7
पेद्दाल्कुना रीतरिवाजता बारेमते कराहमळ
(मत्तयाल 15:1-9)
1 उंदि दिया येरुसलेमताल परिसिल्क आनि इच्चुर दर्मसास्त्रम कराहना गुरुल्क येसुनगा वासि जमा आतुर. 2 येसुना इच्चुर सिस्युल्कु यहुदि लोकुल्कुना रीतिरिवाज परकारम कय्क नोर्राकेने तिनानद ओर हूळतुर. 3 बारित्ते, परिसिल्क आनि यहुदिल्क अंटुर पेद्दाल्कुना रीतरिवाज मत्ताप कय नोर्राका तिन्नुर. 4 इंका ओर हाटुम होंचि वायना गानि एर तुंगाका तिन्नुर. अचोने आयका वाटीं, तालिं आनि रागिता बोडिं नोर्रमळ इसोंटव पेद्दाल्कुनाल ताकसेक वातव रीतरिवाजकुन नोमंतुर.
5 अय्ते परिसिल्क आनि दर्मसास्त्रम कराहना गुरुल्क येसुन, “नीवा सिस्युल्कु पेद्दाल्क वेहता रीतरिवाजुने बारि ताकुर, ओर तिनाका मुन्ने कय्क बारि नोर्रुर,” इंचि पूसकीतुर. 6 येसु ओर्कुन, “यशायाह इनना पेनदा कबुरतोर, मी असोंटा कपटि लोकुल्कुना गुनाल्कुना बारेमते निजमे रासतोर: ‘ईर लोकुल्क सिराप तोडदेने नावा कदर कींतुर, गानि ईरा मनसु मात्रम नाहागटाल बच्चोरो लक्कु मनंता. 7 ओर अंगडमे नावा पोर्रोल एतसेके मनंतुर. ईर मनकालोर तयार कीता पद्दतके निजमतव, अवुना पालन कियमळे दर्मम इंचि कराहंतुर’✡यशायाह 29:13 इल्हा रासि मंता. 8 मिमेट पेन हीता हुकुमतुन होळसि, मनकल तयार कीतव रीतरिवाजकुन पीसि ताकसेक मंतिर,” इंचि इत्तोर. 9 मर्रा ओरतोनि, “मीवा रीतरिवाजकुन पालन कियानाहाटीं, पेनदा हुकुमतुन लक्कु कियमळ मीक बेस अनपिचंता,” इंचि इत्तोर.
10 मूसाल, “निमे नीवा यावन-बाबाना कदर कीम, बोरय्ते यावन-बाबान रांगंतोर ओन हव्कमळे गावाले,” इंचि इत्तोर. 11-12 गानि मिमेट अय्ते, “बोरन्ना मनकल ओना यावन-बाबांक हियना सहायम पेनदुक हीतन इंचि वेहानय्ते, ओर यावन-बाबांक हियाकुना बतल आयो, इंचि कराहंतिर. 13 गानि मिमेट अय्ते, बोरन्ना मनकल ओना यावन-बाबानतोनि, बद सहायम अय्ते नाहेंदाल मीकु दोर्कना मत्ता, अदुन नना पेनदुक कोर्बान इंचि हीतन इनानय्ते, मिमेट ओन ओना यावन बाना सेवा किया हिय्यिर,” इंचि वेहतोर.
मनकन हेळ्हना पोल्लें
14 येसु मर्रा उंदि मल्का लोकुल्कुन दग्गेरे केय्सि, “मिमेट अंटुर नना वेहना पोल्लें केंजट, अवुन अर्तम कीम्टु,” इंचि वेहालय सुरु कीतोर. 15-16 “पलाताल मनकना पीटे होननव ओन अपवित्र कियों, गानि मनकना पीटाल पलाते वायानवे ओन अपवित्र कींतां,” (बोन्कु अय्ते केंजालय केव्क मंता, ओर केंजंतोर) इंचि वेहतोर.
