मरकुस रासता बेसता कबुर
परिचयम
रासतोना पोर्रोल- मरकुस, (इसवी सन 60-64).
मरकुस येसुना वरोर सिस्युड मत्तोर. ओर इद पुस्तकमते पेनदा मर्रि येसु किरिस्तु लोकुल्कुनाहाटीं बतल-बतल कीतोर, इवुना बारेमते रासतोर. इव्टे मत्ता पोल्लें इंदकेटा इस्राएल देसेमते, एनकटा जर्गतव निजम पोल्लें आंदुं. इद बेसता कबुर, असल अय्ते सामिन विस्वासम कियवोराहाटीं रासतोर. अदुनहाटीं येसु सामि वेहता पोल्लेंकन्ना एक्को, ओर कीता इचंत्रमाता कबाह्कुनपोर्रो वेल्ले जोर हीसि रासि मंता.
अस्के येसु सामि बच्चुटुर्कनो देय्याल्क पीसि मत्तोर्कुन ओरंटेताल देय्याल्कुन गेदमिसि, ओर्कुन बेस कीतोर. अल्हेने बच्चुटुरो एळ्किने, तकलिपकुने मत्तोर्कुन, गुड्डिर्कुन गूनिर्कुन बेस कीतोर. येसु सामि लेक्का हिल्वच्चुं अद्बूतमातव आनि महिमातव कबाह्कगुडा कीतोर. हेय्युं वेय्कुना मंदिक हेय्युं हारिने पीरमेड गाटो हियमळ, हातोर्कुन जीवा अराहमळ, एतपोर्रो ताकमळ इल्हा वेल्लेने इचंत्रमाता कबाह्क कीतोर.
इवन्नि हूळसि वेल्लेटुर लोकुल्क येसु वेहना पोल्लें केंजुंदुर. येसु, “नना मनकना रूपमते पुटता पेनदा मर्रिन,” इंचि वेहचि, सिराप पेने किया परानव कबाह्क कियुंदुर. वेल्लेटुर लोकुल्क येसुन, “पेनदा मर्रि” इंचि ओप्कुत्तुर. इदुना हेंदाल यहुदि पेद्दाल्कुंक येसुना पोर्रो होंग वायुंदुं. ओन बल्हाना हव्कना इंचि मोका हूळसेक मत्तुर.
आकिरते उंदि रोज ओन दोर्का पीसि हव्कतुर. ओन क्रुसुनपोर्रो मोल्लां कोह्किसि वेलळ वाटसि हव्कतुर. अव अन्नि कबाह्क वरोर सिपायिल्कुना अदिकारना मुन्ने जर्गतां. आ अदिकारिगुडा “ईर निजमे पेनदा मर्रि” इंचि ओप्कुत्तोर.
इंदके इद पुस्तकम हद्वानेंके, “येसु बोर आंदुर?” इंचि नीवा मनसुने अनपिचंतनो निमे विचारम कीम.
असल येसु इगे बूमिपोर्रो बल्हा पिसतोर? बतल-बतल कीतोर? क्रुस पोर्रो मोल्लां कोह्किसि वेलळ वाटसि हव्कता पजा मूड रोजकुने बल्हा तेदतोर? मर्रा मल्सि स्वर्गमते होंचि पेन बाबाना पक्कते उद्दिस दुनियातुन बल्हा ताकिचेके मंतोर? इवन्नि इद पुस्तकम हद्विते तेळियंता.
इंदके, इद बेसता कबुर बतल इत्ते, पेन मना अंटुर्कुन वेल्ले पावरमते हूळसेक मंता. दाना मर्रि येसुना हामुरता हेंदाले मनाकु मुक्ति हियालय ओन लोहचीता. अदुनहाटीं बोर-बोरय्ते पेन पोर्रो बरोसा इर्सि ओन मोळकंतुरो ओर्क बस्केळ्क पिस्सना पिस्वर दोर्कंता इंचि इद पुस्तकमते रासि मंता.
