पिलेमोन
पिलेमोनुंक पौलुसना सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 60
पौलुस जेलने मत्‍तस्के इद सिट्‍टि रासतोर. रोम सरकारता कैदिल्‍कुना लोप्‍पोटाल ओनेसिमुस पोरोलतोर वरोर मत्‍तोर. ओर ओना मालक, इत्‍ते पिलेमोनागटाल वित्‍तिस मत्‍तोर. पौलुस जेलने मत्‍तस्के ओन्‍कु अगा ओनेसिमुस कलियतोर, अस्‍के पौलुस ओनकु पेनदा पोल्‍ले वेहचि ओन विस्वासमते तत्‍तोर. पिलेमोन ओना सेवक ओनेसिमुसुन माप कीसि, ओन वरोर दासुनलेसीं आयो गानि वरोर विस्वासि तम्मुनलेसीं मर्रा ओनगा इर्रना इंचि पौलुस पिलेमोनुंक इद सिट्‍टि रासतोर.
बगा बतल मंता
जोहार आनि परिचयम 1-3
पिलेमोनना तारिप कियमळ 4-7
ओनेसिमुसनाहाटीं विनंति कियमळ 8-22
आकिरता बोदां 23-25
1
जोहर
1-2 नना पौलुस, किरिस्‍तु येसुना बारेमता बेसता कबुर वेहताहाटीं कैदिन आसि जेलने मंतन. ना तम्मुनलेसीं मनना तिमोतिनाहेंदाल ना पावरमगल्‍ला दंटातोर पिलेमोनुंक, मावा हेलड अपियांक, बेसता कबुर वेहानाहाटीं मावालेसीं लडाइ कियना अरकिपुसुंक, अल्‍हेने नीवा लोते जमा आयाना कलिसियातोर्क इद सिट्‍टि रासेक मंतन. मना पेनबाबानाहेंदाल आनि सामि येसु किरिस्‍तुनाहेंदाल मीकु कुर्पा, सांति दोर्किकांटी.
पिलेमोनना पावरम आनि विस्वासम
4-5 पिलेमोन, सामि येसुना पोर्रोटा नीवा विस्वासम बारेमते, अल्‍हेने पेनदा लोकुल्‍कुनपोर्रो निमे हुप्‍सना पावरम बारेमते नना केंजतन. अदुनहाटीं नना पारतना कियनेंके बस्‍केळ्‍क नीकुन मति कीसि पेनदुक दन्यवाद वेहंतन. येसु किरिस्‍तुना अन्‍नि बेसता पोल्‍लेना तेल्वि, नीकु दोर्कताहाटीं वेरेतोरगुडा नी विस्वासमते पोत्‍तु आयागोम इंचि नना पारतना कीसेक मंतन. तम्मा! निमे पेनदा लोकुल्‍कुन पावरम कीसि ओरा मनसुकुंक सांति हीतिन. अदुनहाटीं नी पावरमहेंदाल नाकुगुडा वेल्‍लेन सुकम, सांति दोर्कता.
ओनेसिमुसनाहाटीं विनंति कियमळ
8-9 बद अव्‍सरमो अदुन कीम इंचि, किरिस्‍तुना पोरोल्ते नीकु वेहाना अदिकारम नाकु मंता. अय्नागानि नना पौलुसुन, मातरन आसि किरिस्‍तु येसुनाहाटीं जेलते मंचि, पावरमते नीकु विनंति कीसंतन. 10 ओनेसिमुसुनपोर्रो निमे दया हुप्‍सा इंचि नीकु विनंति कीसंतन. नना जेलते मननेंके ओर पेनदुन विस्वासम कीसि नावा मर्रि आतोर. 11 मोदाला ओर नीकु बता कबळ्‍क ओज्‍जाकोंटा मत्‍तोर. गानि इंदके ओर मना इव्‍वुर्कगुडा कबळ्‍क ओज्‍जंतोर. 12 अय्ते नना बच्‍चोरो पावरम किय्‍याना ना मर्रिनसोंटा ओनेसिमुसुन नीहेके वापस लोह्‍चंतन 13 बेसता कबुर वेहताहाटीं नना जेलते मंतन. नीवा बदलिपोर्रो ओनेसिमुस नावा सेवा कीते बेस मनंता इनकुंचि ओन नाहगेन इर्राना विचारम कीसि मत्‍तन, 14 गानि निमे किय्‍याना इसोंटा बेसता कबळ कुसिते कियगोम, बल्‍मितोनि जर्गामन्‍नि इंचि नीवा पोल्‍ले हिल्वा नना इल्‍हा कियमळ नाकु बेस दल्‍गाहिल्‍ले. 15 ओनेसिमुस कोन्‍नि रोजकु निहागटाल लक्‍कु आसि मत्‍तोर, गानि बोर्क एरपाट! बस्‍केळ्‍ताहाटीं नीकु दग्‍गेरा आयगोम इंचि अल्हा जर्गता बारे! 16 इंदकेटाल ओनेसिमुसुन दासुनलेक्‍काते आयो गानि, दासुंकन्‍ना एक्‍को, इत्‍ते नीवा दंटाता वरोर विस्वासि दादाना लेक्‍काते हूळकुन. नना अय्ते ओन बच्‍चोनो पावरम कींतन. गानि इंदके ओर सामिन विस्वासम कीसि, नीतोनि मनंतोर, निमेगुडा ओन नाकन्‍ना एक्‍को पावरम कीम.
17 ओक्‍कला निमे नाकुन सेवालोप्‍पो नीवा पालिगाड इनकुनानय्ते, नाकुन दग्‍गेरा कीकुत्‍ताप ओनगुडा दग्‍गेरा कीकुन. 18 ओर नीवद बतलन्‍ना नुकसान कीते, नीकु बतलन्‍ना बाकिगिंटा मत्‍ते, नावा पोरोलते रासि इर्रा. 19 अदुन निहचींतन इंचि, नना पौलुस, नावा सतता कय्‍दे रासि हीसेक मंतन. अल्हा हूळते निमेन नाकु बाकि मंतिन. इद नीकु वेहना अव्‍सरम हिल्‍ले. 20 अदुनहाटीं नावा तम्मा! सामिना पोरोलते ओनेसिमुसना बारेमता विनंतितुन ओप्‍कुंचि, किरिस्‍तुना लोप्पो नावा मनसुंकु सांति हीम. 21 नना वेहतद निमे केंजंतिन इत्‍ता बरोसाते इद सिट्‍टि रासेक मंतन. अचोने आय्‍का नना वेहतादानकन्‍ना निमे एक्‍को कींतिन इंचि नाक एर्के. 22 अल्‍हेने, नाहाटीं मंदालय उंदि जेगा हूळसि इर्रा. मिमेट किय्‍याना पारतनां केंजसि सामि नाकुन मिहगा लोहंतोर बारे इत्‍ता आसे नाकु मंता.
आकिरता जोहर
23 किरिस्‍तु येसुनाहाटीं जेलने अरता एपप्रास इनानोर इग्‍गे नातोनि मंतोर, ओर मीकु जोहार वेहचंतोर. 24 अल्‍हेने नातोनि कलियसि कबळ कियाना मरकुस, अरिसतरकुस, देमास, लूकाल ईरगुडा नीकु जोहार वेहासेक मंतुर. 25 मना सामि येसु किरिस्‍तुना कुर्पा मीवा आत्मांकु तोळ मन्‍निकांटी, आमीन.