17 अल्हा वेहतारिते येसु लोकुल्कुन होळसिसि, सतता लोन होत्तोर. अस्के ओना सिस्युल्कु ओर वेहता उदाहरनता अर्तम पूसकीतुर. 18 येसु ओर्कुन, “पलाताल बतल अय्ते पीटे दांतां अद मनकन अपवित्र किया परों इंचि मीकगुडा तेळियोना? इंचि इत्तोर. 19 पलाताल होननद ओना मनसुने होन्नो गानि ओना पीटे दांता. आयंका अद अर्गिस पेय्सि दांता. अल्हा वेहचि, तिनानव अन्नि तिंडि तिनालय ओज्जंतां इत्तोर. 20 मनकना लोप्पोटाल बतल-बतलय्ते पलाते पेय्संतां अवे ओन अपवित्र कींतां. 21 बारित्ते मनकना मनसुनाल कराब विचाराल्क, बोगमतनम, दोंगा कियमळ, हव्कमळ, मुत्तो आयि मुय्दो आयि वेरे हर्रि ताकमळ, 22 आस्ति कियमळ, दुस्ट गुनम, कपटपना, मेंदुलता आसे, कळ्क पोत्मळ, अपमानम कियमळ, गर्रा आनि पागल गुनाल्क पलाते पेय्संतां. 23 इव अन्नि सेड्डा पोल्लें मनकना लोप्पोटाल पलाते पेय्सि, मनकन अपवित्र कींतां,” इंचि वेहतोर.
यहुदि आयवा मुरतटा विस्वासम
(मत्तयाल 15:21-28)
24 येसु गालिल राज्येमताल पेय्सि सूर आनि सिदोन एरियाते होत्तोर. अगा उंदि लोन होंचि, इगे वातद बोनके तेळिया मनि इनकुंचि, आगतोर. गानि मक्का पर्रा हिल्लोर. 25-26 ग्रीक देसेमता उंदि मुर्तळ येसुना बारेमते केंजता. अद सिरिया देसेमता पोनिसिया इनना नाटे पुटतद आंदु. दाना सिन्ना मिय्याटुन देय्यम पीसि मत्ताहाटीं अद येसुनगा वासि, ओना काल्कुना पोर्रो अर्ता. अर्सि “अद देय्यमतुन पेचहचि गेदमा,” इंचि येसुन विनंति कीता. 27 येसु अदुन, “मुन्ने पिलाल्क पीरनिंडा तिनिरकांटी, बारित्ते पिलाल्कुना गाटो नय्कुंक वाटमळ बेस आयो,” इंचि इत्तोर. 28 अस्के अद मुर्तळ येसुन, “निजमे सामि! गानि हिळु अर्ता मेत्कुल्कु नय्कुगुडा तिंतां गदा?” इंचि इत्ता. 29 अस्के येसु, “निमे इल्हा इत्ताहाटीं, नीवा मिय्यटाल देय्यम पेय्सि होत्ता. निमे लोन होन,” इंचि इत्तोर. 30 अद मुर्तळ लोन होंचि हूळतस्के, दाना मिय्यळ कटुलते मींडिस मंता आनि देय्यम पेय्सि होत्ता इंचि अद हूळता.
पनकना-सेव्टि मनकन येसु बेस कियमळ
31 अद आता पजा येसु सूर एरियाताल मल्सि सिदोन होत्तोर. अगटाल देकापोलिस एरिया दाटसि गालिल सेर्वुनगा वातोर. 32 अस्के इच्चुर लोकुल्क, वरोर पनकना-सेव्टि मनकन येसुनगा पीसि वासि, “नीवा कय ईना पोर्रो इर्रा,” इंचि विनंति कीतुर. 33 येसु आ पनकना-सेव्टि मनकन मंदिताल अलग ओसि, ओना केव्कुने सतता वेल्कु दोसतोर, आयंका आ वेल्कुना पोर्रो उस्कीसि ओना नाल्केतुन इटतोर. 34 आनि मब्बुनेके हूळसेके जोरसे नेस्किस “एप्पता” इत्तोर. इत्ते कुल्ला आम इंचि अर्तम. 35 अस्केने ओना केव्क केंजा वायालय दल्गतां, ओना नाल्केगुडा मेसलिसि ओर साप वळ्कालय दल्गतोर. 36 इद पोल्ले बोर्के वेहमट इंचि येसु ओर्कु गट्टिगा वेहतोर गानि ओर लोकुल्कुंक वेहता दानकन्ना एक्को वेहासेक होत्तुर. 37 केंजता लोकुल्क अंटुर इचंत्रम आसि, “ओर बतलय्ते कीतोर, बेस कीतोर. सेव्टोर्कुन केंजा वायानाल, मूकालोर्कुन वळ्का वायानाल कींतोर,” इंचि इत्तुर.