1 नावा विस्वासुल्‍कुनिटा! मीवा विस्वासम मना महिमाता सामि येसु किरिस्‍तुनपोर्रो मंता, अदुनहाटीं मीलोप्‍पो बेदबाव मनामन्‍नि. 2 बारित्‍ते, वरोर मनकल बंगारमता मुद्‍दा, एक्‍को दरातव कपडिं केर्सि, इंकावरोर गरिब मनकल बोंतुल कपडिं केर्सि पारतना कियाना लोते वातुर इनकुंटु, 3 अस्‍के मिमेट एक्‍को दराता कपडिं केर्सि वातोनहेके हूळसि, “निमे इगे बेसता जेगाते उद्‍दा” इंचि वेहचि, गरिब मनकन, “निमे अगा नित्‍ता हिलाकोंटे नावा काल्कुनगा उद्‍दा” इंचि वेहानय्ते, 4 मिमेट मीवा लोप्पेन बेदबाव कीताप आया हिल्‍लिरा? इंका दुस्‍ट विचारमते न्‍यायम कीतोर आया हिल्‍लिरा?

5 नावा पावरमगल्‍ला विस्वासुल्‍कुनिटा! केंजाट, ई दुनियाते बोर अय्ते गरिब मंतुर ओर्कुन विस्वासमते दनवंतुल्‍क कींतन इंचि, आनि दान पावरम कीतोर्कुंक दाना राज्येमते वारसदार्क कींतन इंचि, मुन्‍नेने पोल्‍ले हीसि मत्‍ता, अद हियालय ओर्कुन पेरता. 6 गानि मिमेट आ गरिब मनकन अपमानम कीतिर. मीपोर्रो अदिकारम ताकिच्‍चेके, मीकुन कोरटते इग्गिसेक ओयानुर दनवंतुल्के गदा? 7 किरिस्‍तुना कदर हियना पोरोल मीक दोर्कता, अद पोरोलतुनगुडा अपमानम कियानुर ईरे दनवंतुल्‍क गदा? 8 मिमेटगिंटा, “नीवद-निमे पावरम कीतापे पक्‍कातोर्कुनगुडा पावरम कीम,” इंचि दर्मसास्‍त्रमते वेहताप ताकानय्ते, मिमेट निजमे बेस कीसेक मंतिट. 9 गानि ओक्‍कला मिमेट बेदबाव कियानय्ते, मिमेट पापम कीसेक मंतिट, दर्मसास्‍त्रम मीकुन दोसिल्‍क कींता. 10 बारित्‍ते बोरे आयिर दर्मसास्‍त्रमतव अन्‍नि पोल्‍लेन पालन कीसिगुडा उंदि पोल्‍ले तपते, ओर अन्‍नि पोल्‍लेने दोसि आंतोर. 11 बल्हा इत्‍ते, “बोगमतनम कियमट” इंचि पेन वेहता, आनि अदे पेन, “इंकावरोन हव्कमट” इंचिगुडा वेहता. निमे व्यबिचारम किया हिल्‍लिन गानि इंकावरोन हव्कतिन, अय्ते निमे दर्मसास्‍त्रमता पालन किया हिल्‍लिन. 12 बोरद अय्ते पापमताल इळबळिचना नियम परकारम न्‍यायम आयाना मंता. मिमेट ओरालेसींगे वळ्कट, कबळ कीम्‍टु. 13 बारित्‍ते बोर अय्ते दया किय्योर, न्‍यायम कियाना रोज पेन ओनपोर्रो दया किय्‍यो. दया कियानोर न्‍यायमतुन गेल्संतोर.

14 नावा विस्वासुल्‍कुनिटा! बोरन्‍नागिंटा नाक विस्वासम मंता इन्कुंचि, विस्वासम परकारम कबळ कियाकोंटे, अद विस्वासम बता पाय्दातद असोंटा विस्वासम ओन पिसागोटा परंतना? 15 बोरन्‍ना दादाल आयि, अक्‍कल आयि ओर्क केर्रालय कपडिं, तिनालय रोजता तिंडि हिल्‍ले, 16 अस्‍के मिमेट ओर्कुन, “सांतिते होंटु, गरम कपडिं केर्रट, पीरमेड तिंटु,” इंचि इनकिर. गानि ओरा मेंदुल्क अव्‍सरम मत्‍तव ओर्क हिय्यिर, अय्ते दाना बता पाय्दा? 17 अल्‍हेने विस्वासम मत्‍ताप कबळ हिलाकोंटे, आ विस्वासमगुडा हातापे आंद. 18 गानि बोरन्‍ना, “नीकु विस्वासम मंता, नाक बेसता कबळ मंता” इंचि इत्‍तोर इनकुंटु. अस्‍के, “बेसता कबळ हिल्वा विस्वासम नाक हुप्‍सा, बेसता कबळताहेंदाल विस्वासम नीकु हुप्‍संतन” इंचि ओर इनानुर. 19 पेन उंदे मंता इंचि मिमेट विस्वासम कीतिर, बेसे आंद. गानि देय्याल्कुगुडा विस्वासम कीसि गजा-गजा वनकंतां. 20 अरे बुद्‍दि हिल्वा मनका! कबळ हिल्वा विस्वासम एर्तम इंचि, नीकु तेळियोना? 21 मना एनकटा बाबो अब्राहाम ओना मर्रि इसाकुन मोक्‍कु हियालय गद्‍देपोर्रो इरतोर, अय्ते पेन ओना कबळतुन हूळसि, नीतिमंतुड इंचि ओन ओप्कुत्‍ताना हिल्‍लेना? 22 मिमेट हूळसेक मंतिट, विस्वासम ओर कीता कबाह्कुनतोनि कलियसि मंता, अल्हेन विस्वासम ओना कबाह्‍कुनाहेंदाल पूरा आता. 23 अय्ते, “अब्राहाम पेन पोर्रो विस्वासम कीतोर, अस्‍के पेन ओन नीतिमंतुड इत्‍ता,” इंचि दर्मसास्‍त्रमता पोल्‍ले पूरा आता. अल्‍हेने अब्राहाम पेनदा दंटातोर इंचि पोरोल दोर्किच्‍कुत्‍तोर. 24 अदुनहाटीं मनकल सिराप विस्वासम कीतेने आयो गानि बेसता कबाह्कुनालगुडा पेन ओन नीतिमंतुड कींता. 25 अल्‍हेने रहाब इनना वेस्यागुडा कबर्‍यालोर्कुन दाना लोते मक्‍किचि इर्सि, इंकुंदि हरदाल वापस लोहता. अद बेसता कबळ कीताहाटीं नीति मुरतळ आता. 26 बल्हा अय्ते आत्मा हिल्वा मेंदुल हांतानो, अल्‍हेने कबळ हिल्वा विस्वासमगुडा हातापे.