल ओर पेनदुक मोक्‍कुल्क हिय्यना, सेसां*सेसां पर्रिकु, कोत्‍तां, जोन्‍नां, वंजिं इवन्‍निन पेनदा गद्‍देतगा जमा कींतुर, इदुने सेसा इंतुर. वाटाना कबळ कियालय ओन निलाहंतुर. 2 आ पेर्मलगुडा वेल्‍ले तीरकुने कमजोर मंतोर, अदुनहाटीं तेळियका तप्पु कीतोर्कुन, हर्रि तप्‍सोत्‍तोर्कुन ओर दयाते हूळा पर्रंतोर. 3 अदुनहाटीं ओर लोकुल्‍कुना पापाल्क मापि आयालय मोक्‍कु हीताप, ओना सतता पापाल्कुनाहाटींगुडा मोक्‍कु हियापींता.✡लैव्यवस्‍ता 16:6 4 बल्हा अय्ते मोट्‍टा मोदाटा पेद्‍दा पेर्मल आयानाहाटीं पेन हारूनुन केयता, अल्हेन पेन केयवद बोरे मनकल ओनद ओरे पेद्‍दा पेर्माना कदरता जेगा येता पर्रोर.

5 अल्हेन किरिस्‍तुगुडा ओनद ओर पेद्‍दा पेर्मल आया हिल्‍लोर. गानि बद पेन अय्ते ओन, “निमे नावा मर्रिन आंदिन, इय्याला ननाने नीकुन पुटिस्तन,” इंचि इत्‍तानो अदे पेन ओन पेद्‍दा पेर्मल इंचि निल्‍हाता.✡बजन संहिता 2:7 6 अल्हेन, “निमे मेल्किसेदेकुनलेह्का बस्‍केळ्‍ताहाटीं पेद्‍दा पेर्मल आसि मंदकिन”✡उत्‍पत्‍ति 14:18; बजन संहिता 110:4 इंचि मरुंदि जेगातेगुडा पेन ओन इत्‍ता.

7 येसु इद बूमिपोर्रो मनकना रूपमते मत्‍ता रोजकुने, ओन हामुरताल कापाळाना पेनबाबांक अळसि, मोत्‍कुंचि विनंतिं-पारतनां कीतोर. अस्‍के ओना बक्‍तितुन पीसि पेन ओना पारतनातुन केंजता. 8 येसु कुद्‍दु पेनदा मर्रि आसिगुडा तिप्‍पल्‍क बोगांचेके, पोल्‍लेपोर्रो ताकमळ इत्‍ते बतल, करियतोर. 9 इल्‍हा, ओन्क बल्हा अय्ते आयाना मत्‍ता अल्हा पुरागा आसि, ओना पोल्‍लेपोर्रो ताकाना अंटोराहाटीं ओर, बस्‍केळ्‍ताहाटीं मुक्‍ति हियानोर आतोर. 10 इल्‍हा पेन ओन मेल्किसेदेकुनलेह्का पेद्‍दा पेर्मल इंचि निलाहता.

11 ई मेल्किसेदेकुना बारेमते वेहकोम इत्‍ते वेल्‍लेन पोल्‍लें मंतां. गानि मिहगा केंजना मनसु हिलुवाहेंका, बेस तेळियागोट्‍सि वेहमळ इत्‍ते वेल्‍लेन कस्‍टम. 12 अल्हा हूळते इदवेरदाका मिमेट गुरुल्क आया मत्‍ता. गानि इंदके मीके वेरे बोरन्‍ना वासि पेन हिय्यना मुक्‍ति बारेमता पोल्‍लें मर्रा कराहना अव्‍सरम मंता. मिमेट इदवेरदाकागुडा पाल उनानोरालेसींगे मंतिट, गाटो तिननालायक आया हिल्‍लिट. 13 बारित्‍ते पाल उनना हरेक पेडल, ओर पसि पेडले मनंतोर. ओन्क नीति पोल्‍लेना बारेमते तेळियो. 14 गानि बोर अय्ते तेल्वि बेर्सि, मंचि-सेड्‍डातुन एरपाट कीसि अल्हा ताकतुरो, ओरे गाटो तिनानोरालेसीं आतुर.