12
पेन मना बाबाल आंदुर
1 इचोन मंदिता गवाइं, मब्बुनलेसीं मना सुट्टु आताप मंतां. अदुनहाटीं मनाकुन आपाना हरेक बर्वुन आनि अल्कगा पट्टुने अरहना पापमतुन होळसिसि, पेन मनाकु हुपिस्ता हरदे ओप्केते वितकोम. 2 वितनेंके मना नदर येसुनपोर्रेन इरकोम. मनालोप्पो विस्वासमतुन पुट्टिचानोर आनि दान पुरागा कियानोर ओरे आंदुर. मुन्ने दोर्काना आनंदमहाटीं येसु क्रुसुनपोर्रो जीवा हियालयगुडा तयार आतोर. अगा ओन्क जर्गता अपमानमतुनगुडा लेक्का किया हिल्लोर. इंदके ओर पेनदा राजगद्देता तिना बाजुंक उद्दिसि मंतोर.✡बजन संहिता 110:1
3 पापि लोकुल्क ओना पोर्रोटा पगाते ओन बच्चोनो तिप्पल्क-बादां कीतुर. गानि मिमेट दैरनेम होळसि विस्वासमताल पजोळ्क आयामन्नि इंचि ओर अवन्नि ओर्सकुत्तोर. मिमेट ओना बारेमते विचारम कीम्टु.
4 मिमेट पापमतोनि लळांच्नेंके, उंदि पोल्ले मति इर्राना. अद बतल इत्ते, येसु बल्हा ओना जीवातुन हीतोर, अल्हा मीकु मीवा नेत्तुर पोंगागोट्टाना अव्सरम अर्राहिल्ले. 5-6 मीकुन अंटोर्कुन मर्क-मियाह्क इन्कुंचि, मीकु दैरनेम हियानाहाटीं पेन मीकु वेहता आ पोल्लेतुन पुरागेन मति मरुंग्तिरा?
“नावा मर्रिना, पेन हीता टेरनिंगतुन, मामुल पोल्ले इनकुन्मा.
पेन नीकुन सुद्रांचनस्के, निमे दैरनेम होळ्समा,
बारित्ते, पेन बोन अय्ते पावरम कींतानो ओन्क टेरनिंगगुडा हींता.
अचोने आयका, अद बोन अय्ते मर्रि इंचि इंतानो,
ओन्क सिक्सागुडा हींता,”
इंचि रासतद मंता.✡अय्यूब 5:17; नीतिवचन 3:11-12
7 पेन मीकुन दाना मर्क-मियाह्कुनलेसीं हूळंता. अदुनहाटीं मीकु बस्के अय्ते तिप्पल्क वांतां, अस्के पेन मीकुन सुद्रांचनाहाटीं टेरनिंग हीसंता इंचि अदुन ओर्सकुंटु. बारित्ते मर्रि सुद्रांचनाहाटीं ओन्क टेरनिंग हियवोर बोरन्ना बाबो मनंतोरा? 8 पेन दाना अंटोर मर्क-मियाह्कुन सुद्रांचनाहाटीं टेरनिंग हींता. आ टेरनिंगगिंटा मीकु दोर्काकोंटे, मिमेट दाना निजम मर्क आयिर. 9 मनाकुन पुटिस्ता मना बाबुर्क अय्ते मनम सुद्रांचनाहाटीं टेरनिंग हीतुर. अदुनहाटीं मनम ओरा कदरगुडा इरतोम. अय्ते मनम बस्केळ्क पिस्सि मननाहाटीं, मना आत्मांकु बाबो आता पेनदुक मनम बच्चोन वेल्ले लोंगिस मत्ते बेस? विचारम कीम्टु. 10 मनाकुन पुटिस्ता बाबुर्क, कोन्नि वर्सानाहाटीं ओर्क तेळियताप, मनम सुद्रांचना इंचि टेरनिंग हीतुर. गानि पेन मना बेसताहाटीं, मनाकुन दानालेह्का पवित्र कियालय टेरनिंग हींता. 11 इंदके इव टेरनिंगकु येतनेंके मनाकु कुसि अनपिच्चो, दुक्कम वांता. गानि बोर अय्ते ओर्सकुंचेके टेरनिंग बेस मनसु तासि करियंतुरो, ओर्कु सत्तेम, सांतिते निंडता पिस्वर दोर्कंता.
