2
येसुना पुट्मळ
1 योहान पुटतस्के, रोम सरकारता राजाल कैसर*कैसर इद राजाना पोरोल आयो. रोम सरकारते अन्निटकन्ना पेद्दा पदवि आंद. अगस्तुस ओना कय हिळु मनना अन्नि देसेल्कुना लोकुल्कुनद सिरगंति कियना इंचि आदेस हीतोर.†कर वसुल कियनाहाटीं राजाल सिरगंति कियालय आदेस हीतोर. 2 कुरिनियुस इनना पोरोलतोर सिरिया एरियाता राज्यपाल मननेंके ई सिरगंति आता. इदे मोट्टा मोदाटा सिरगंति आंद. 3 अय्ते सिरगंतिता आदेस दोर्कुताहेंके अंटोर लोकुल्क पोरोलीं रासागोटकुनालय बोना नाटे ओर होत्तुर.
4 अल्हेन योसेप दाविद राजाना वंसमतोर मत्तोर. अदुनहाटीं ओर गालिल एरियाता नासरेत नाटेनाल यहुदिया एरियाता दाविद राजाना पुटता नार बेतलहेम इनना नाटेंक होत्तोर.✡मीका 5:2‡नासरेत नाटेनाल बेतलहेम नार वेल्लेन एत्तुने मंता. आनि दग्गेर-दग्गेरा 150 किलोमिटर लक्कु मंता. 5 ओर सिरगंतिहाटीं नार होननेंके ओनतोनि एर्रा बोट्टु आसि मत्ता मरियमुन पीसि होत्तोर. अस्के अद पीटे मत्ता. 6 ओर अगा मननेंकेन दाना एरपूराना वेला वाता. 7 अद दाना तोल्सूर मर्रिन कंता. अगा ओर्कु आगालय बेस जेगा दोर्कुवाहेंके मरियम आ पेडन पेगुने हुटता, हुटसि कोळ्कते कोंदाक कुटार तासाना डालाते वाटसि इरता.
गोर्रें मेहानोरतोनि पेनदा दूताता वळकुमळ
8 अय्ते अदे नर्का इच्चुर गोर्रें मेहानोर नाटेना पलाते नेलिने ओर ओरा गोर्रेना कावेल कीसेक मत्तुर. 9 अस्के अचानक ओरा मुन्ने उंदि पेनदा दूता वासि नितता. अस्के सामिना महिमाता वेल्गु ओरा सुट्टु एल्गता. अदुन हूळसि गोर्रें मेहानोर इरगा वेरियकुत्तुर. 10 अस्के पेनदा दूता ओर्कुन, “मिमेट वेरियमट. नना मीवाहाटीं उंदि बेस कबुर पीसि वातन. इद कबुर अंटोर लोकुल्कुंक बेस आनंदम हींता. 11 इय्याला दाविद राजाना नाटे, मीकुन पिसागोटनोर पुट्तोर, ओरे किरिस्तु§किरिस्तु किरिस्तु इत्ते युनानि बासाते निय होकसि निलाहता वरोर मनकल इंचि अर्तम. यहुदि जातिते पेर्मान, राजान निलाहनेंके ओर्कु निय होकसि निलाहंतुर. मनकन ओना पापमताल पिसागोटलय पेन बोन अय्ते निल्हाचि लोहता ओरे किरिस्तु. सामि आंदुर. 12 ओन मिमेट एरपाट कियना चिन्ह बतल इत्ते, उंदि कोळ्कते पेगुने हुटसि कोंदांक कुटार तासाना डालाते वरोर सिन्ना पेडल मीकु दिस्सानुर,” इंचि इत्ता. 13 अल्हा इत्ता इन्मळे इंका वेल्लेन पेनदा दूतां वातां. वासि अगा मत्ता पेनदा दूतातोनि कलियसि पेनदुन तल्सकुंचेके,
14 “स्वर्गमते पेनदा कदर आयि, बूमिपोर्रो अद पावरम कीता लोकुल्कुंक सांति दोर्किकांटी,”
इंचि इनालय दल्गतां.
15 पजा पेनदा दूतां ओर्कुन होळसिसि स्वर्गमते मल्सि होत्तां. अस्के आ गोर्रें मेहानोर वरोंक-वरोर, “अय्ते ताकट! मनम बेतलहेम नाटे दाकोम. होंचि, सामि मनाकु वेहताप जर्गुता गटनातुन हूळकोम,” इंचि इनालय दल्गुतुर.
