याकोब
याकोब रासता सिट्टि
इद सिट्टिता बारेमते गिचचो परिचयम
रासतोना पोरोल: याकोब
रासता कालम: इसवि सन 45-50
याकोब येसु सामिना तम्मुर आंदुर. लोकुल्क, पेनदा विस्वासुल्कुन तकलिप कियुंदुर. अदुनहाटीं विस्वासुल्क वेरे-वेरे देसेमते पेय्सि होत्तुर. ओर्क दैरनेम हियालय याकोब इद सिट्टि रासतोर.
मीक तकलिप वायिना आनंदमते ओप्केते अदुन ओर्सकुंटु, गरिब आयिर सिरमंत आयिर बेदबाव कियमट, इच्चाना पज्जो ताकसि पापम कियमट, विस्वासमते कबळ कीम्टु, नाल्केतुन आपट, पेद्दिरकेम कियमट आनि विस्वासमते गट्टिगा निल्सि मंटु इंचि विस्वासुल्कुंक वेहतोर.
बगा बतल मंता
जोहार आनि परिचयम 1:1
विस्वासम आनि बुद्दि 1:2-8
गरिबतनम आनि दनम 1:9-11
पट्टु हूळमळ आनि परिक्सा 1:12-18
केंजमळ आनि कियमळ 1:19-27
बेदबावम कियमळ बारेमते 2:1-13
विस्वासम आनि बेस कबाह्क 2:14-26
विस्वासि आनि ओना वळ्कमळ 3:1-18
विस्वासि आनि दुनिया 4:1–5:6
समजांचि वेहामळ 5:7-20
1
जोहार
1 नना याकोबुन, पेन आनि सामि येसु किरिस्तुना सेवकुन आंदुन. वेरे-वेरे देसेल्कुने पैलांचि होंचि मत्ता पन्नेंडु गोत्राल्कुनोर्कुंक*पन्नेंडु गोत्राल्कुनोर्कुंक ईर यहुदि विस्वासुल्क आंदुर, ओरा देसेमताल पलाते एक्कोते-एक्को सिरिया आनि आसिया एरियाते मंचेके मत्तुर. नना इद सिट्टि रासेके मंतन. मीक अंटोर्क जोहार.
परिक्सां आनि आनंदम
2 नावा विस्वासुल्कुनिटा, बस्के अय्ते मीवापोर्रो तीर-तीराता परिक्सां वांतां, अस्के अद मीवा पूरा आनंदमता पोल्ले इनकुंटु. 3 बारित्ते विस्वासमता परिक्सानाहेंदाले ओप्के पुटंता इंचि मीक एरपाटे मंता. 4 मिमेट ओप्केतुन दाना कबळ पूरा किया हीम्टु, अस्के मिमेट विस्वासमते गट्टिगा, पुरागा आनि बवे पोल्लेने बतले तक्को हिलाकोंटा आंतिट.
5 गानि मीवा लोप्पोटाल बोनकन्ना बुद्दि तक्को मत्ते पेनदुन तल्कट, अस्के पेन हींता. बारित्ते अद बतले तप्पु दोस्साका, तल्कतोर अंटोर्कुंक वेल्लेने हींता. 6 गानि अनमानम कियाका विस्वासमते तल्कमळ गावाले. अनमानम कियानोर समुद्रमते वळिक वायाना एता तळानसंटोर आंदुर. 7-8 असंटोर रोंडु तीरुकुने विचारम कियाना मनकल आंदुर, ओर बदे हर्दे गट्टिगा मन्नोर. अदुनहाटीं सामिनाहेंदाल बतलन्ना दोर्कंता इंचि इनकुना मन्नि.
गरिब आनि सिरमंतुड
9 गरिब विस्वासि, पेन ओनकु हीता पेद्दातनमता हेंदाल आनंदमते मंदना. 10 अल्हेन सिरमंत विस्वासि, पेन हीता सिन्नातनमता हेंदाल आनंदमते मंदना. ओर जाडि पुंगार राल्सि होत्ताप हासि दांतोर. 11 बारित्ते पोळ्दु पेय्संता अस्के एर्राना एद्दि मनंता, दानहेंदाल जाडि वतसि दांता, पजा दाना पुंगाह्कु राल्सि होंचि सिंगारम हिलाकोंटा आंता. अल्हेने सिरमंत मनकलगुडा ओना कमाइ कियाना विचाराल्कुनेन मुळ्गिसि मंचि नासडेम आसि दांतोर.