12 अदुनहाटीं, अरसोत्ता मीवा कय्कुन आनि ताकत हिलुवा मीवा टोंगरन मजबुत कीम्टु.✡यसायाह 35:3 13 मिमेट मीवा विस्वासमता हरदे सवरगा ताकाटु.✡नीतिवचन 4:26 अस्के बोर अय्ते विस्वासमते कुंटि आसि मंतोरो, ओर विस्वासमते इंकिच्चो कुंटि आयाकोंटा गट्टि पळानुर.
विस्वासमते पिसानोर्क कोन्नि जेगर्तां
14 अंटोर मनकालोरतोनि सांतिते कलियसि पवित्र मनना कोसिस कीम्टु, अल्हा मनाकोंटे बोरे मनकल सामिनगा होना पर्रोर. 15 पेनदा कुर्पाताल वरोरगुडा तप्सोनामन्नि इंचि जेगर्ता मंटु. अल्हा तप्सोंचि हेळतोर बोरन्ना मी नड्डुम मनानय्ते, ओर कळमातोर्कुन हेळाहचि, पेनदाल लक्कु कींतोर. इदुन जरा जेगर्ता हुळट.✡व्यवस्ताविवरन 29:18 16 मीवा नड्डुम बोरे व्यबिचारम कियानोर हिलाकोंटे, एसावुनलेसीं नीति हिलुवा मनकल मनामन्नि. उंदि पूटाता गाटोहाटीं ओर ओना जेस्टम पालुंक विलुवा हिय्याकोंटा तम्मुंक अम्मुकुत्तोर.✡उत्पत्ति 25:27-34 17 पजा एसावुना गति बतल आता मीक अय्ते तेळियसे मंता. वारसान हक्कुनाहाटीं बाबोनगा आसिर्वाद येतालय होत्तस्के, बाबो ओन्क आसिर्वाद हिय्या हिल्लोर. ओर अळसि-अळसि वेल्ले कोसिस कीतोर गानि ओन्क मनसु मार्सकुनालय मोका दोर्काहिल्ले.✡उत्पत्ति 27:36-38
18-19 इस्राएल लोकुल्क अय्ते कय्दे इट्टा पर्रानाल मत्ता गुट्टातगा होत्तुर. अद गुट्टा तळमिते पोतसेके मत्ता, हिर्रु-हीकाटा, वळि-दुमारम, अद गुट्टातगा मत्ता. गानि मिमेट अय्ते असोंटा गुट्टातगा होना हिल्लिर. अद गुट्टातगा इस्राएल लोकुल्क, तूताकोमता आवाज आनि पेनदा वळ्कना पेद्दा लेंगुन केंजतुर. केंजसि, “मर्रा बस्केने इसोंटा लेंग माकु केंजा वायामन्नि” इंचि पेनदुक विनंति कीतुर.✡निर्गमन 20:18-21; व्यवस्ताविवरन 5:23-25 20 बारित्ते, “इद गुट्टातुन, उंदि जिवरासि इट्टिना, दान बंडाने तंचि हव्काना,” इंचि पेन आदेस हीसि मत्ता, अद आदेसतुन ओर सहन किया पर्राहिल्लुर.✡निर्गमन 19:12-13 21 अगा जर्गता गटना इच्चोन वेरियानाल मत्ता गदा, अदुना बारेमते मूसालगुडा, “नना इरगा वेरियसि गजा-गजा आसंतन,” इंचि इत्तोर.
