1 मर्रा येसु कपरनहुमताल पेय्सतोर आनि योर्दन बेरेड दाटसि यहुदिया राज्येमते होत्‍तोर. लोकुल्क ओनगा जमां-जमां आसि वायालय दल्‍गतुर. अस्के येसुंक सतता अल्वाट मत्‍ताप ओर्क मर्रा कराहलय दल्‍गतोर. 2 अगा वातुर इच्‍चुर परिसिल्क येसुन बल्हानना तप्पुने दोर्का पियाना इंचि, “वरोर मनकल ओना मुत्‍तोन सोडसिट्‍टि हीयमळ न्यायमेना?” इंचि पूसकीतुर. 3 अस्के येसु ओर्कुन, “मूसाल मीक बद आदेस हीतोर?” इंचि पूसकीतोर. 4 ओर येसुन, “वरोर मनकल सोडसिट्‍टि रासि हीसि, मुत्‍तोन होळसा परांतोर इंचि आदेस मंता,” ओर इत्‍तुर. 5 इद केंजसि येसु ओर्कुन, “मीवा कटकेलमरि मनसुनाहाटीं मूसाल ई आदेसतुन मीक रासतोर. 6 गानि बस्के अय्ते पेन ई दुनियातुन कीतानो, अस्के ओर्कुन मांडसा आनि मुरतळ इंचि कीता. 7 अदुनहाटींगे मांडसा ओना यावन-बाबन होळसिसि, ओना मुत्‍तोनतोनि कलियसि मनंतोर. 8 ओर इव्वुर उंदे मेंदुल आसि मनंतुर. अदुनहाटीं ओर वेरे-वेरे आयुर गानि उंदे मेंदुल आसि मनंतुर. 9 इल्हा पेने जोडि कीताहाटीं मनकल अलग किया आयो,” इंचि वेहतोर.

10 पजा, येसु लोन मतस्के इदुना बारेमते सिस्युल्कु मर्रा उंदि मल्का ओन पूसकीतुर. 11 अस्के येसु ओर्कु, “बोरे आयिर ओना मुत्‍तोन होळसिसि इंकुंदि दानतोनि मर्मिं आते, ओर मोदाटा मुत्‍तोना विरोदमते बोगमतनम कीतापे आतोर. 12 अल्हेने ओक्‍कला मुत्‍तो दाना मुय्दोन होळसिसि इंका वरोनतोनि मर्मिं आते, अद बोगमतनम कीतद आता,” इंचि वेहतोर.

13 उंदि रोज इच्‍चुर लोकुल्क ओरा पिलाल्कुन पोर्रो येसु कय इर्सि आसिर्वादम हियना इंचि ओनगा पीसि वातुर, गानि सिस्युल्कु पिलाल्कुन तायमट इंचि तत्‍तोरकुन तेराहतुर. 14 तेराहतद येसुंक नच्‍चका सिस्युल्कुनतोनि, “सिन्‍न पिलाल्कुन नहगा वाया हीम्टु, ओर्कुन आपमटु. पेनदा राज्येम ओरसंटोरदे आंद, 15 नना मीक निजम वेहंतन, बोरे आयिर पेनदा राज्येमतुन सिन्‍न पिलाल्कुनलेसिं स्विकार किय्युर, पेनदा राज्येमते बस्केने होळिया पर्रुर,” इंचि वेहतोर. 16 पजा आ पिलाल्कुन एत्‍कुंचि, ओरा तल्‍लापोर्रो कय इर्सेके आसिर्वादम हीतोर.

17 येसु अगटाल पेय्सि हर्रि पीसि होंचेके मनानेंके वरोर मनकल विच्‍चि वातोर आनि काल्कुना पोर्रो अर्सि, “गुरु, निमे बेसतोन आंदिन. बस्केळ्क पिस्सना पिस्वरता वारसदार आयानाहाटीं नना बतल कीकन?” इंचि पूसकीतोर. 18 अस्के येसु ओन, “नाकुन बारि बेसतोर इंतिन? बोरे बेसतोर आयोर, सिराप पेन उंदे बेसतद आंद, 19 नीकु मूसाना नियमकु अय्ते एरपाटे मंतां: बोर्कुन हव्कमा, बोगमतनम कीयमा, दोंगातनम कीयमा, आबद्‍दम गवाइ हीयमा, इंकावरोन पसांचमा आनि यावन-बाबना कदर कीम,” इंचि वेहतोर. 20 इद केंजसि ओर येसुन, “गुरु, इवन्‍नि आदेकु नना सिन्‍नस्केटाले ताकसेक वासंतन,” इंचि इत्‍तोर. 21 येसु ओनेके हूळतोर. हूळसि पावरम अनपिच्‍चि, “निहगा उंदि पोल्‍ले तक्‍को मंता. निमे होन, निहगा बतलय्ते मंता अदुन पूरा अमसि, गरिबोर्कुंक तूसि हीम आनि वासि नावा पज्जो ताका. अल्हा कीते नीकु स्वर्गमते दनम दोर्कार,” इंचि येसु वेहतोर. 22 ओर पेद्‍दा सिरमंत मनकल मत्‍ताहाटीं, येसुना पोल्‍ले केंजसि ओना मोकम सिम्मरा आता आनि दुक्‍कमते अगटाल पेय्सि होत्‍तोर.

