2
लकवा बीमारतोन बेस कियमळ
(मत्तयाल 9:1-8; लूकाल 5:17-26)
1 कोन्नि रोजकु आतारिते येसु कपार्नाहुम सहरते मल्सि वातोर, ओर लोन मंतोर इंचि लोकुल्कुंक तेळियसि होत्ता. 2 अस्के लोतागा इच्चोर वेल्ले लोकुल्क जमा आतुर गदा गलमाते नित्तलय जागागुडा मनाहिल्ले. येसु ओर्कु पेनदा पोल्लें कराहतोर. 3 अद वेलाते लकवा बीमारतोन नालुर येसुनगा पीसि वातुर. 4 गानि वेल्ले गर्दि मत्ताहाटीं ओर येसुनगा ओया परा हिल्लुर. अय्ते ओर लोतपोर्रो कटुल पियानच्चो बोंगा कीसि लकवा बीमारतोन येसुनगा रेहतुर.
5 येसु ओरा विस्वासमतुन हूळसि, लकवा बीमारतोन, “पेडा! नीवा पापाल्क मापि आतां,” इंचि इत्तोर. 6-7 अगा उद्दिस मत्तोरा लोप्पोटाल इच्चुर दर्मसास्त्रम कराहना गुरुल्क इद पोल्लेतुन केंजसि, “पेनदा अपमानम ईर बारि कींतोर? पेनदुन होळसिसि इंका बोरे पापाल्कुन मापि किया परोर,” इंचि ओर-ओरे विचारम कियालय दल्गतुर. 8 ओर-ओरे विचारम कियानद येसु ओना मनसुने बिराना एरपाट कीसि, “मिमेट इल्हा बारि मी मनसुने विचारम कीसेक मंतिर? 9 लकवा बीमारतोन, ‘नि पापाल्क मापि आतां’ इनमळ अल्कगाना? हिलाकुंटे, ‘नीवा कटुल तेहकुंचि ताका’ इनमळ अल्कगाना? बद अल्कगा?” इंचि पूसकीतोर. 10 पूस कीसि, “गानि मनकना रूपमते पुटतोंक ई बूमिपोर्रोटा पापाल्क मापि कियाना अदिकार मंता इंचि मीक तेळियोना,” इंचि इत्तोर. इंचि आ लकवा बीमारतोन, 11 “नना नीकु वेहासेके, निमे तेदा आनि कटुल तेहकुंचि लोन होन,” इंचि इत्तोर. 12 अस्केने ओर तेदतोर कटुल पीसि अंटुर मुन्ने पेय्सि होत्तोर. अदुन हूळसि अंटुर इचंत्रम आतुर. “इल्हा मोमोट बस्केने हूळा हिल्लोम” इंचि पेनदुन तल्सुकुनालय दल्गतुर.
येसु लेविन केयमळ
(मत्तयाल 9:9-13; लूकाल 5:27-32)
13 येसु मर्रा उंदि मल्का सेर्वुना ओड्डुंक होत्तोर. वेल्लेटुर लोकुल्क ओनगा वातुर आनि येसु ओर्कु पेनदा पोल्लें कराहलय दल्गतोर. 14 कराहमळ आतारित्ते अगटाल मुन्ने होनेंके अल्पिना मर्रि लेवि कर वसुल कियाना नाकातगा उद्दिस मत्तद हूळतोर. येसु ओन हूळसि, “नावा पज्जो ताका” इंचि इत्तोर. अस्के ओर तेदसि ओना पज्जो होत्तोर. 15 येसु आनि ओना सिस्युल्कु लेविना लोन होंचि गाटो तिनानेंके वेल्लेटुर कर वसुल कियानुर आनि वेरे पापि लोकुल्कगुडा ओरतोनि कलियसि गाटो तित्तुर. ओराव्टे वेल्लेटुर येसुन नमिसि ताकानुर मत्तुर. 16 येसु कर वसुल कियानोर आनि वेरे पापि लोकुल्कुनतोनि कलियसि गाटो तिनानद परिसिल्कुना इच्चुर दर्मसास्त्रम कराहना गुरुल्क हूळतुर. हूळसि, “येसु कर वसुल कियानोर आनि वेरे पापि लोकुल्कुनतोनि कलियसि गाटो बारि तिंचेके मंतोर?” इंचि ओर येसुना सिस्युल्कुन पूसकीतुर. 17 अद केंजसि येसु ओरतोनि, “बेस मत्तोंक डाक्टरना अम्सरम हिल्ले गानि बीमारते मत्तोंक डाक्टरना अम्सरम मंता. नना सत्तेमंतुल्कुनाहाटीं वाया हिल्लेन गानि पापिल्कुन केयालय वातन,” इंचि इत्तोर.