22 गानि मिमेट अय्ते सियोन गुट्टातगा वातिट. जीवाते मनना पेनदा, स्वर्गमते मनना येरुसलेम सहर इदे आंद. कुसिते उंदगा जमा आता, लेक्का हिलुवच्चोन पेनदा दूतानगा मिमेट वातिट. 23 नीतिमंतुड लोकुल्कुना आत्माना कलिसियातगा मिमेट वातिट. आ कलिसियातगा अंटोरा पोरोलीं रासि मंतां, अंटोर्क जेस्टम पालना अदिकारम मंता. अंटोर्कुन पेन दानतोनि मनालय पुरागा कीता. दुनियाते मनना अन्निटवुना न्यायम कियाना पेनदागा मिमेट वातिट. 24 इंका पूना करारता नड्डुमतोर आता येसुनगा मिमेट वातिट. आदामना मर्रि आबेलना नेत्तुर इत्ते, ओना दादाना बद्ला येतालय पेनदुन केयताप मत्ता.✡उत्पत्ति 4:10 गानि येसुना नेत्तुर अय्ते मीवापोर्रो सल्सि मीवा पापाल्कुन मापि कीम इंचि पेनदुन केयताप मंता.
25 इद दुनियाते, लोकुल्कुंक जेगर्ता मनालय पेन वेहतस्के, ओर पेनदा पोल्ले केंजा हिल्लुर. अदुनहाटीं ओर पेन हीता सिक्साताल तपिच्कुना पर्राहिल्लुर. अय्ते इंदके मनम स्वर्गमताल वेहनोना पोल्लेतुन केंजाकोंटे, पेन हिय्यना सिक्साताल बल्हा तपिच्कुना पर्रांतोम? अदुनहाटीं जरा जेगर्ता मंटु, बोर अय्ते वळ्कसंतोरो ओना पोल्लेन पास्काकोंटा, बेस केंजट. 26 अद कालमते पेन वळ्कतस्के, दाना आवाजते, बूमिअंता गजा-गजा ऊंगता.✡निर्गमन 19:18 गानि इंदके, “नना सिराप बूमितुने आयो गानि, मब्बुनगुडा मरुंदि मल्का गजा-गजा ऊपांतन,” इंचि पेन पोल्ले हीता.✡हाग्गै 2:6; न्यायियों 5:4; बजन संहिता 68:8 27 “मरुंदि मल्का” इनना पोल्लेता अर्तम बतल इत्ते, इद दुनियाते गजा-गजा आयानव बव अय्ते मंतांगो, अव अन्नि तयार कीतव आंदुं, अदुनहाटीं अव नासडेम आसि दांतां, गानि बव अय्ते गजा-गजा आयाकोंटा मनंतांगो, अव बस्केळ्क अल्हेन मनंतां.
28 बोरे कदलिच्चा परुवसोंटा राज्येम मनाकु दोर्कसेक मंता. अदुनहाटीं मनम पेनदुक दन्यवाद वेहकोम. अचोने आयाका, दाना वेर्रे मनसुने इर्सि दाना सेवा कीसेके, दान्क नच्चना आरादना कीसेके मंदकोम. 29 बारित्ते, मना पेन, बूळ्दि कीसि पोहना तळमिलेसींटद आंदु.✡व्यवस्ताविवरन 4:24; व्यवस्ताविवरन 9:3; यसायाह 33:14
✡12:2 बजन संहिता 110:1
✡12:5-6 अय्यूब 5:17; नीतिवचन 3:11-12
✡12:12 यसायाह 35:3
✡12:13 नीतिवचन 4:26
✡12:15 व्यवस्ताविवरन 29:18
✡12:16 उत्पत्ति 25:27-34
✡12:17 उत्पत्ति 27:36-38
✡12:18-19 निर्गमन 20:18-21; व्यवस्ताविवरन 5:23-25
✡12:20 निर्गमन 19:12-13
✡12:24 उत्पत्ति 4:10
✡12:26 निर्गमन 19:18
✡12:26 हाग्गै 2:6; न्यायियों 5:4; बजन संहिता 68:8
✡12:29 व्यवस्ताविवरन 4:24; व्यवस्ताविवरन 9:3; यसायाह 33:14