बगा बतल मंता
येसु पेनदा पोल्लें वेहालय सुरु कियमळ1:14–9:50
येसु येरुसलेमते होनमळ 10:1-52
येरुसलेमते येसुंक हामुर वायमळ 11:1–15:47
येसु हासि मर्रा जीवा अरमळ 16:1-8
येसु लोकुल्कुंक दिसमळ 16:9-20
1
बेसता कबुर सुरु आयमळ
1 पेनदा मर्रि, येसु किरिस्तुना बेसता कबुर सुरु आयमळ. 2 पेनदा कबुरतोर यशायाहना पुस्तकमते बल्हा रासि मंता इत्ते, “हूळा! नावा कबुरतोन निकन्ना मुन्ने लोहंतन. ओर निहाटीं हर्रि तयार कींतोर.”✡मलाकी 3:1 3 उस्के बूमिते वरोना अल्किर केंजा वासंता: “सामिनाहाटीं हर्रि तयार कीम्टु, ओना हर्रि सवरगा कीम्टु,”✡यशायाह 40:3 इल्हा बापतिस्मा हियना योहानुना बारेमतेने पेन वेहाचि मत्ता.
बापतिस्मा हियना योहान गोंडी
4 पेनदा कबुरतुर रासतापे बापतिस्मा हियना योहान उस्के बूमिते वातोर, “कीता पापाल्कुन ओप्कुंचि मनसु मार्सकुंचि बापतिस्मा येतानय्ते, पेन मीवा पापाल्कुन मापि कींता,” इंचि लोकुल्कुंक वेहुंदुर. 5 इद केंजसि पूरा यहुदिया राज्येमते आनि येरुसलेम सहरते मंदना लोकुल्क ओनगा वातुर आनि ओरा पापाल्कुन ओप्कुंचि, ओनहेंदाल योर्दन बेरेटे ओर बापतिस्मा येतकुत्तुर.
6 योहान लोटापेट्टा बूराते तयार कीतव कपडिं केरसि तोल्दा पट्टा नडिक तासकुनुंदुर. ओर गोल्लाबामां आनि हुर्वे निय तिनुंदुर. 7 ओर इल्हा प्रचार कियुंदुर, “नाकन्ना सक्तिमंतुड नावा पज्जोटाल वासंतोर. नना ओना मुन्ने वंगसि, ओना बूटकुना नोंडेन लेहना लायकगुडा हिल्लेन. 8 नना मीक एतोनि बापतिस्मा हीतन गानि ओर मीक पवित्र आत्माते बापतिस्मा हियानुर,” इंचि प्रचार कीतोर.
येसु बापतिस्मा येतमळ
(मत्तयाल 3:13-17; लूकाल 3:21-22)
9 अव रोजकुने येसु गालिल राज्येमता नासरेत सहरताल वासि, योर्दन बेरेटे योहानुना हेंदाल बापतिस्मा येतकुत्तोर. 10 येसु बस्के अय्ते एताल पलाते वातोर, अस्केने मब्बु बैय्यरा आयानद आनि पवित्र आत्मा पावरेम पिट्टेलेसिं ओना पोर्रो रेय्यानद हूळतोर. 11 अच्चोटेने मब्बुनाल उंदि अल्किर, “निमे नावा पावरमगला मर्रिन आंदिन. नीहेंदाल नना आनंदमते मंतन” इंचि केंजा वाता.
पेनदा दूतां येसुना सेवा कियमळ
(मत्तयाल 4:1-11; लूकाल 4:1-13)
12 अद आता पज्जा बिराना पवित्र आत्मा येसुन उस्के बूमितेके लोहता. 13 अगा नल्पै रोजकु केडा जिवरासिल्कुना नड्डुम मनानेंके, देय्यम येसुनगा वासि आसें हूपिचि पापमते अराहालय हूळता. अस्के पेनदा दूतां वासि ओना सेवा कीतां.