16 पजा ओर अगटाल बिराना होंचि अगा मरियमुन, योसेपुन हूळतुर. इंका अगा कोळ्कते कोंदांक कुटार तासाना डालाते सिन्ना पेडल मत्तदगुडा हूळतुर. 17 हूळसि, ओर्कु आ पेडाना बारेमते पेनदा दूता बतल वेहतानो, अद पोल्लेतुन आ गोर्रें मेहानोर अंटोर्क वेहतुर. 18 ओर वेहता पोल्लेतुन केंजता हरेक मनकल इचंत्रमते अरतोर. 19-20 पजा आ गोर्रें मेहानोर ओर्क पेनदा दूता बतल अय्ते वेहता, अल्हेन जर्गुतदुन केंजसि, हूळसि ओर पेनदुन इरगा स्तुति कीसेके मल्सि होत्तुर. गानि मरियम मात्रम अव अन्नि पोल्लेन दाना मनसुने इरकुंचि इदुना अर्तम बतल मरि, इंचेके ऊके विचारम कीसेके मनुंदु.
सामिना कय्दे येसुन अप्पजेपंतुर
21 इल्हा आ पेडल पुटसि एनमिदि रोजकु आतस्के ओनाद कतना रिवाज कीतुर. मरियम नेला तप्पका मुन्नेन पेनदा दूता दानकु वेहता परकारम, आ पेडाना पोरोल “येसु” इंचि इरतुर.
22-24 पजा मूसाना नियम परकारम दाना सुद्दिकरन कियाना वेला वातस्के ओर येरुसलेम गुळिते होत्तुर. होंचि “रोंडु पावरेल्क हिलाकोंटे रोंडु गुव्वां अयना मोक्कु हियना.”*लैव्यवस्ता 12:1-8ते वेहताप उंदि मुरतळ मर्रिन कनानय्ते नल्पै रोजकुनदाका मुट्टुड मनंता. इंचि मूसाना नियमते रासि मत्ताप मोक्कु हीतुर. अल्हेने मूसाना नियमते, “तोल्सूर पेडन बस्केळ्क सामिंक हियना.” इंचि वेहचि मंता. अदुनहाटीं सामिना कय्दे येसुन अप्पजेपतुर. इल्हा ओर सामिना नियम परकारम मोक्कु हियालय येरुसलेम होत्तुर.
सिमोन येसुना बारेमते पेनदा पोल्ले वेहांतोर
25 अवे तूकुल्कुने येरुसलेमते सिमोन पोरोलतोर वरोर मनकल मनुंदुर. ओर नीतिमंतुड आनि पेनदा पोल्लेपोर्रो ताकानोर मत्तोर. इस्राएलता लोकुल्कुंक पेन बस्के सुकम-सांति हींतनो इंचेके ओर एदुर हूळसेक मनुंदुर. ओनतोनि पवित्र आत्मा मत्ता. 26 इंका पवित्र आत्मा, “बदवेरदाका अय्ते निमे, ‘पेन लोहना किरिस्तुन’ हूळिन, अदवेरदाका नीकु हामुर वायो,” इंचि ओन्क वेहचि मत्ता. 27 पजा पवित्र आत्मा सिमोनुंक वेहताहेंका, योसेप आनि मरियम गुळितगा वाता रोजे ओरगुडा गुळितगा होत्तोर. मूसाना नियम परकारम दंडकाल्क कियनाहाटीं पेडाना तल्लुर-बाबो पेडन अगा पीसि वातुर. 28 सिमोन आ पेडन ओरागटाल तेंडकुंचि एतकुत्तोर, एतकुंचि पेनदुन इल्हा स्तुति कियालय दल्गुतोर:
29 “ए सामि, निमे नाकु हीता पोल्ले परकारम नीवा सेवक आता नना,
इंदके सांतिते हाया परांतन.
30 बारित्ते निमे पेरकुत्ता पिसागोटनोन नना नावा कळ्कुन निंडा हूळतन,
31 निमे ओन दुनियाता अंटोर लोकुल्कुना मुन्ने पेर्कुत्तिन,
32 वेरे जातिनोर्क बेसता हर्रि हुप्सना वेल्गु,
नीवा इस्राएल लोकुल्कुंक पेनदाहेंदाल दोर्कुता पेद्दातनम ओरे आंदुर.”