12 बोर अय्ते परिक्सां वातस्के अवुन ओर्सकुंतोर, ओर आसिर्वाद दोर्कतोर आंदुर. बारित्ते परिक्साने गट्टिगा नित्तिसि मंचि बोर अय्ते पेनदुन पावरम कींतोर, ओनकु पिस्वरता किरिटम हींतन इंचि पेन पोल्ले हीसि मत्ता, अद ओनकु हिय्यार.
13 पेन परिक्सां वाया हिय्यो अल्हेन बोर्कुने परिक्साने अरहो. अदुनहाटीं बोर्कन्ना परिक्सां वायानय्ते, पेनदाहेंदाले परिक्सां वासेक मंतां इंचि इना मन्नि. 14 गानि हरेक मनकन, ओना लालच दानहेके गुंजकुंता. पजा पसांचि, ओन परिक्साते अरहंता. 15 आयंका आ लालच नेला तप्सि एरपूरताप, पापमतुन कनंता आनि पापम बेर्सि हामुरतुन पुटसंता.
16 नावा पावरमगल्ला विस्वासुल्कुनिटा! मिमेट पसांचकुनमट. 17 हरेक बेसता वरम आनि अन्निंकन्ना बेसता इनाम पोर्रोटाले वांता, वेल्गुल्कुना पेनबाबानगटाल वांता, ओनालोप्पो बतले तेडा हिल्ले, ओर नीडातालेसीं बदलांचानोर आयोर. 18 ओर पुटिस्तवुन लोप्पो मोट्टा मोदाटा पलम मनमे आयागोम इत्ता ओना सतता इच्चातुन पीसि, सत्तेम पोल्लेताल मनाकुन पुटिस्तोर.
केंजमळ आनि केंजताप ताकमळ
19 नावा पावरमगल्ला विस्वासुल्कुनिटा, मिमेट इद पोल्ले तेल्पिचकुंटु, हरेक मनकल केंजालय बिराना तयार मंदना, वळ्कालय ओप्के मंदना आनि बिराना होंग वायाकोंटा मंदना. 20 बारित्ते मनकना होंग पेनदा नीति पोर्रो कबळ किय्यो. 21 अदुनहाटीं मीलोप्पो मत्ता कराब पोल्लेन आनि दुस्ट मनसुन तेंडसि पोहाचि, पेन मीवा मनसुने हीता बेसता पोल्लेतुन मिमेट पेद्दातनम हूळाकोंटा पीकुंटु. बारित्ते अद मीवा आत्मान पिसागोटनाहाटीं बलमतद आंद. 22 अद पोल्ले सिराप केंजालये आयो गानि अद वेहताप ताकानोर आम्टु. अल्हा ताकाकोंटे मीवद मिमेटे पसांचकुंतिर. 23-24 बारित्ते बोर अय्ते पेनदा पोल्ले केंजसि अदुना परकारम ताकोर, आ मनकल अद्दमते मोकम हूळसि पलाते होत्ता पजा बल्हा मत्तानो इंचि बिराने मरुंगनसंटोर आंदुर. 25 गानि बोर अय्ते मुक्तिता तप्पु हिल्वा नियम मत्ताप ताकंतोर आनि अदुन मरगोर, असंटोना कबळ लोप्पो पेनदा आसिर्वाद मनंता.
26 बोरन्नागिंटा ओनद-ओर बक्तुन इनकुंतोर गानि ओना नाल्केतुन आपकुन्नोर, अय्ते ओर, ओनद-ओरे पसांचकुंचेके मंतोर. ओना बक्ति एर्तमे आंदु. 27 बोर अय्ते दिक्कु हिल्वोर्कुना, मुंडामोस्तवुना तकलिप लोप्पो सहायम कींतोर, इद दुनियाता कराब कबाह्कुनाल लक्कु मनंतोर, असंटोर मना पेनबाबाना मुन्ने दोसेम हिल्वोर पवित्र आंदुर.
*1:1 पन्नेंडु गोत्राल्कुनोर्कुंक ईर यहुदि विस्वासुल्क आंदुर, ओरा देसेमताल पलाते एक्कोते-एक्को सिरिया आनि आसिया एरियाते मंचेके मत्तुर.