येसु पेनदा पोल्लें वेहालय सुरु कियमळ
(मत्तयाल 4:12-17; लूकाल 4:14-15)
14-15 योहानुन हेरोद राजाल जेलते वाटता पजा, येसु गालिल राज्येमते वासि, “मिमेट एदुर हूळाना वेला पूरा आता, आनि पेनदा राज्येम दग्गेरे एवता. मनसु मार्सकुंचि बेसता कबुरपोर्रो विस्वासम इर्राट,” इंचि पेनदा राज्येमता बेसता कबुर वेहतोर.
येसुना मोदाटा सिस्युल्कु
(मत्तयाल 13:10-17; लूकाल 8:9-10)
16 गालिलता सेर्वु ओड्डु पीसि येसु होंचेके मनानेंके सिमोनुन आनि ओना तम्मुर अंदरियान हूळतोर. ओर जिम्मां पियानोर मत्तुर, अदुनहाटीं ओर सेर्वुने ओल्लां वाटसि जिम्मां पीसेक मत्तुर. 17 अस्के ओरतोनि येसु, “नावा पज्जो ताकट, लोकुल्कुन नहगा तायानोरलेसिं मीकुन तयार कींतन,” इंचि वेहतोर. 18 ओर अद पोल्ले केंजसि, बिराना ओरा ओल्लां अगाने होळसीतुर आनि ओना पज्जो होत्तुर.
19 येसु इंका इच्चो मुन्ने होत्तारिते जब्दिना मर्रि याकोब आनि ओना तम्मुर योहान डोंगाते ओल्लां सवरिचेके मत्तद दिसतुर. 20 येसु ओर्कुन बिराना केयतोर. अस्के ओरा बाबाल जब्दिन आनि बूतिनोर्कुन अगाने डोंगाते होळसीसि ओरगुडा येसुन पज्जो होत्तुर.
येसु देय्यम पीतोन बेस कीतोर
(लूकाल 4:31-37)
21 ओर अंटुर कूळसि कपरनहुम सहरते होत्तुर. अगा येसु नोमकेम रोजुने दर्मसास्त्रम कराहना लोते होंचि पेनदा पोल्लें कराहलय दल्गतोर. 22 पेनदा पोल्लें दर्मसास्त्रम कराहना गुरुल्क वेहताप आयो गानि ओनकु अदिकार मत्ताप कराहतोर. लोकुल्क ओना पोल्लें केंजसि इचंत्रम आतुर. 23 अदे दर्मसास्त्रम कराहना लोतगा वरोर देय्यम पीतोर मत्तोर. 24 ओर येसुन, “निमे बोन आंदिनो नाक एरपाटे, निमे नासरेत सहरता येसुन आनि पेनदा पवित्र मर्रिन आंदिन. मावातोनि नीकु बाता कबळ? माकुन नासडेम कियालय वातिना?” इंचि वरगेयसि इत्तोर. 25 अद केंजसि येसु, “निमे चुपचाप मन, ओनंटेताल पलाते पेय्सा,” इंचि जोरसे गदरिचतोर. 26 अस्के आ देय्यम ओन गजागजा ऊपसि जोरसे वरगेयसेके ओनंटेताल पेय्सि होत्ता. 27 अदुन हूळसि अगा मत्तोर अंटुर, “इद इल्हा-बल्हा जर्गसेके मंता? इव अय्ते पूना पोल्लें कराहमळ आंदु, ईर अदिकारमते देय्याल्कुन ओनंटेताल पेय्सि होंटु इत्ते अव ईना पोल्ले केंजसेक मंतां,” इंचेके इचंत्रम आसि वरोंक-वरोर वळ्कसेक मत्तुर. 28 अल्हा येसुनव अगा जर्गता गटनां पूरा गालिल राज्येमते तेळियसि होत्ता.