33 सिमोन मातरल येसुना बारेमते वळकाना पोल्लें केंजसि, ओना यावल-बाबल इचंत्रमते अरतुर. 34 पजा सिमोन ओर्क आसिर्वाद हीसि, येसुना यावल मरियमुंक इल्हा वेहतोर: “हूळा, इस्राएलते ई पेडनहेंदाल वेल्लेन मंदि लोकुल्कुंक नस्टम जर्गार अल्हेने वेल्लेन मंदि लोकुल्कुंक बेसगुडा जर्गार. ई पेडल इत्ते पेनदाद उंदि चिन्ह आंदुर. ई चिन्हातुन वेल्लेन मंदि पास्कानुर. 35 इदुनहेंदाल वेल्लेन मंदिता मनसुना विचाराल्क पलाते अर्रनुं. गानि नीकु मात्रम उंदि कसेर नीवा गुंडेताल आरपार पेय्सि होत्ताचोन दुक्कम वायार.”
हन्नाल येसुना बारेमते अंटोर्क वेहंता
36 अगा पेनदा कबुर वेहना उंदि मातिर मनुंदु, दान पोरोल हन्ना. अद अस्सेर वंसमते पुटता पनुएल पोरोलतोना मिय्यड आंद. अद वेल्लेन मातिर आसि मत्ता. मरमिं आता एडुं वर्सानेन दाना मुय्दो हासोत्तोर. 37 इल्हा अद मुंडामोससि एनबै नालुं वर्सां आतां. अद रोज-रोज गुळिते वासेके मनुंदु. अद बस्केळक ओक्कापोद्दु मंचेके पेनदुक पारतना कियुंदु. 38 सिमोन मातरल योसेप आनि मरियमुनतोनि वळ्कसेकेन मत्तोर, अस्केन अद ओरा दग्गेर्क वासि पेनदुक दन्यवाद कीता. पजा बोर लोकुल्क अय्ते, पेन इस्राएल लोकुल्कुन ओरा तिप्पल्कुनाल बस्के पेच्हार इंचेक एदुर हूळसेक मत्तुरो, आ अंटोर लोकुल्कुंक आ पेडाना बारेमते अद वेहता.
39 इल्हा सामिना नियम परकारम कियानव अन्नि दंडकाल्क कियमळ मारतारित्ते योसेप आनि मरियम गालिल एरियाते मनना ओरा नासरेत इनना नाटेंक मल्सि होत्तुर. 40 पजा आ पेडल पेद्दा बेर्सतोर. ओन्क पेन ताकत अल्हेने बुद्दिगुडा बेस हीता. दाना दया ओनपोर्रो मत्ता.
येसु येरुसलेम सहरतेन आगांतोर
41 दाटसि होनना पंडुगुनाहाटीं†दाटसि होनना पंडुगु इजिप्त देसेमता गुलामगिरिताल यहुदि लोकुल्कुन पेन पेचाहचि तत्ता मतिते, इद पंडुगु कींतुर. गुलामगिरिताल पलाते अरता रोजु इजिप्त देसेमता हरेक लोता पेद्दा मर्रिन पेनदा दूता हव्कुता. गानि यहुदिल्कुना लोतोर्कुनाल बोरे हाया हिल्लुर. येसुना यावल-बाबल एटा येरुसलेम सहर होनुंदुर. 42 अय्ते येसु पन्नेंड वर्सानोर आतोर, अस्केगुडा एटा होत्ताप येसुन पीसि पंडुगुनाहाटीं येरुसलेम होत्तुर.‡यहुदि जातितोर वरोर पेडल पन्नेंड वर्सानोर आतस्के, ओन्क यहुदि जातितोरा अन्नि रिवाजकु आनि मूसाना नियमकुना पालन किया पींता. 43 पंडुगु मारतंका येसुना यावल-बाबल ओरा नार मल्सि होनालय पेय्सतुर. गानि पेडल येसु मात्रम येरुसलेमतेन आगिसि मत्तोर. अयना इद संगति मात्रम ओना यावल-बाबांक बिल्कुल एरपाट आयाहिल्ले. 44 मनातोनि कलियसि ताकाना मंदितेन मंतोर बारे, इनकुंचि ओर इंकुंदि रोजमेड ताकसेक होत्तुर. पजा ओर ओरा जीवातोर्कुन, एरपाटतोर्कुन पूसकीसेके पहकालय दल्गुतुर. 45 हीके-हेके पह्किसि हूळतुर गानि येसु ओर्कु दिसा हिल्लोर. अदुनहाटीं ओर मर्रा ओन पहकसेक-पहकसेक येरुसलेम वापस होत्तुर.
