9
1 मर्रा येसु ओरतोनि, “नना मीक निजम वेहसेके मंतन, इगे नित्तिसि मननोरा लोप्पोटाल इच्चुर लोकुल्क पेनदा राज्येमता ताकततुन हूळवा ओर्क हामुर वायो,” इंचि इत्तोर.
येसुना रुपम मारियमळ
(मत्तयाल 17:1-13; लूकाल 9:28-36)
2 हारुं रोजकु आता पजा येसु पत्रुन, याकोबुन आनि योहानुन पीकुंचि उंदि एत्तु गुट्टापोर्रो होत्तोर. अगा ओरा मुन्ने येसुना रुपम मारिय्सि होत्ता. 3 ओना कपडिं तेल्लगा तलातला मेर्सेक मत्तां, इच्चोर तेल्लगा गदा बूमि पोर्रोटोर बोरे साकलल अच्चोर तेल्लगा आयनाल हुक्का पर्रोर. 4 अस्के एलियल*एलियल आनि मूसाल पेनदा कबुरतोर आंदुर. आनि मूसाल येसुनतोनि वळ्कनद ओर मुव्वुर हूळतुर. 5-6 ओर्कुन हूळसि ओर वेल्लेन वेरियतुर. अदुनहाटीं पत्रु येसुनतोनि बतल वळ्कना अद तेळियका, “गुरु! मनम इगे मनमळ बेस मंता. उंदि निहाटीं, उंदि एलियनाहाटीं आनि उंदि मूसानाहाटीं मोमोट मूड गूळसें वाटंतोम,” इंचि इत्तोर. 7 अस्केने उंदि मब्बु तेर्पे वासि ओर्कुन मुच्ता. आ मब्बुनाल, “ईर नावा पावरमता मर्रि आंदुर, ईना पोल्लें केंजट,” इंचि ओर्क अल्किर केंजा वाता. 8 अस्केने ओर नालुं-मूलां हूळतुर गानि अगा येसुंक तप्पा बोरे दिसा हिल्लुर.
9 ओर गुट्टा पोर्रोटाल रेयानेंके येसु ओर्कुन, “मनकना रूपमते पुटता पेनदा मर्रि बदवेरादाका अय्ते हातोरा लोप्पोटाल मर्रा तेदोर, अदवेरदाका इगे बतलय्ते हूळतिर अद बोर्के वेहमट,” इंचि कडक वेहतोर. 10 ओर अद पोल्लेतुन ओरा मनसुनेने इरतुर गानि “हातोरा लोप्पोटाल मर्रा जीवाते तेदमळ, इत्ते बतल?” इंचि ओर वरोंक-वरोर वळ्ककुनालय दल्गतुर. 11 पजा ओर येसुन, “किरिस्तुंकन्ना मुन्ने पेनदा कबुरतोर एलियल वायमळ गावाले इंचि दर्मसास्त्रम कराहना गुरुल्क बारि इंतुर?” इंचि पूसकीतुर. 12 “एलियले मुन्ने वासि अन्निन तयार कींतोर अद निजमे आंद, गानि मनकना रूपमते पुटता पेनदा मर्रिंक वेल्ले तकलिप बोगांचा पींता आनि ओन हय्सुर इंचि दर्मसास्त्रमते बारि रासि मंता? 13 नना मीक वेहंतन, एलियल मुन्नेने वासि मंतोर. ओना बारेमते दर्मसास्त्रमते बल्हा रासि मंता, अल्हेने लोकुल्क इनकुत्ताप ओनतोनि कीतुर,” इंचि येसु ओर्क वेहतोर.