येसु वेल्लेटुर्कुन बेस कियमळ
(मत्तयाल 8:14-17; लूकाल 4:38-41)
29 येसु आनि ओना सिस्युल्कु सिमोन, अंदरियल, याकोब आनि योहान दर्मसास्त्रम कराहना लोताल बिराना पलाते पेय्सि सिमोन आनि अंदरियना लोन होत्तुर. 30 अगा सिमोनुना पोरळ एळकिते मींडसि मत्ता. अद एळकिते मंता इंचि ओर येसुंक वेहतुर. 31 येसु होंचि दाना कय पीसि तेहतोर. अस्के बिराने एळकि मगता आनि अद ओर्कुन आवरिच्कुनालय दल्गता. 32 अद रोज पोळदु होत्तारिते बीमार्कुनोर्कुन आनि देय्याल्कु पीतोर्कुन अंटुर्कुन येसुनगा पीसि वातुर. 33 पूरा सहरतोर येसु मत्ता लोता गलमातगा जमा आतुर. 34 येसु तीरतीराता बीमार्क मत्तोर वेल्लेटोर्कुन बेस कीतोर, देय्याल्कु पीसि मत्तोर वेल्लेटोर्कुना देय्याल्कुन पेचहचि गेदुमतोर. अव ओन एरपाट कियुंदुं, अदुनहाटीं ओर अवुन वळ्का हिया हिल्लोर.
येसु वरोरे पारतना कियमळ
(लूकाल 4:42-44)
35 येसु इंकुंदि रोज हक्केरेने बय-बय आयानेंके तेदसि बोरे हिल्वगा होंचि पारतना कीतोर. 36 सिमोन आनि ओना दंटातुर तेदता पजा येसुन पह्कालय दल्गतुर. 37 ओर येसुन हूळता पजा, “नीकुन अंटुर पह्कसेक मंतुर,” इंचि इत्तुर. 38 गानि येसु ओर्कुन, “मनम पका पीसि मत्ता नाह्कुने दाकोम, आ नाह्कुने पेनदा पोल्लें वेहमळ गावाले. इद कबळताहाटींगे नना वातन,” इंचि इत्तोर. 39 अल्हा ओर गालिल राज्येमता अन्नि नाह्कु तिरियसेके, ओरा दर्मसास्त्रम कराहना लोहकुने होंचि पेनदा पोल्लें वेहासेके, देय्याल्कु पीतोर्कुनगाटाल देय्याल्कुन पेचहचि गेदुमसेके होत्तोर.
येसु कुस्ट रोगमतोन बेस कियमळ
(मत्तयाल 8:1-4; लूकाल 5:12-16)
40 अल्हा होंचेके मनानेंके वरोर कुस्ट रोगमतोर येसुनगा वासि, काल्कुना पोर्रो अर्सि, “निमे इनकुत्ते नाकुन बेस किया परांतिन,” इंचि येसुन विनंति कीतोर. 41 येसुंक ओनपोर्रो दया वाता, “नावा मनसु मंता” इंचि ओर कय हाहचि ओन इटतोर. इटसि, “बेस आम!” इंचि इत्तोर. 42 इत्तारितेने ओना कुस्टरोगम होत्ता आनि ओर बेस आतोर. 43-44 अस्के येसु ओन, “इद पोल्ले बोर्के वेहमा हूळा. गानि निमे पेर्मानगा होंचि बेस आतन इंचि निवद निमे ओनकु हूप्सा. निमे बेस आतिन इंचि लोकुल्कुंक रुजुव कीसि हूप्सालय मूसाल वेहाताप मोक्कु हीम,” इंचि गट्टिगा वेहतोर. 45 गानि आ मनकल अगटाल पेय्सि अद पोल्ले अंटोर्क वेहालय दल्गतोर. “अंटोर्क तेळियता, नाकुन हूळसि लोकुल्क मंदानां-मंदां वांतुर,” इंचि कळमता नाह्कुने होना हिल्लोर. ओर अल्किर हिल्वा जागाते मत्तोर, अगागुडा लोकुल्क नालुं-मूलानाल ओना जाडा पीसि होत्तुर.