46 मूड रोजकु आतस्के गुळितगा येसु ओर्कु दिसतोर. अगा ओर यहुदि गुरुल्कुनतोनि उद्दिसि ओरा पोल्लें केंजसेके इंका ओर्कुन सवाल्क पूसकीसेके मत्तोर. 47 येसुना उसारतनमतुन आनि जवाब हियानदुन हूळसि अगा मत्तोर अंटोर इचंत्रमते अरतुर. 48 ओना यावल-बाबल गुडा ओन हूळसि इचंत्रम आतुर. पजा ओना यावल ओन, “निमे मावातोनि इल्हा बारि कीतिन पेडा? नीवा बाबल, नना इरगा परेसान आसि नीकुन बगा-बगा पहकतोम नीकु एरके ना?” इंचि पूसकीता.
49 अस्के येसु ओर्कुन, “मिमेट नाकुन बारिंक पहकतिट? नना नावा बाबाना लोतेन मनमळ बेस इंचि मीकु तेळियोना?” इंचि इत्तोर. 50 गानि येसु वळकुता पोल्लेना अर्तम मात्रम ओना यावल-बाबांक तेळिया हिल्ले.§स्वर्गमते मनना पेनबाबाना बारेमते येसु वळकुतोर, गानि ओना यावल-बाबांक मात्रम इद संगति तेळिया हिल्ले.
51 पजा येसु ओना यावल-बाबानतोनि कलियसि नासरेत नार होत्तोर. तल्लुर-बाबो वेहता पोल्ले पोर्रेन ताकसेक मनुंदुर. ओना यावल इव अन्नि पोल्लें दाना मनसुने इरसि विचारम कीसेके मनुंदु. 52 इल्हा येसु, बुद्दिते, ताकतते बेर्स्सेके होत्तोर. इंका पेन आनि मनकालोरा नदरतेगुडा बेस ताकुंदुर.
*2:1 कैसर इद राजाना पोरोल आयो. रोम सरकारते अन्निटकन्ना पेद्दा पदवि आंद.
†2:1 कर वसुल कियनाहाटीं राजाल सिरगंति कियालय आदेस हीतोर.
✡2:4 मीका 5:2
‡2:4 नासरेत नाटेनाल बेतलहेम नार वेल्लेन एत्तुने मंता. आनि दग्गेर-दग्गेरा 150 किलोमिटर लक्कु मंता.
§2:11 किरिस्तु किरिस्तु इत्ते युनानि बासाते निय होकसि निलाहता वरोर मनकल इंचि अर्तम. यहुदि जातिते पेर्मान, राजान निलाहनेंके ओर्कु निय होकसि निलाहंतुर. मनकन ओना पापमताल पिसागोटलय पेन बोन अय्ते निल्हाचि लोहता ओरे किरिस्तु.
*2:22-24 लैव्यवस्ता 12:1-8ते वेहताप उंदि मुरतळ मर्रिन कनानय्ते नल्पै रोजकुनदाका मुट्टुड मनंता.
†2:41 दाटसि होनना पंडुगु इजिप्त देसेमता गुलामगिरिताल यहुदि लोकुल्कुन पेन पेचाहचि तत्ता मतिते, इद पंडुगु कींतुर. गुलामगिरिताल पलाते अरता रोजु इजिप्त देसेमता हरेक लोता पेद्दा मर्रिन पेनदा दूता हव्कुता. गानि यहुदिल्कुना लोतोर्कुनाल बोरे हाया हिल्लुर.
‡2:42 यहुदि जातितोर वरोर पेडल पन्नेंड वर्सानोर आतस्के, ओन्क यहुदि जातितोरा अन्नि रिवाजकु आनि मूसाना नियमकुना पालन किया पींता.
§2:50 स्वर्गमते मनना पेनबाबाना बारेमते येसु वळकुतोर, गानि ओना यावल-बाबांक मात्रम इद संगति तेळिया हिल्ले.