23 अस्के येसु नालुं-मूलां हूळसि सिस्युल्कुनतोनि, “पेद्‍दा सिरमंत मनकल पेनदा राज्येमते होळियमळ वेल्‍ले कस्‍टम!” इंचि वेहतोर. 24-25 ओना पोल्‍लें केंजसि सिस्युल्कु इचंत्रम आतुर. गानि येसु मर्रा उंदि मल्का सिस्युल्कुनतोनि, “पिलाल्कुनिटा! वरोर सिरमंत मनकल पेनदा राज्येमते होळियमळकन्‍ना, लोट्‍टापेट्‍टा सूदि बोंगाते होळियमळे अल्कगा मनंता,” इंचि येसु वेहतोर. 26 इद केंजसि सिस्युल्कु इंका वेल्‍लेने इचंत्रमते ओर-ओरे वळ्ककुंचि, “अल्हा अय्ते बोर पिस्सा परांतुर?” इंचि ओन पूसकीतुर. 27 येसु ओराहेके हूळसि, “इद मनकनतोनि आया पर्रो गानि पेनतोनि आया परांता. बारित्‍ते पेन अन्‍नि किया परांता,” इंचि इत्‍तोर.

28 अस्के पत्रु, “हूळा नीवा पज्जो ताकालय मोमोट अन्‍नि होळसि वातोम,” इंचि येसुन इत्‍तोर. 29-30 येसु ओन, “नना निजम वेहंतन बोरे आयिर नावाहाटीं, बेसता कबुरताहाटीं ओना लोन दारातुन, तम्मुह्क-तादलोर्कुन, हेलाह्क-अक्‍काह्कुन, यावल-बाबोन, पिलाल्कुन आनि बूमितुन होळसितोर. ओन्कु इंदकेने नूर अंताल्कु एक्‍को लोन दारा, तम्मुह्क-तादलोर्कु, हेलाह्क-अक्‍काह्कु, यावाह्कु, पिलाल्क आनि बूमि दोर्कार. ओन्कु कस्‍टाल्क वायानुं गानि वायाना युगमते ओन्कु बस्केळ्क पिस्सना पिस्वर दोर्कका मन्‍नो. 31 गानि मुन्‍ने मत्‍तोर वेल्‍लेटुर पज्जो आयानुर, पज्जोटुर मुन्‍ने आयानुर,” इंचि वेहतोर.

32-34 येसु आनि ओनतोनि मत्‍तोर येरुसलेमतेके होंचेके मत्‍तुर. येसु अंटुर्कन्‍ना मुन्‍ने मत्‍तोर. ओना सिस्युल्कु इचंत्रमते मत्‍तुर आनि ओना पज्जो ताकानुर वेर्रेते मत्‍तुर. अस्के येसु ओना पन्‍नेंड सिस्युल्कुन बाजुंक ओसि, “हूळाट! मनम येरुसलेम होंचेके मंतोम, अगा होत्‍ता पजा मनकना रूपमते पुटतोन नाकुन दोकाते पीसि पेद्‍दा पेर्मलोर्कुना आनि दर्मसास्त्रम कराहना गुरुल्कुना कय्दे अप्पजेपनुर आनि ओर ना पोर्रो हामुरता सिक्‍साता आदेस हीसि, यहुदि आयवुरा कय्दे हियानुर. यहुदि आयवुर नाकुन सिळांचनुर, ना पोर्रो उस्कानुर, पोट्‍टेते तनानुर आनि हव्कानुर. गानि मूंड रोजकुने पजा मर्रा जीवाते तेदंतन,” इंचि मुन्‍ने जर्गना बारेमते सिस्युल्कुंक मर्रा वेहतोर.

35 अल्हेने होंचेके मनानेंके जब्दिना मर्क याकोब आनि योहान येसुनगा वासि, “गुरु, मोमोट बतल अय्ते पूसकींतोम अदुन माहाटीं कियमळ गावाले इंचि मा मनसु मंता,” इंचि इत्‍तुर. 36 येसु ओर्कुन, “नना मीहाटीं बतल कियाना इंचि मीवा मनसु मंता,” इंचि इत्‍तोर. 37 ओर येसुन, “निमे राजगद्‍देपोर्रो उदतस्के नीवा तिना बाजुंक वरोन, डेमा बाजुंक वरोन उद्‍दना अदिकारम माक हीम,” इंचि इत्‍तुर.

