1 नोमकेमता रोजु मार्र्तारिते, मग्दलेनि नाटेना मरियम, याकोबुना यावल मरियम आनि सलोमि इवु येसुना पीनगुंक होकालय, गमागमा गब्बु वायानव वस्तुक अस्तां. 2 वारमता मोदाटा रोज आय्तारम हक्‍केरेने पोळ्‍दु पेय्सता पेय्सुळे बोंदातगा होत्‍तां. 3 अव होननेंके, “अद बोंदक अड्‍डम दोस्सता बंडातुन मनाहाटीं बोर गुळाहनुर?” इंचि अवुनद अवे वळ्कसेक होत्‍तां. 4 अगा एवसि हूळते, अचोने पेद्‍दा बंडा गूळसि मत्‍तद अवुंक दिसता. 5 अव बोंदाते होळियतस्के वरोर लेय्या मनकल तेल्‍लाटा कपडिं केर्सि तिना बाजुंक उदिस मत्‍तद दिसतोर. अल्हा हूळसि अव वेरियतां. 6 ओर अवुन, “वेरियमट! बोनय्ते क्रुसुनपोर्रो वेलळ वाटसि हव्कतुर, आ नासरेत नाटेना येसुन मिमेट पह्कसेक मंतिर, ओर इगे हिल्‍लोर, जीवाते तेदतोर. इद हूळाट, ओना पीनगुन इरता जागा. 7 ओर मीक वेहता परकारम, मीकन्‍ना मुन्‍नेने गालिल राज्येम दांतोर. अदुनहाटीं मिमेट होंचि ओना सिस्युल्कुंक आनि पत्रुंक वेहाट, अगाने ओन हूळकिर,” इंचि वेहतोर. 8 अव मुर्ताह्कुंक वनकु आनि वेर्रे दल्‍गता. अदुनहाटीं अव बोंदातगाटाल पलाते पेय्सि विततां आनि आ वेर्रेके बोर्क बतल वेहा हिल्‍लें.

9 वारमता मोदाटा रोज इत्‍ते अय्तारम रोज येसु हामुरताल जीवाते तेदतोर, तेदता पजा मोट्‍टा मोदाला मग्दलेनि नाटेना मरियमुंक दिसतोर. इदे मरियमुनगाटाल एडुं देय्याल्कुन येसु गेदमिस मत्‍तोर. 10 अद अगटाल येसुनतोनि मनुंदुर आ सिस्युल्कुनगा होत्‍ता. ओर वेल्‍लेने दुक्‍कमते अळसेक मत्‍तुर, ओर्क येसुना बारेमते वेहता. 11 येसु तेदतोर आनि अद येसुन हूळता इत्‍ता पोल्‍लेतुन ओर केंजतुर गानि विस्वासम किया हिल्‍लुर. 12 अद आता पजा, ओरंटेताल इव्वुर येरुसलेमताल उंदि नार होंचेके मत्‍तुर, ओर्क वेरे रूपमते येसु दिसतोर. 13 ओर पज्जो मल्सि होंचि, कळमतोर्कुंक इद पोल्‍ले वेहतुर, गानि ओर ईरा पोल्‍लेन विस्वासम किया हिल्‍लुर.

14 पजा पदकोंडु मंदि सिस्युल्कु उदिस गाटो तिंचेके मनानेंके येसु ओर्क दिसतोर. “नना जीवाते तेदतन इंचि वेल्‍लेटुर मीक वेहना गानि मिमेट बारि विस्वासम किया हिल्‍लिर? मीवा मनसुकु कटकेलमरि आतां,” इंचि तेराहतोर. 15 अस्के ओर्कु, “मिमेट पूरा दुनियाते होंचि, बूमिपोर्रोटा अंटुर लोकुल्कुंक बेसता कबुर प्रचार कीम्टु. 16 बोरय्ते विस्वासम कीसि, बापतिस्मा एतंतोर ओनके मुक्‍ति दोर्कंता, गानि बोरय्ते विस्वासम किय्योर, ओनकु पेन सिक्‍साता आदेस हिय्यार. 17 नाकुन विस्वासम कियानोनगा इव चिन्हां मनंतां, ओर नावा पोर्रोलते देय्याल्कुन गेदमानुर आनि वेरे-वेरे बासाने वळ्कानुर, 18 तरासकुन पियानुर, बदे विसम वस्तु उनना गानि ओर्क बतल आयो, बीमार्क मत्‍तुरा पोर्रो ओरा कय्‍क इरते, ओर बेस आयानुर,” इंचि वेहतोर.

19 येसु सामि ओना सिस्युल्कुनतोनि इव पोल्‍लें वेहता पजा, पेन ओन स्वर्गमते तेहकुत्‍ता, आनि ओर दाना तिना बाजुंक उद्तोर. 20 पजा येसुना सिस्युल्कु नालुं-मूलां होंचि अन्‍नि जागाने ओना बारेमते प्रचार कीतुर. आनि सामि ओरतोनि मंचेके कबळ कियुंदुर. कबळ कियानेंके जर्गना चिन्हाना हेंदाल सामि ओना पोल्‍ले निजम इंचि रुजुव कियुंदुर. आमेन.