देय्यम पीता पेडन येसु बेस कियमळ
(मत्तयाल 17:14-20; लूकाल 9:37-43)
14 येसु आनि ओनतोनि मत्तोर हिळु मत्ता सिस्युल्कुनगा वातुर. हिळु मत्ता सिस्युल्कुना सुट्टु वेल्लेने लोकुल्क जमा आसि मत्तुर आनि सिस्युल्कुनतोनि दर्मसास्त्रम कराहना गुरुल्क वदरुकुनानद येसु हूळतोर. 15 अगा मत्ता लोकुल्क येसुन हूळसि बिराना इचंत्रम आतुर आनि विच्चि होंचि नमस्कार कीतुर. 16 अस्के येसु दर्मसास्त्रम कराहना गुरुल्कुन, “मिमेट ईरतोनि बारि वदरुकुंचेक मंतिट?” इंचि पूसकीतोर. 17 अस्के आ मंदिताल बोरो वरोर येसुन, “गुरु, ना मर्रिंक मूका-देय्यम पीता, ओन निहगा पीसि ततन. 18 देय्यम ओन बस्के अय्ते पींता, अस्के अगाने हिडु हुक्कंता आनि ओना तोळदाल पोंगुर पेय्संता. ओर कर्रा-कर्रा पल्कु कोर्कसेके अल्हेने गट्टिगा आंतोर. इद देय्यमतुन ओनंटेताल गेदमट इंचि नीवा सिस्युल्कुंक वेहतन गानि ओरतोनि आया पर्राहिल्ले,” इंचि वेहतोर. 19 अस्के येसु ओर्कुन, “अरे विस्वासम हिल्वोरिटा! मीतोनि नना बचादाका मनकन? इंका मीकुन बच्चुं रोजकु सहन कीकन? ओन नहगा पीसि वट,” इंचि इत्तोर. 20 ओर आ पेडन येसुनगा पीसि वातुर. देय्यम येसुन हूळतारितेने, पेडन तेल्हाचि हिडु अराहता. आनि तोळदाल पोंगुर पेय्सि पोर्लालय दल्गतोर.
21-22 अस्के येसु पेडना बाबोन, “नि मर्रिंक बस्केटाल इल्हा आसेक मंता?” इंचि पूसकीतोर. अय्ते ओर, “सिन्नस्केटाले इल्हा आसेक मंता, आनि बच्चुंगो मल्कां तळमिते अराहचि, एते अराहचि हव्कलय हूळता गानि निमे मापोर्रो दया कीसि, माहाटीं बतलन्ना सहायम कियापर्ते कीम,” इंचि इत्तोर. 23 येसु ओन, “कियापर्ते कीम, इत्ते बतल इत्ताप? पेनदापोर्रो विस्वासम कियानोर्क अन्नि आया परांतां,” इंचि इत्तोर. 24 अस्केने पेडाना बाबल कांडेर तेंडसेके, “नना विस्वासम कींतन सामि, नना विस्वासम गट्टिगा आयालय सहायम कीम” इंचि इत्तोर.
25 वेल्लेटुर लोकुल्क विच्चि वासि गर्दि कियानद हूळसि येसु आ देय्यमतुन, “सेव्टी-मूका देय्यमतुना, नना नीकु हुकुम हींतन, ईनगाटाल पेय्सि होन, ईन मर्रा बस्केने पिय्मा,” इंचि गद्दरिचतोर. 26 अस्के आ देय्यम ओन जोरसे तेल्हाचि, वरगेयसि ओनंटेताल पेय्सि होत्ता. होत्तारिते पेडल हातोनलेसिं आतोर. वेल्लेटुर लोकुल्क ओर हातोर इत्तुर. 27 गानि येसु ओना कय पीसि तेहातोर. अस्के ओर तेदसि निल्तोर.
28 पजा येसु लोन होतस्के ओर वरोरे मत्तद हूळसि, “मोमोट आ देय्यमतुन पेडानगाटाल बारि गेदमा पर्रा हिल्लोम,” इंचि ओना सिस्युल्कु पूसकीतुर. 29 येसु ओर्कुन, “इसोंटा देय्यमतुन सिराप पारतनातेने गेदमा परांतोम,” इंचि इत्तोर.
येसु ओना हामुरता बारेमते वेहंतोर
(मत्तयाल 17:22-23; लूकाल 9:43-45)
30-31 ओर अगटाल पेय्सि गालिल राज्येम होनालय दल्गतुर. अदुनहाटीं ओर होनानद बोर्के तेळियमळ येसुंक इस्टम हिल्ले. बारित्ते येसु ओना सिस्युल्कुंक, “मनकना रूपमते पुटतोन नाकुन वरोर दोकाते पीसि, पगातोरा कय्दे हींतोर. ओर नाकुन हव्कंतुर गानि मूंड रोजकुने पजा मर्रा जीवाते तेदंतन,” इंचि कराहचेके मत्तोर. 32 येसु वेहता पोल्ले ओर्क तेळिया हिल्ले आनि ओन पूस कियालयगुडा वेरियतुर.