38 गानि येसु ओर्कुन, “मिमेट बतल पूसकीसेकेनो अद मीक तेळियसेक हिल्‍ले. नना बव कस्‍टाल्क अय्ते बोगांचाना मंता, अवुन मिमेट बोगांचा परकिटा? हिलाकुंटे नना बद बपतिस्मा एतंतनो, अद मिमेट एता परकिटा?” इंचि इत्‍तोर. 39 अस्के “हो, हिया परंतोम,” इंचि इत्‍तुर. अस्के येसु ओर्कुन, “नना कस्‍टाल्क बोगांचताप मिमेट बोगांचा परकिट आनि नना एताना बपतिस्मा मिमेटगुडा एता परकिट, 40 गानि नावा तिना बाजुंक आनि नावा डेमा बाजुंक उपिचना अदिकारम नाक हिल्‍ले. अव जागां बोराहाटीं अय्ते तयार कीतोरो, अव ओर्के दोर्कंतां,” इंचि इत्‍तोर.

41 इद पोल्‍ले कळमता पदि मंदि सिस्युल्कु केंजता पजा, याकोब आनि योहानुना पोर्रो वेल्‍ले होंग आतुर. 42 अस्के येसु सिस्युल्कुन दग्गेरे केय्‍सि, “ई दुनियाता राजालोर ओरा जीतागाह्कुन, ओरा कय्दा हिडु इर्रालय हूळंतुर, अल्हेने ई दुनियाता पेद्‍दा मनकलोर्क गुडा सिन्‍ना मनकालोर पोर्रो अदिकारम हुप्‍सालय हूळंतुर, इद मीकु एर्के. 43 गानि मिमेट मात्रम अल्हा कियानायो, मीहागटाल बोरय्ते पेद्‍दा आयागोम इंचि हूळंतोरो, ओर मीवा सेवा कियागोम. 44 आनि मीहागटाल बोरय्ते मुन्‍ने अर्सि ताकालय हूळंतोरो, ओर अंटुर्क दासुड आसि मंदगोम. 45 बारित्‍ते मनकना रूपमते पुटतोर सेवा कियागोटकुनालय वाया हिल्‍लोर गानि कुद इंका वरोना सेवा कियालय वातोर. इच्‍चोरे आयाका, वेल्‍लेटुर्कुंक मुक्‍ति हियानाहाटीं ओना जीवा हियालय वातोर,” इंचि वेहतोर.

46 पजा येसु आनि ओना सिस्युल्कु यरिहो सहरते एवतुर. अगटाल मर्रा पेय्सानेंके वेल्‍लेटुर लोकुल्क ओरतोनि पेय्सतुर. तिमायिना मर्रि बरतलमय इननोर गुड्‍डि बिच्‍चागाड हर्दा पक्‍काते उद्‍दिस मत्‍तोर. 47 नासरेत सहरता येसु इगेटाल होंचेके मंतोर इंचि ओनकु बस्के अय्ते तेळियता अस्के ओर, “येसु, दाविद राजाना मर्रिना, नावापोर्रो दया कीम,” इंचि जोरसे वरगेयसि केयालय दल्‍गतोर. 48 ओर चुपचाप मनागोम इंचि वेल्‍लेटुर ओन तेराहतुर, गानि ओर, “दाविद राजाना मर्रिना, नावापोर्रो दया कीम,” इंचि इंका जोरसे वरगेयसि केयतोर. 49 अस्के येसु अगा आगसि, “ओन केयट,” इंचि ओर्क वेहतोर. ओर आ गुड्‍डिन केय्‍सि, “दैरनेम इर्रा, येसु नीकुन केयसेक मंतोर तेदा,” इंचि वेहतुर. 50 अस्के ओर मुच्‍चि मत्‍ता कपडितुन तेंडिस पोहतोर आनि बिराना तेदसि येसुनगा वातोर. 51 गुड्‍डि वाता पजा येसु ओन, “निहाटीं नना बतल कियाना इंचि नि मनसु मंता,” इंचि पूसकीतोर. ओर येसुन, “गुरु, नावा कळ्कुना नदर दिस्सनाल कीम,” इंचि इत्‍तोर. 52 येसु ओन, “निमे होन, नीवा विस्वासमे नीकुन बेस कीता,” इंचि वेहतोर. अस्केने ओना कळ्कुंक नदर वाता आनि ओरगुडा येसुना पज्जो होत्‍तोर.