18 अद वेलाते, बपतिस्मा हियना योहानुना सिस्युल्कु आनि परिसिल्क उपासम पियुंदुर. अय्ते इच्चुर लोकुल्क येसुनगा वासि, “योहानुना सिस्युल्कु आनि परिसिल्क उपासम पींतुर गानि नीवा सिस्युल्कु उपासम बारि पियुर?” इंचि पूसकीतुर. 19 अस्के येसु ओरतोनि, “मर्मिना पेडल हेळमितोर्कुनतोनि मतच्चोदाका ओर उपासम किया परांतुरा? बदवेरादाका मर्मिना पेडल ओरतोनि मनंतोर अदवेरदाका ओर उपासम किय्युर,??? 20 गानि बस्के अय्ते मर्मिना पेडन ओरागटाल पीसि ओंतुर, अव रोजकुने ओर उपासम मनंतुर,” इंचि वेहतोर. 21 “बोरे आयिर पळाना कपडिक बोंगा अर्ते, अद बोंगातुन मुच्चालय पूना कपडिता तुकडा अंटा वाटोर. ओक्काला ओर अल्हा कियानय्ते पूना कपडि इगका होंचि पळाना कपडि इंकिच्चो हर्सि पेद्दा बोंगा आंता. 22 अल्हेने पूना अंगुर पानकमतुन पळाना तोलपुर्काते बोरे दोस्सुर, अल्हा दोसते अद अंगुर पानकम पुल्लगासि पळाना तोलपुर्कातुन हराचि वाटसि हिळु पोंगिस दांतां आनि तोलपुर्का इंका नासडेम आंता. अदुनहाटीं पूना अंगुर पानकम, पूना तोलपुर्कातेने दोसा पींता,” इंचि येसु इत्तोर.
नोमकेम रोजुना मालक येसु आंदुर
(मत्तयाल 12:1-8; लूकाल 6:1-5)
23 उंदि नोमकेम रोजुने येसु सिस्युल्कुनातोनि नेलिना पंटाताल होंचेके मनानेंके, ओना सिस्युल्कु तिननाहाटीं हेनकु उराहलय दल्गतुर. 24 अदुन हूळसि परिसिल्क येसुनतोनि, “बद कबळ अय्ते नोमकेम रोजुने कियमळ ओज्जो, अदे कबळ नीवा सिस्युल्कु बारि कीसेक मंतुर?” इंचि इत्तुर. 25 अस्के येसु ओर्कुन, “दाविदुंक आनि ओना दंटातोर्कुंक कर्वेसि मत्तस्के ओर बतल कीतुर मिमेट दर्मसास्त्रमते बस्केने हदवा हिल्लिरा? 26 अबियातार इनानोर पेद्दा पेर्मल मनानेंके दाविद पेनदा लोते होळियसि पेनदुक मोळ्कता हारिन तित्तोर आनि ओना दंटातोर्कगुडा हीतोर. अवुन अय्ते पेर्मलोर्कुंक तप्पा बोर्के तिनालय ओज्जो, अय्ना ओर तित्तोर,” इंचि इत्तोर. 27 मर्रा ओरतोनि येसु इल्हा इत्तोर, “नोमकेम रोजु मनकनाहाटीं कीसि मंता, मनकल नोमकेम रोजुनाहाटीं आयो. 28 अदुनहाटीं मनकना रूपमते पुटतोंक नोमकेम रोजुने बतल कियाना, बतल किया मनि इनना अदिकार मंता,” इंचि इत्तोर.