1 अव रोजकुने मर्रा उंदि मल्का येसुनगा वेल्‍लेन लोकुल्क जमा आतुर. ओरगा तिनालय बतले हिलाका मत्‍ता. अदुनहाटीं येसु ओना सिस्युल्कुन केय्‍सि, 2 “ईर लोकुल्क नहगा मूंड रोजकुनाल मंतुर, ईरगा तिनालय बतल हिल्‍ले. अदुनहाटीं नाक ईर पोर्रो दया अनपिचंता. 3 इच्‍चुर लोकुल्क वेल्‍ले लक्‍कुटाल वातोर मंतुर. नना गिंटा ईर्कुन कर्वुने लोन लोहानय्ते, नड्‍डुम हर्दे बगानना रिम्मा वासि अर्रानुर,” इंचि इत्‍तोर. 4 अस्के सिस्युल्कु येसुंक, “इद उस्के बूमिते इच्‍चोर लोकुल्कुंक हालानाल गाटो बगाटाल तरा पर्कोम?” इंचि जवाब हीतुर. 5 अस्के “मीहगा बच्‍चुं हारिं मंतां?” इंचि येसु ओर्कुन पूसकीतोर. ओर, “एडुं हारिं मंतां” इंचि जवाब हीतोर.

6 पजा येसु लोकुल्कुन हिडु बूमिपोर्रो उद्‍दट इंचि वेहतोर. अव एडुं हारिं पीसि पेनदुक दन्यवाद कीतोर आनि हारिन उराहचि, “ओर्क तूसि हीम्टु” इंचि सिस्युल्कुंक हीतोर. अस्के सिस्युल्कु येसु वेहताप तूसि हीतुर. 7 ओरगा इच्‍चुं सिन्‍ना जिम्मांगुडा मत्‍तां. येसु अवुनहाटीं गुडा पेनदुक दन्यवाद कीसि “लोकुल्कुंक तूसि हीम्टु” इंचि सिस्युल्कुंक आदेस हीतोर. 8 अगा मत्‍तोर अंटुर लोकुल्क पीरनिंडा तित्‍तुर. तित्‍ता पजा मिगुल्ता हारिना तुकडां जमा कीते, एडुं तट्‍टां निंडतां. 9-10 अगा गाटो तित्‍तोर दग्गेरे-दग्गेरे नालुं वेय्‍कुना लोकुल्क मत्‍तुर. ओर अंटुर्कुन सार्ला कीसि, येसु ओना सिस्युल्कुनतोनि उंदि डोंगाते उद्‍दिस दल्मनुता जिल्‍लाते होत्‍तोर.

11 अगा होत्‍ता पजा परिसिल्क वासि येसुना परिक्‍सा एतालय, “निमे स्वर्गमताल वातिन इंचि मोमोट बरोसा कियानाहाटीं माकु उंदि चिन्ह हूप्‍सा,” इंचि वाद-विवाद??? कीतुर. 12 अस्के येसु आत्माते जोरते नेस्कीसि, “इद पीडीतोर चिन्ह हूप्‍सा इंचि बारि इंतुर? नना मीक निजम वेहंतन, इद पीडितोर्क बदे चिन्ह हूप्‍समळ जर्गो,” इंचि इत्‍तोर. 13 अद आता पजा लोकुल्कुन अगाने होळसिसि, येसु आनि ओना सिस्युल्कु डोंगाते उद्‍दिस सेर्वुना हब्बेर ओड्‍डुंक होत्‍तुर.

14 सिस्युल्कु हारिं तायालय मरुंग्तुर. ओरगा डोंगाते उंदे हारि मत्‍ता. 15 अस्के येसु सिस्युल्कुंक, “परिसिल्क आनि हेरोद लोकुल्क पुल्‍लाटा पिंडितसंटोर आंदुर, ओरा बारेमते उसारते मंटु,” इंचि कडक वेहतोर. 16 अद केंजसि सिस्युल्कु, “मनागा हारिं हिल्‍लें इंचि येसु इल्हा वळ्कसेकेनो बतलो?” इंचि ओर-ओरे वळ्कलय दल्‍गतुर. 17 ओर वळ्कनद येसु एरपाट कीसि, “हारिं हिल्‍लें इंचि बारि वळ्कसेक मंतिट? मिमेट इंदकेगुडा एरपाट कीसेक हिल्‍लिरा? मीक इंदकेगुडा तेळियसेक हिल्‍लेना? मीवा बुद्‍दि कबळ कीसेक हिल्‍लेना? 18 मीक कळ्क मंचिगुडा हूळा पर्सेक हिल्‍लिरा? केव्क मंचिगुडा केंजा पर्सेक हिल्‍लिरा? अद मिमेट मति मर्गितिरा? 19 नना हेय्युं हारिंन हेय्युं वेय्‍कुना मंदिक दोसतन, अस्के मिगुल्तव हारिना तुकडां पेर्सि बच्‍चुं तट्‍टां निह्तिट?” इंचि पूसकीतोर. अस्के ओर, “पन्‍नेंड तट्‍टां” इंचि जवाब हीतुर. 20 अस्के येसु, “अल्हेने, एडुं हारि तुकडां कीसि, नालुं वेय्‍कुना मंदिक दोसतन. अस्के मिमेट मिगुल्तव हारिना तुकडां जमा कीसि बच्‍चुं तट्‍टां निह्तिट?” इंचि पूसकीतोर. अस्के ओर, “एडुं” इंचि वेहतुर. 21 “अय्ते मीक इंदकेगुडा अर्तम आसेक हिल्‍लेना?” इंचि येसु इत्‍तोर.

