3
वत्सि होत्ता कयदोन येसु बेस कियमळ
(मत्तयाल 12:9-14; लूकाल 6:6-11)
1 येसु मर्रा उंदि मल्का दर्मसास्त्रम कराहना लोते होत्तोर. अगा वरोर वत्सि होत्ता कयदोर मत्तोर. 2 नोमकेम रोजुने येसु ओन बेस कियानय्ते येसुन तप्पुने पीकोम इंचि इच्चुर लोकुल्क हूळसेक मत्तुर. 3 येसु वत्सि होत्ता कयदोंकु, “अंटोरा मुन्ने वासि नित्ता,” इंचि वेहतोर. 4 अगा मत्तोर्कुन, “नोमकेम रोजुने बेसता कबळ कियमळ ओज्जंतना, कराब कबळ कियमळ ओज्जंतना? हिलाकुंटे पिसागोटते ओज्जंतना, हव्कते ओज्जंतना?” इंचि पूसकुतोर. गानि ओर चुपचाप मत्तुर. 5 ओर्क-बोर्के जीवा नोय्यो इंचि हूळसि येसुंक दुक्कम आता. ओर अंटुरेके होंगुने हूळसि, आ वत्सि होत्ता कयदोन, “नीवा कय मुन्नेळ्क कीम,” इंचि इत्तोर. आ मनकल कय मुन्नेळ्क कीतोर आनि ओना कय बेस आता. 6 अस्के परिसिल्क दर्मसास्त्रम कराहना लोताल पलाते पेय्सि हेरोद राजाना लोकुल्कुंक होंचि कलियतुर. कलियसि येसुन बल्हा हव्कना इंचि पिलान कीतुर.
वेल्लेटुर लोकुल्क येसुना पज्जो वायमळ
7-8 अगटाल पेय्सि येसु ओना सिस्युल्कुनतोनि गालिल सेर्वुनेके होत्तोर. येसु कियानव इचंत्रमता कबाह्क केंजसि गालिल आनि यहुदिया राज्येमताल येरुसलेम, इदुमिया राज्येम, सूर, सिदोन इनना सहरकुनाल, योर्दनता बेरेटा हब्बेटाल, आनि पका पीसि मत्ता नाह्कुनाल वेल्लेटुर मंदि येसुनगा वातुर. 9-10 बीमार्क मत्तोर्कुन वेल्लेटुर्कुन येसु बेस कीतोर. अदुनहाटीं इंका बीमार्कुने मत्तोर येसुन इट्टाना इंचि वरोंक-वरोर दोब्सेके वासेक मत्तुर. ओरपोर्रो अर्राकुंटा लक्कु मंदना इंचि, “उंदि सिन्न डोंगा नाहाटीं तयार कीम्टु,” इंचि येसु ओना सिस्युल्कुंक वेहतोर. 11 देय्याल्क पीसि मत्ता लोकुल्क येसुन बस्के अय्ते हूळुंदुरो अस्के, “निमे पेनदा मर्रिन!” इंचि वरगेयसि ओना मुन्ने हिळु अर्रुंदुर. 12 गानि येसु बोर आंदुर तेळिया मनि इंचि, “बोर्के वेहमट,” इंचि देय्याल्कुंक हुकुम हीतोर.
येसु पन्नेंड मंदितुन सिस्युल्क इंचि निलाहमळ
(मत्तयाल 10:1-4; लूकाल 6:12-16)
13 पजा येसु गुट्टापोर्रो होत्तोर. आ मंदिताल येसु बोर्कुनय्ते कोरतोर, ओर्कुन पेरसि केयकुत्तोर आनि ओर ओनगा होत्तुर. 14-15 ओर येसुनतोनि मनालय, पेनदा बेसता कबुर वेहनाहाटीं लोहालय इंचि पन्नेंड मंदितुन पेरतोर आनि ओर्कुन प्रेरित इंचि पोर्रोल दोसतोर. ओर्क देय्याल्क गेदमना अदिकार हीसि निलाहतोर. 16 ओरा पोर्रोल्क इल्हा मंतां: सिमोन, ईनकु येसु पत्रु इंचि पोर्रोल दोसतोर, 17 जब्दिना मर्क याकोब आनि ओना तम्मुर योहान. ईर इव्वुर्कुन बोनेर्गेस इंचि येसु पोर्रोल दोसतोर, इत्ते गर्जना कियानोर इंचि अर्तम. 18 अंदरियल, पिलिपु, बरतलमय, मत्तयाल, तोमल, हल्पिना मर्रि याकोब, तद्दै, सिमोन कनानि, 19 आनि येसुन दोकाते पीसि हियानोर इस्करियोत नाटेना यहुदल.