अंटुर्कन्ना पेद्दा बोर इंचि येसु वेहमळ
(मत्तयाल 18:1-5; लूकाल 9:46-48)
33 ओर कपरनहुमते एवसि उंदि लोते मतस्के येसु सिस्युल्कुन, “हर्रि पीसि वायानेंके मिमेट बतल वळ्कसेक वातिट?” इंचि पूसकीतोर. 34 गानि ओर चुपचाप मत्तुर. बारित्ते, “अंटुर्कन्ना पेद्दा बोर आयानुर,” इंचि ओर वळ्कसेक वातुर. 35 अस्के येसु उद्तोर आनि ओना पन्नेंड सिस्युल्कुन केय्सि, “बोरय्ते पेद्दोन आंतन इनकुंतोरो, ओर अंटुर्कन्ना सिन्नोड आसि अंटोरा सेवा कियानोर आयाना,” इंचि ओर्क वेहतोर. 36 वेहचि, वोरोर सिन्न पेडन ओरा नड्डुम निपुस्चि ओन संकाते एतकुंचि ओर्कुन, 37 “बोरय्ते ई सिन्न पेडनलेसिं आसि मंदनोन नावा पोर्रोलते ओप्कुंतुरो, ओर नाकुनगुडा ओपकुंतुर. बोरय्ते नाकुन ओपकुंतुर ओर सिराप नाकुने आयो गानि नाकुन लोहतोनगुडा ओपकुंतुर,” इंचि वेहतोर.
मनाकु विरोदमते हिल्वोर मनोरे आंदुर
(लूकाल 9:49-50)
38 अस्के योहान येसुनतोनि, “गुरु! वरोर मनकल नीवा पोर्रोलते देय्याल्क गेदमानद हूळतोम, ओर मनातोनि ताकानोर आयोर. अदुनहाटीं अल्हा कियमा इंचि मोमोट ओन आपतोम,” इंचि वेहतुर. 39 येसु ओन, “बोरय्ते ना पोर्रोलते इचंत्रमाता कबाह्क कींतोरो, ओर बिराना नावा विरोदमते कराब वळ्का परोर, अदुनहाटीं ओन आपमट. 40 बारित्ते बोरय्ते मनाकु विरोदमते हिल्लोर, ओर मना बाजुनोरे. 41 नना मीक निजम वेहंतन, मिमेट किरिस्तुनोर इंचि बोरन्ना मीक तालिमेंड एर उनालय हीते, ओन्कु तप्पाकुंटा इनाम दोर्कार. 42 ना पोर्रो विस्वासम कीता ई सिन्न पिलाल्कुनसंटोर्कुन बोरन्ना पापमते अराहते, असोंटा मनकना बोंडगेक जोत्ता बंडा दोहचि समुद्रमते वाटतेने बेस मनंता. 43-44 ओक्कला, नीवा कय्दा हेंदाल पापम जर्गते अद कयदुन नर्किस पोहतेन बेस मनंता, बारित्ते रोंडु कय्क मंचि नरकमते बस्केने पिर्वद बगाबगा पोत्तना तडमिते होनना दानकन्ना, उंदि कय हिलाका तोंटि आसि पिस्वरते होनमळ बेस मनंता. 45-46 अल्हेने, मीवा उंदि काल्दा हेंदाल पापम जर्गते अद काल्दुन नर्किस पोहतेन बेस मनंता. बारित्ते रोंडु काल्क मंचि नरकमते होनना दानकन्ना, उंदि काल हिलाका कूटल आसि पिस्वरते होनमळ मीक बेस मनंता. 47-48 इंका अल्हेने, मीवा उंदि कळ्दा हेंदाल पापम जर्गते अद कळ्दुन तेंडिस पोहतेने बेस मनंता, बगाय्ते पूळकु हायों, तळमि पिर्रो असोंटा नरकमते होनना दानकन्ना, उंदि कळ्दे पेनदा राज्येमते होनमळ बेस मनंता. 49 बारित्ते हरेक मनकन तळमितोनि होव्वोरलेसिं कियमळ जर्गंता. 50 होव्वोर बेसे मनंता गानि होव्वोटा गुनम होत्ते दान मर्रा बल्हा तरा परंतोम? अल्हेने मिमेटगुडा बेस होव्वोर गुनमते वरोंक-वरोर कलियसि-मेलियसि सांतिते मंदना,” इंचि येसु वेहतोर.