22 ओर बेतसेदा इनना नाटे एव्ता पजा इच्‍चुर लोकुल्क वरोर गुड्‍डिन पीसि येसुनगा वातुर आनि, “निमे ईन इटा,” इंचि विनंति कीतुर. 23 येसु आ गुड्‍डिना कय पीसि नाटेना पलाते ओतोर. ओसि गुड्‍डिना कळ्कुने उस्कतोर आनि ओनपोर्रो कय इर्सि, “इंदके नीकु बतलन्‍ना दिसेके मंतना?” इंचि पूसकीतोर. 24 अस्के आ गुड्‍डि पोर्रो हूळसि, “मनकालोर दिसेक मंतुर गानि ओर मराकु ताकताप मागुर-मागुर दिसेक मंतुर,” इंचि इत्‍तोर. 25 अस्के येसु मर्रा उंदि मल्का ओना कय्‍क, आ गुड्‍डिना कळ्कुना पोर्रो इर्तोर. ओर उंदेतीर हूळता पजा नदर वाता. ओन्कु अन्‍नि किलियर दिसालय दल्‍गतां. 26 अस्के येसु ओन, “निमे नाटे होळियाकुंटा, सवरगा नीवा लोन होन,” इंचि लोहचितोर.

27 येसु ओना सिस्युल्कुनतोनि कैसरिया पिलिपि सहरता पका पीसि मत्‍ता नाह्कुने होनालय पेय्सतुर. होनानेंके येसु ओना सिस्युल्कुन, “नना बोन आंदुन इंचि लोकुल्क इंतुर?” इंचि पूसकीतोर. 28 अस्के ओर, “इच्‍चुर बापतिस्मा हियना योहान, इच्‍चुर बारे पेनदा कबुरतोर एलियल, इंका इच्‍चुर बारे एनकटा पेनदा कबुरतोरा लोप्पोटाल बोरो वरोर आयावच्‍चु इंचि इंतुर,” इल्हा वेहतुर. 29 “अय्ते, नना बोन आंदुन इंचि मिमेट इंचेके मंतिट?” इंचि येसु ओर्कुन पूसकीतोर. अस्के पत्रु, “निमे किरिस्तुन आंदिन,” इंचि इत्‍तोर. 30 येसु ओर्कुन, “नावा बारेमते बोर्के वेहमट,” इंचि गट्‍टिगा वेहतोर.

31 अद आता पजा, “यहुदि पेद्‍दाल्क, पेद्‍दा पेर्मालोर आनि दर्मसास्त्रम कराहना गुरुल्कुना हेंदाल मनकना रूपमते पुटतोंक कस्‍टाल्क बोगांचा पींता आनि ओन हय्सुर, हव्कंतुर गानि हासि मूड रोजकुना पजा, मर्रा जीवाते तेदंतोर,” इंचि सिस्युल्कुंक करहालय दल्‍गतोर. 32-33 येसु इद पोल्‍लेतुन कुल्‍ला-कुल्‍ला वेहतोर. अय्ते पत्रु येसुन बाजुंक ओसि, “अल्हा इनमा सामि!” इंचि रांगतोर. गानि येसु पज्जो मल्सि सिस्युल्कनेके हूळसि पत्रुन, “अरे देय्यम, ना मुन्‍नेटाल पेय्सि होन. निमे मनकलोरलेसिं विचारम कीसेक मंतिन, गानि पेनदालेसिं विचारम कीसेक हिल्‍लिन,” इंचि ओन रांगतोर.

34 पजा येसु ओना लोकुल्कुन आनि सिस्युल्कुन ओनाहेके केय्‍सि, “ओक्‍काला बोरन्‍ना मनकल नावा पज्जो वांतन इंतोरो, ओर ओना इस्‍टाल्कु होळसि, सतता क्रुस तेहकुंचि नावा पज्जो वायना. 35 बारित्‍ते, बोरय्ते ओना जीवातुन पिसागोटालय हूळंतोर, ओर ओना जीवातुन पोगोटकुंतोर. गानि बोरय्ते नाहाटीं आनि बेसता कबुरताहाटीं जीवा हींतोर, ओर ओना जीवातुन कापाळकुंतोर. 36 बोरन्‍ना दुनियंता संपलिचिगुडा, ओना जीवातुन पोगोटकुत्‍ते बतल पाय्दा आंता? 37 मनकल ओना जीवाहाटीं बदला बतल हिया परांतोर? बतल हिया पर्रोर. 38 बोगमतनमते, पापमते निंडिस मत्‍ता इद पीळिते बोरे आयिर नावाहाटीं आनि नावा पोल्‍लेनहाटीं सिग्गु अरांतोर, मनकना रूपमते पुटतोर बस्के अय्ते पवित्र दूतनतोनि, ओना बाना पेद्‍दातनमते वायानुर, अस्के असोंटा मनकनाहाटीं, ईर नावोर इनालय सिग्गु अरानुर,” इंचि वेहतोर.