येसु आनि बेल्जाबुल इंदना देय्याल्कुना लिडर
(मत्तयाल 12:22-32; लूकाल 11:14-23)
20 पजा येसु उंदि लोन होत्तोर. अगागुडा इच्चोर वेल्लेन मंदि जमा आतुर गदा, येसु आनि ओना सिस्युल्कुंक गाटो तिनालयगुडा टाइम दोर्का हिल्ले. 21 येसु पिस्स-पिस्स कीसंतोर इंचि लोकुल्कुनहेंदाल ओना लोतोर केंजसि ओन लोन तायालय होत्तुर. 22 येरुसलेमताल वाता दर्मसास्त्रम कराहनोर येसु देय्याल्कुन गेदुमसेके इंचि, “ईना लोप्पो ‘बेल्जाबुल’ इंदना देय्याल्कुना लिडर होळियसि मंता, दाना बलमतेने ओर देय्याल्कुन गेदमा परसेक मंतोर,” इंचि इत्तुर.
23 अदुनहाटीं येसु ओर्कुन दग्गेरे केय्सि ओरतोनि उदाहरनते वेहातोर. “देय्यम दाना देय्याल्कुन बल्हा तेंडा परांता? 24 ओक्कला, उंदि राज्येमते मनानोरा लोप्पो वरोनद-वरोंक अर्राकुंटे अद राज्येम निला परांताना? बस्केने निला परो. 25 अल्हेने उंदि लोता लोप्पो वरोनद-वरोंक अर्राकुंटे अद लोन गट्टिगा मन्नो. 26 अदुनहाटीं देय्याल्कुना लिडर पीतोर्कुन देय्याल्कुना लिडरे गेदमानय्ते दाना राज्येम निला परो गानि नासडेम आंता. 27 अल्हेने ताकतवार मनकना लोते होळियसि ओना सामानतुन दोंगा कियाना इत्ते, ओन मुन्ने दोहचि वाटाकोंटे दोंगा किया परोर. ओन मुन्ने दोहचि वाटतेने दोंगा किया परांतोर, 28 नना मीक निजम वेहासेक मंतन, मनकालोर कीता अन्नि पापाल्कुन आनि तेंडिस पोहताप वळ्कतव अन्नि पोल्लेन पेन माप किया परांता. 29 गानि बोरे आयिर पवित्र आत्मातुन अपमानम कीते ओर्क बस्केने मापि दोर्को. असोंटा तप्पु कीता लोकुल्क बस्केळ्क पापमता दोसेमतेने मनंतुर,” इंचि वेहतोर. 30 अल्हा बारि वेहतोर इते, “ओना लोप्पो देय्यम मंता,” इंचि दर्मसास्त्रम कराहना गुरुल्क ओन इत्तुर, अदुनहाटीं वेहतोर.
येसुना यावल आनि तम्मुह्क
(मत्तयाल 12:46-50; लूकाल 8:19-21)
31 पजा येसुना यावल आनि तम्मुह्क ओर मत्ता लोतगा वातुर. ओर लोता पलाते नित्तिसि येसुन केयट इंचि लोहतुर. 32 लोकुल्क येसुना सुट्टु उद्दिस मत्तुर. ओर येसुन, “नीवा यावल आनि तम्मुह्क पलाते नीवा एदुर हूळसेक मंतुर,” इंचि वेहतुर. 33 अस्के येसु ओर्कुन, “बद नावा यावल, बोर नावा तम्मुह्क?” इंचि इत्तोर. 34 अस्के ओना सुट्टु उद्दिस मत्तोरेके हूळसेके, “इदे नावा यावल, ईरे नावा तम्मुह्क आंदुर. 35 बोरय्ते पेनदा इच्चा परकारम ताकंतुरो ओरे नावा तम्मुर, हेलळ आनि यावल आंद,” इंचि वेहतोर.